कोरेगाव:-“बोरबनमध्ये अवतरला भक्तीचा महासागर!” अखंड नामजप, ज्ञानेश्वरी पारायण आणि दिग्गज कीर्तनकारांच्या सेवेत सात दिवस विठ्ठलनामाचा अखंड गजर.
पत्रकार सुशीलकुमार पुजारी कराड तालुका उपाध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
“बोरबनमध्ये अवतरला भक्तीचा महासागर!”
अखंड नामजप, ज्ञानेश्वरी पारायण आणि दिग्गज कीर्तनकारांच्या सेवेत सात दिवस विठ्ठलनामाचा अखंड गजर.
कोरेगाव
कलियुगातील विठ्ठल भक्तीचे प्रेरणास्थान आणि सातारा जिल्ह्यातील जागृत देवस्थान म्हणून प्रसिद्ध असलेल्या श्री क्षेत्र बोरबन (स्वयंभू पांडुरंग प्रिती पंढरपूर, ता. कोरेगाव) येथे अधिक ज्येष्ठ महिन्याच्या पावन निमित्ताने भव्य-दिव्य ‘अखंड नामजप यज्ञ सोहळा व ज्ञानेश्वरी पारायण सोहळा’ मोठ्या भक्तिभावाने सुरू झाला आहे. सोमवार दि. २५ मे २०२६ ते सोमवार दि. १ जून २०२६ या कालावधीत होणाऱ्या या सप्ताहात सातारा जिल्ह्यासह पंचक्रोशीतील भाविक भक्तीरसात चिंब न्हाऊन निघत आहेत.
विठ्ठल-रुक्मिणीच्या नामस्मरणाने परिसर दुमदुमून गेला असून, संत परंपरेचा जागर महाराष्ट्रातील नामवंत कीर्तनकार, प्रवचनकार आणि वारकरी संप्रदायातील मान्यवरांच्या उपस्थितीत रंगत आहे. बोरबन नगरीत जणू भक्ती, अध्यात्म आणि संस्कारांचा महाकुंभ भरल्याचे चित्र पाहायला मिळत आहे.
“नामस्मरणातून समाजप्रबोधनाचा महामेळा”
या सप्ताहाचे व्यासपीठ संचालन ह.भ.प. करण महाराज आणि ह.भ.प. विष्णू महाराज भिसे (जोग महाराज संस्था, आळंदी) करीत आहेत. तर श्रीमद् भागवत कथेचे रसाळ आणि अभ्यासपूर्ण निरूपण प्रसिद्ध भागवताचार्य ह.भ.प. विष्णुपंत महाराज चामणार यांच्या मधुर वाणीतून होत आहे.
संपूर्ण सप्ताहात पहाटेच्या काकड आरतीपासून रात्रीच्या कीर्तनापर्यंत भक्तीमय कार्यक्रमांची अखंड मालिका सुरू आहे.
दैनंदिन कार्यक्रमांचे वेळापत्रक
पहाटे ४ ते ६ : काकड आरती
सकाळी ६ ते ७ : श्री विष्णूसहस्रनाम स्तोत्र
सकाळी ७ ते १२ : ज्ञानेश्वरी पारायण
दुपारी १२ ते १ : भोजन व विश्रांती
दुपारी १ ते ३ : संगीत भजन
दुपारी ३ ते ५.३० : श्रीमद् भागवत कथा
सायंकाळी ५.३० ते ६.३० : हरिपाठ
सायंकाळी ७ ते ९ : कीर्तन सेवा
“महाराष्ट्रातील दिग्गज कीर्तनकारांचा भक्तीमय संगम”
या कीर्तन महोत्सवात संत परंपरेतील नामवंत कीर्तनकारांची सेवा लाभत असून भाविकांना आध्यात्मिक मेजवानी मिळत आहे.
कीर्तन सेवा कार्यक्रम
🔸 २५ मे – ह.भ.प. श्रीगुरु हरिप्रसाद महाराज देहूकर
(जगद्गुरु संत तुकोबारायांचे ११ वे वंशज)
🔸 २६ मे – ह.भ.प. भाऊसाहेब महाराज पवार
(गाथाकंठभूषण, आळंदी)
🔸 २७ मे – ह.भ.प. वैराग्यमूर्ती उदय महाराज पाटील (आटके)
🔸 २८ मे – ह.भ.प. श्रीपाद महाराज साखराळकर
🔸 २९ मे – ह.भ.प. श्रीगुरु एकनाथ महाराज नामदास
(संतशिरोमणी नामदेवरायांचे वंशज)
🔸 ३० मे – ह.भ.प. श्रीगुरु बापूसाहेब महाराज देहूकर
(जगद्गुरु संत तुकोबारायांचे १० वे वंशज)
🔸 ३१ मे – ह.भ.प. गुरुवर्य ज्ञानेश्वर माऊली कदम
(छोटे माऊली, शिरवडे)
🔸 १ जून – ह.भ.प. भागवताचार्य विष्णुपंत महाराज चामणार
यांच्या कीर्तनाने आणि सार्वजनिक महाप्रसादाने सप्ताहाची सांगता होणार आहे.
“भक्तांची सेवा हीच विठ्ठल सेवा” – मोफत निवास व भोजन व्यवस्था
सप्ताहासाठी येणाऱ्या सर्व भाविकांसाठी आयोजक समितीने मोफत निवास, अल्पाहार आणि भोजनाची भव्य व्यवस्था केली आहे. विविध गावांतील ग्रामस्थ मंडळे, दानशूर व्यक्ती आणि वारकरी मंडळी यांच्या सहकार्याने दररोज संत पंगतींचे आयोजन करण्यात आले आहे.
कालगाव, वेणेगाव, कोपर्डे, तुकाईवाडी, हेळगाव, मोहितेवाडी, निसराळे, दुर्गावाडी, निगडी, वाहगाव, किरोली, हणबरवाडी, खराडे, तारगाव, पारगाव आदी गावांतील ग्रामस्थांनी या सप्ताहासाठी उत्स्फूर्त सहभाग नोंदवून भक्तसेवेचा वसा जपला आहे.
“६१ गावांचे एकत्रित श्रमदान; भक्तीचा ऐतिहासिक सोहळा”
हा भव्य सोहळा यशस्वी करण्यासाठी ६१ गावांतील ग्रामस्थ, बालसंस्कार वारकरी मंडळ पेरले, ग्रामस्थ मंडळ तारगाव तसेच पंचक्रोशीतील हजारो वारकरी व सेवेकरी अहोरात्र परिश्रम घेत आहेत. भक्ती, सेवा आणि समाजएकतेचा संदेश देणारा हा सप्ताह संपूर्ण परिसरासाठी आध्यात्मिक पर्वणी ठरत आहे.
आयोजकांच्या वतीने सर्व भाविकांना श्री स्वयंभू पांडुरंगाच्या दर्शनाचा लाभ घ्यावा, भागवत कथा, ज्ञानेश्वरी पारायण आणि कीर्तन श्रवणातून जीवन समृद्ध करावे तसेच तन, मन आणि धनाने सहकार्य करावे, असे नम्र आवाहन करण्यात आले आहे.
