वाई:-पुणे पदवीधर-शिक्षक मतदारसंघासाठी राष्ट्रवादीची जोरदार मोर्चेबांधणी; मतदारांपर्यंत थेट पोहोचण्याचे शशिकांत शिंदे यांचे निर्देश!
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) वाई:-पुणे पदवीधर-शिक्षक मतदारसंघासाठी राष्ट्रवादीची जोरदार मोर्चेबांधणी; मतदारांपर्यंत थेट पोहोचण्याचे शशिकांत शिंदे यांचे निर्देश!
वाईतील बैठकीत निवडणूक रणनीतीचा आढावा; मतदार यादीनुसार संपर्क आणि संघटनात्मक समन्वयावर भर.
वाई दी.२०:
पुणे पदवीधर आणि शिक्षक मतदारसंघाच्या आगामी निवडणुकीच्या पार्श्वभूमीवर राष्ट्रवादी काँग्रेसने निवडणूक तयारीला वेग दिला असून, मतदारांशी थेट संवाद साधण्यावर आणि नियोजनबद्ध जनसंपर्कावर लक्ष केंद्रित केले आहे. वाई येथे डॉ. सतीश बाबर यांच्या निवासस्थानी आयोजित आढावा बैठकीत निवडणुकीच्या रणनीतीवर सविस्तर चर्चा करण्यात आली. मतदार यादीनुसार प्रत्येक मतदारापर्यंत पोहोचा, गाठीभेटी वाढवा आणि संघटनात्मक ताकद प्रभावीपणे कामाला लावा, असे स्पष्ट निर्देश राष्ट्रवादी काँग्रेसचे प्रदेशाध्यक्ष तथा माजी आमदार शशिकांत शिंदे यांनी पदाधिकारी व कार्यकर्त्यांना दिले.
निवडणुकीत यश मिळविण्यासाठी केवळ बैठका घेऊन चालणार नाही, तर प्रत्येक मतदाराशी सातत्यपूर्ण संपर्क राखणे, त्यांच्या अपेक्षा जाणून घेणे आणि कार्यकर्त्यांमध्ये समन्वय ठेवणे आवश्यक असल्याचे या बैठकीत अधोरेखित करण्यात आले. मतदार यादीनुसार नियोजन करून प्रत्यक्ष भेटींना प्राधान्य द्यावे. प्रत्येक पदाधिकारी आणि कार्यकर्त्याने आपली जबाबदारी प्रभावीपणे पार पाडावी, असे आवाहन शिंदे यांनी केले. एकजुटीने आणि नियोजनबद्ध पद्धतीने काम केल्यास विजय निश्चितपणे मिळवता येईल, असा विश्वासही त्यांनी व्यक्त केला.
बळीराजाच्या परिस्थितीची जाणीव ठेवून वाढदिवस साजरा न करण्याचा निर्णय.
राज्यातील दुष्काळी परिस्थिती आणि संकटात सापडलेल्या बळीराजाची अवस्था लक्षात घेऊन यंदा वाढदिवस साजरा न करण्याचे आवाहन आपण कार्यकर्त्यांना केले होते, असे शशिकांत शिंदे यांनी सांगितले. त्यांच्या या आवाहनाला कार्यकर्त्यांनी सकारात्मक प्रतिसाद दिल्याबद्दल त्यांनी सर्वांचे आभार मानले. सामाजिक परिस्थितीचे भान राखत कार्यकर्त्यांनी दाखविलेल्या संवेदनशीलतेचे त्यांनी कौतुक केले.
निवडणुकीच्या तयारीला संघटनात्मक बळ
बैठकीच्या प्रारंभी उपस्थित मान्यवरांनी शशिकांत शिंदे यांना वाढदिवसाच्या शुभेच्छा दिल्या. त्यानंतर डॉ. सतीश बाबर यांनी प्रास्ताविकातून बैठकीची भूमिका स्पष्ट केली. पदवीधर आणि शिक्षक मतदारसंघातील मतदारांपर्यंत पोहोचण्यासाठी आवश्यक नियोजन, कार्यकर्त्यांमधील समन्वय आणि प्रचाराची दिशा यावर यावेळी चर्चा झाली.
