कराड:-गुरुंच्या ऋणाप्रती कृतज्ञतेचा भावस्पर्शी सोहळा; श्री शिवाजी विद्यालयात गुरुपौर्णिमा उत्साहात साजरी.
पत्रकार विनोद पाटील सातारा जिल्हा अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
कराड:-गुरुंच्या ऋणाप्रती कृतज्ञतेचा भावस्पर्शी सोहळा; श्री शिवाजी विद्यालयात गुरुपौर्णिमा उत्साहात साजरी.
“गुरु म्हणजे ज्ञानाचा अखंड दीप,
अज्ञानाचा दूर करणारा अंधार।
गुरुच देतो संस्कारांची श्रीमंती,
त्याच्या चरणीच जीवनाचा खरा आधार॥”
कराड:-भारतीय संस्कृतीत गुरुचे स्थान देवापेक्षाही श्रेष्ठ मानले जाते. गुरु हा केवळ ज्ञानदाता नसून विद्यार्थ्यांच्या व्यक्तिमत्त्वाचा शिल्पकार असतो. अशा गुरुजनांप्रती आदर, कृतज्ञता आणि श्रद्धा व्यक्त करण्यासाठी साजरी केली जाणारी गुरुपौर्णिमा श्री शिवाजी शिक्षण संस्था ट्रस्ट, कराड संचलित श्री शिवाजी विद्यालय, कराड येथे अत्यंत उत्साहपूर्ण, भक्तिमय व प्रेरणादायी वातावरणात साजरी करण्यात आली.
कार्यक्रमाची सुरुवात ज्ञानदेवता सरस्वतीच्या प्रतिमेचे पूजन करून करण्यात आली. त्यानंतर विद्यालयाच्या संगीत विभागातर्फे सुमधुर स्वागतगीत सादर करण्यात आले. विद्यार्थी प्रतिनिधींनी गुरुजनांना लेखणी भेट देऊन त्यांच्याप्रती आदर, सन्मान आणि कृतज्ञतेची भावना व्यक्त केली.
यावेळी विद्यार्थ्यांनी गुरुपौर्णिमेचे महत्त्व, भारतीय गुरु-शिष्य परंपरेची गौरवशाली परंपरा आणि गुरुंचे जीवनातील स्थान याविषयी प्रभावी मनोगते सादर केली. तसेच विद्यार्थ्यांनी तयार केलेल्या आकर्षक भित्तीपत्रकाचे प्रकाशन विद्यालयाचे मुख्याध्यापक श्री. टी. डी. जाधव यांच्या हस्ते करण्यात आले.
कार्यक्रमाच्या अध्यक्षस्थानावरून मार्गदर्शन करताना मुख्याध्यापक श्री. टी. डी. जाधव म्हणाले, “गुरु हा विद्यार्थ्यांच्या जीवनाला योग्य दिशा देणारा दीपस्तंभ आहे. ज्ञान, संस्कार, चारित्र्य आणि जीवनमूल्यांची जपणूक करण्यामध्ये गुरुंची भूमिका अनमोल आहे. प्रत्येक विद्यार्थ्याने आपल्या गुरुंचा आदर राखून त्यांच्या मार्गदर्शनातून जीवनात यशस्वी वाटचाल करावी.” त्यांनी भारतीय संस्कृतीतील गुरु-शिष्य परंपरेची प्रेरणादायी उदाहरणे देत विद्यार्थ्यांना मोलाचे मार्गदर्शन केले.
यावेळी शिक्षक प्रतिनिधी म्हणून श्री. रोडे ए. बी. व सौ. पवार व्ही. आर. यांनी मनोगत व्यक्त करून गुरुंच्या कार्याचे महत्त्व अधोरेखित केले.
कार्यक्रमास विद्यालयातील सर्व शिक्षक, शिक्षकेतर कर्मचारी तसेच विद्यार्थी मोठ्या संख्येने उपस्थित होते. कार्यक्रमाचे सूत्रसंचालन इयत्ता नववीतील विद्यार्थी चि. संस्कार भंडारे यांनी केले, तर आभार प्रदर्शन सौ. पाटील एस. आर. यांनी केले. राष्ट्रगीताने कार्यक्रमाची सांगता झाली.
