महाबळेश्वरवर शोककळा; ‘दादा’ हरपल्याने डोंगरमाथा अश्रूंनी ओलावला.
पत्रकार उत्तम भालेराव महाबळेश्वर तालुका अध्यक्ष
ACLS INTERNATIONAL PRESS REPORTER ASSOCIATION राष्ट्रीय अध्यक्ष संपादक प्रल्हाद चव्हाण-8208717483
महाबळेश्वरवर शोककळा; ‘दादा’ हरपल्याने डोंगरमाथा अश्रूंनी ओलावला.
महाबळेश्वर | प्रतिनिधी
महाराष्ट्राच्या राजकारणातील कर्तृत्ववान, प्रशासनावर पकड असलेले आणि सामान्य माणसाच्या दुःखाशी आपुलकीने जोडलेले राज्याचे उपमुख्यमंत्री अजित ‘दादा’ पवार यांच्या अकाली व अत्यंत दुर्दैवी निधनाच्या वृत्ताने महाबळेश्वर तालुक्यावर शोककळा पसरली. नेहमीच पर्यटकांच्या गजबजाटाने गजबजलेले हे थंड हवेचे ठिकाण क्षणार्धात स्तब्ध झाले; जणू डोंगरमाथ्यालाही आज शब्द सुचले नाहीत.
निधनाची बातमी कळताच मुख्य बाजारपेठ, चौक, रस्ते आणि पर्यटन क्षेत्रातील व्यवहार स्वयंस्फूर्तपणे बंद ठेवण्यात आले. व्यापारी बांधवांनी दुकाने बंद करून ‘दादा’ यांना मूक मानवंदना दिली. हॉटेल व्यावसायिक, टॅक्सी संघटना, स्थानिक रहिवासी, सामाजिक कार्यकर्ते आणि सर्वपक्षीय नेते यांनी आपले व्यवहार थांबवून शोक व्यक्त केला. संपूर्ण शहरात शांतता पसरली होती; चेहऱ्यांवर दुःख आणि डोळ्यांत अश्रू होते.
मुख्य बाजारपेठेत आयोजित करण्यात आलेल्या शोकसभेला नगराध्यक्ष सुनील शिंदे, उपनगराध्यक्ष नासीर मुलाणी, मुख्याधिकारी योगेश पाटील, भाजप नगरसेवक रविंद्र कुंभारदे, माजी नगराध्यक्ष डी. एम. बावळेकर, वंचित बहुजन आघाडी महाबळेश्वर तालुका अध्यक्ष उत्तम भालेराव डेमार्टीक पार्टीचे ऋषिकेश वायदंडे यांच्यासह विविध पक्षांचे पदाधिकारी, कार्यकर्ते व नागरिक मोठ्या संख्येने उपस्थित होते. उपस्थित प्रत्येकाच्या शब्दांत एकच भावना होती— “हा केवळ एका नेत्याचा नव्हे, तर महाराष्ट्राच्या प्रशासनातील आधारस्तंभाचा अंत आहे.”
शोकसभेत बोलताना अनेक स्थानिक नेते आणि कार्यकर्त्यांचे डोळे पाणावले.
“अजित दादा म्हणजे केवळ राजकारणी नव्हते; ते निर्णयक्षमता, कर्तव्यदक्षता आणि लोकहिताला प्राधान्य देणारे नेतृत्व होते. सकाळी कामाला सुरुवात करून वेगाने निर्णय घेणारा असा नेता पुन्हा होणे कठीण आहे,” अशा शब्दांत उपस्थितांनी आपल्या भावना व्यक्त केल्या.
महाबळेश्वरच्या पर्यटन व महाबळेश्वर तालुक्या च्या विकासासाठी, पायाभूत सुविधांसाठी आणि स्थानिक प्रश्न सोडवण्यासाठी दादांनी नेहमीच ठाम भूमिका घेतली होती. त्यांच्या नेतृत्वाखाली अनेक प्रश्न मार्गी लागले, ही आठवण काढत उपस्थितांनी कृतज्ञतेने नतमस्तक होऊन श्रद्धांजली अर्पण केली.
आज महाबळेश्वर तालुका शांत आहे, पण ही शांतता पोकळीची आहे.
‘दादा’ गेले, पण त्यांच्या कार्याचा ठसा आणि जनतेच्या मनातील जागा कधीही रिकामी होणार नाही—अशीच भावना प्रत्येकाच्या मनात घर करून राहिली आहे.
पत्रकार: उत्तम भालेराव अध्यक्ष आर पी एस स्टार न्यूज.महाबळेश्वर.
RPS STAR NEWS YOUTUBE चॅनेल ला LIKE, FOLLOW, SUBSCRIBE आणि COMMENT करा.
ACLS इंटरनॅशनल प्रेस रिपोर्टर असोसिएशन