निवडणुकीच्या पार्श्वभूमीवर मतदारांशी वैयक्तिक संपर्क वाढविणे, स्थानिक पातळीवर संघटना अधिक सक्रिय करणे आणि प्रत्येक कार्यकर्त्याला नियोजनानुसार जबाबदारी देणे, या बाबींना बैठकीत महत्त्व देण्यात आले. त्यामुळे आगामी निवडणुकीसाठी पक्षाची तयारी अधिक गतिमान करण्याचा निर्धार व्यक्त करण्यात आला.
या बैठकीस तेजपाल वाघ, संग्राम कदम, ॲड. निलेश डेरे, संतोष पवार, डॉ. सतीश बाबर, सुरेश देशमाने, मोनिका चव्हाण, धनश्री मालुसरे, प्रदीप जायगुडे, राजकुमार जगताप, फय्याज बागवान, अवधूत निकम, अतुल संकपाळ, दीपक मालुसरे यांच्यासह तालुक्यातील राष्ट्रवादी काँग्रेस व राष्ट्रीय काँग्रेसचे पदाधिकारी, कार्यकर्ते, पदवीधर आणि शिक्षक उपस्थित होते.
2) वाई:-पशुविमा योजनेचा जिल्ह्यात वाईतून प्रारंभ; हप्त्याच्या ८५ टक्के रक्कम शासन भरणार!
गाई, बैल, म्हशींसह शेळ्यांनाही विमा संरक्षण; सुरुवातीलाच ५५ पशुधनाचा विमा.
वाई, दि. २० : पशुधनाचे नुकसान झाल्यास पशुपालकांवर कोसळणारा आर्थिक भार कमी करण्यासाठी शासनाने महत्त्वपूर्ण पाऊल उचलले आहे. राष्ट्रीय पशुधन अभियानांतर्गत राबविण्यात येणाऱ्या पशुविमा योजनेचा सातारा जिल्ह्यात वाई तालुक्यातील बावधन येथून प्रारंभ झाला आहे. या योजनेमुळे पशुपालकांना विमा हप्त्याच्या केवळ १५ टक्के रक्कम भरून आपल्या पशुधनाला विमा संरक्षण मिळवता येणार असून, उर्वरित ८५ टक्के हप्ता शासन भरणार आहे.
बावधन येथील अजय अरविंद दाभाडे यांच्या गाईंचा विमा उतरवून योजनेचा शुभारंभ करण्यात आला. योजनेच्या प्रारंभानंतर अल्पावधीतच ५५ पशूंचा विमा उतरविण्यात आल्याने पशुपालकांमध्ये या योजनेबाबत जागरूकता निर्माण होत असल्याचे चित्र आहे.
कमी खर्चात पशुधनाला विम्याचे कवच
शेतीला जोडधंदा म्हणून पशुपालन करणाऱ्या शेतकऱ्यांसाठी गाय, बैल, म्हैस आणि शेळ्या हे उत्पन्नाचे महत्त्वाचे साधन आहे. मात्र, पशुधनाचे नुकसान झाल्यास शेतकरी आणि पशुपालकांना मोठ्या आर्थिक संकटाला सामोरे जावे लागते. ही जोखीम कमी करण्यासाठी पशुविमा योजना उपयुक्त ठरणार आहे.
योजनेनुसार गाई व बैलांसाठी प्रति जनावर कमाल ७० हजार रुपये, म्हशींसाठी ८० हजार रुपये, तर शेळीसाठी ७ हजार रुपये इतकी विम्यासाठी कमाल किंमत निर्धारित करण्यात आली आहे. जनावरांच्या निर्धारित किमतीच्या ४.३ टक्के दराने एका वर्षाचा विमा हप्ता आकारला जाणार आहे. या हप्त्यापैकी ८५ टक्के रक्कम शासनाकडून भरली जाणार असून, पशुपालकाला केवळ १५ टक्के रक्कम भरावी लागणार आहे.
