आंबेगाव, दत्तनगरचा पाण्याचा प्रश्न अखेर मार्गी! नगरसेविका स्मिता कोंढरे यांच्या पाठपुराव्याला यश.
पत्रकार अब्दुल रहीम शेख कात्रज शहराध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
आंबेगाव, दत्तनगरचा पाण्याचा प्रश्न अखेर मार्गी! नगरसेविका स्मिता कोंढरे यांच्या पाठपुराव्याला यश.
आंबेगाव आणि दत्तनगर परिसरातील नागरिकांसाठी एक अत्यंत दिलासादायक बातमी आहे. अनेक दिवसांपासून प्रलंबित असलेल्या वंडर सिटी पंपिंग स्टेशनवरून लेक विस्टा टाकीला पाणीपुरवठा करण्याचा मार्ग अखेर मोकळा झाला आहे. स्थानिक नगरसेविका स्मिता कोंढरे यांनी केलेल्या सातत्यपूर्ण पाठपुराव्यामुळे हा पाणीप्रश्न निकाली निघाला असून, परिसरातील पाणीपुरवठा आता सुरळीत होणार आहे. या योजनेसाठी आवश्यक असलेल्या मुख्य लाईन जोडणीचे काम युद्धपातळीवर पूर्ण करण्यात आले आहे.
हा पाण्याचा प्रश्न लवकरात लवकर सुटावा यासाठी पुणे महानगरपालिकेचा पाणीपुरवठा विभाग आणि ठेकेदारांनी दिवस-रात्र एक केला. सलग ३९ तास अविरत आणि अहोरात्र काम करून ही महत्त्वाची लाईन जोडणी (पाइपलाईन कनेक्टिव्हिटी) पूर्ण करण्यात आली. काम सुरू असताना तांत्रिक अडचणींवर मात करत कर्मचाऱ्यांनी हे शिवधनुष्य पेलले.
आंबेगाव आणि दत्तनगर भागात गेल्या काही काळापासून अपुऱ्या पाणीपुरवठ्यामुळे स्थानिक नागरिक त्रस्त होते. वंडर सिटी पंपिंग स्टेशनवरून लेक विस्टा टाकीला जोडणारी लाईन तांत्रिक कारणांमुळे रखडली होती. हा प्रश्न सोडवण्यासाठी नगरसेविका स्मिता कोंढरे यांनी महापालिका आयुक्त आणि पाणीपुरवठा विभागाच्या वरिष्ठ अधिकाऱ्यांकडे सातत्याने बैठका घेऊन कामाला मंजुरी मिळवून घेतली होती.
हे आव्हानात्मक काम वेळेत पूर्ण केल्याबद्दल नगरसेविका स्मिता कोंढरे यांनी पुणे महानगरपालिकेच्या पाणीपुरवठा विभागाचे अधिकारी, अभियंते आणि ठेकेदार यांच्या तत्परतेचे व कष्टाचे विशेष आभार मानले. तसेच, सलग ३९ तास काम सुरू असताना कोणत्याही प्रकारची तक्रार न करता, संयम राखून सकारात्मक सहकार्य केल्याबद्दल परिसरातील सर्व नागरिकांचेही त्यांनी मनापासून आभार मानले आहेत. ऐन सणासुदीच्या काळात पाण्याचा प्रश्न मार्गी लागल्याने नागरिकांनी समाधान व्यक्त केले आहे.