पशुपालकांनी योजनेचा लाभ घ्यावा
संभाव्य दुष्काळसदृश परिस्थितीच्या पार्श्वभूमीवर पशुधनाची देखभाल, चारा नियोजन आणि पशुपालकांना आवश्यक मदत उपलब्ध करून देण्याचे प्रयत्न प्रशासनाकडून सुरू आहेत. अशा परिस्थितीत पशुविमा योजना पशुधनाच्या आर्थिक सुरक्षिततेच्या दृष्टीने महत्त्वाची ठरू शकते.
जिल्हा पशुसंवर्धन व दुग्धव्यवसाय उपायुक्त डॉ. दिनकर बोर्डे यांच्या मार्गदर्शनाखाली ही योजना राबविण्यात येत आहे. जिल्ह्यातील अधिकाधिक पशुपालकांपर्यंत योजनेची माहिती पोहोचवून त्यांना विमा संरक्षणाच्या कक्षेत आणण्याचा पशुसंवर्धन विभागाचा प्रयत्न आहे.
गाई, बैल, म्हशी तसेच शेळी-मेंढीपालकांनी आपल्या पशुधनाचा विमा उतरवून आर्थिक सुरक्षितता मिळवावी. योजनेचा लाभ घेण्यासाठी पशुपालकांनी नजीकच्या पशुवैद्यकीय दवाखान्याशी संपर्क साधावा, असे आवाहन वाई तालुका प्रमुख तथा सहाय्यक आयुक्त, पशुसंवर्धन व दुग्धव्यवसाय विभागाचे डॉ. सुनील देशपांडे यांनी केले आहे.
3) वाईत माजी ग्रामपंचायत सदस्य विजय भोसले यांचे अपघाती निधन.
बँकिंग क्षेत्रासह सामाजिक कार्यातही होते सक्रिय; डांगे कॉलनी, लाखानगर व यशवंतनगर परिसरात हळहळ.
सातारा | वाई, दि. २० : वाई तालुक्यातील यशवंतनगर ग्रामपंचायतीचे माजी सदस्य, वाई जनता अर्बन बँकेचे अधिकारी आणि सामाजिक कार्यकर्ते विजय दिनकर भोसले (रा. डांगे कॉलनी, वाई) यांचे रविवार, दि. १८ ऑक्टोबर रोजी अपघाती निधन झाले. त्यांच्या अकाली निधनाच्या वृत्ताने डांगे कॉलनी, लाखानगर आणि यशवंतनगर परिसरात शोककळा पसरली आहे.
विजय भोसले यांनी यशवंतनगर ग्रामपंचायतीचे सदस्य म्हणून काम करताना स्थानिक पातळीवर योगदान दिले होते. वाई जनता अर्बन बँकेत अधिकारी म्हणूनही त्यांनी जबाबदारी पार पाडली. बँकिंग क्षेत्रातील सेवेसोबतच सामाजिक कार्यातही त्यांचा सक्रिय सहभाग होता. त्यांच्या या कार्यामुळे परिसरात त्यांचा मित्रपरिवार आणि परिचितांचा मोठा गोतावळा होता.
त्यांच्या निधनाने कुटुंबीय, नातेवाईक, मित्रपरिवार आणि परिचितांना मोठा धक्का बसला आहे. एका परिचित व्यक्तिमत्त्वाच्या अकाली एक्झिटमुळे परिसरातून हळहळ व्यक्त होत आहे.
कै. विजय दिनकर भोसले यांच्या आत्म्यास चिरशांती लाभो, तसेच त्यांच्या कुटुंबीयांना या दुःखातून सावरण्याचे बळ मिळो, अशी भावपूर्ण श्रद्धांजली डांगे कॉलनी, लाखानगर आणि यशवंतनगर येथील ग्रामस्थ व मित्रपरिवाराने अर्पण केली.
