वाई बाजार समितीच्या विकासाला नवी झळाळी; शेतकऱ्यांसाठी साकारले सुसज्ज ‘शेतकरी भवन’!
पत्रकार सारिका गवते सातारा जिल्हा महिला अध्यक्ष

राष्ट्रीय अध्यक्ष संपादक प्रल्हाद चव्हाण – 8208717483

1) वाई बाजार समितीच्या विकासाला नवी झळाळी; शेतकऱ्यांसाठी साकारले सुसज्ज ‘शेतकरी भवन’!
मंत्री मकरंद पाटील यांच्या हस्ते भव्य लोकार्पण; बाजार समितीची वार्षिक नफ्यातून ५० ते ५५ लाखांची भरारी, सहकार संस्थांना पुन्हा उभारी देण्याचा निर्धार.
सातारा | वाई, दि. २१ :शेतकऱ्यांच्या सुविधांना प्राधान्य देत विकासाची नवी दिशा स्वीकारलेल्या वाई कृषी उत्पन्न बाजार समितीच्या शिरपेचात आणखी एक मानाचा तुरा रोवला गेला. बाजार समितीच्या आवारात उभारण्यात आलेल्या अत्याधुनिक आणि सुसज्ज ‘शेतकरी भवन’चे लोकार्पण राज्याचे मंत्री मकरंद पाटील यांच्या हस्ते उत्साहपूर्ण वातावरणात करण्यात आले. या वास्तूमुळे बाजार समितीत येणाऱ्या शेतकऱ्यांना अधिक चांगल्या सुविधा उपलब्ध होणार असून, विकासाच्या वाटचालीतील हा महत्त्वाचा टप्पा ठरला आहे.
या सोहळ्यात बोलताना मंत्री मकरंद पाटील यांनी सहकार क्षेत्राला पुन्हा गतवैभव मिळवून देण्याचा निर्धार व्यक्त केला. विरोधकांच्या कार्यकाळात आर्थिक अडचणींमुळे डबघाईला आलेल्या सहकारी संस्थांना सक्षम करण्यासाठी प्रयत्न सुरू असून, शेतकऱ्यांच्या घामातून उभ्या राहिलेल्या संस्था पुन्हा भरभराटीला आणणे हेच आमचे ध्येय असल्याचे त्यांनी स्पष्ट केले.
वाई आणि खंडाळा तालुक्यातील सहकार क्षेत्राचा आढावा घेताना त्यांनी भुईंज व खंडाळा येथील साखर कारखाने, वाई व लोणंद बाजार समित्या आणि जनता अर्बन बँकेचा उल्लेख केला. या संस्था विविध अडचणींमधून जात असताना सत्ता परिवर्तनानंतर त्यांना पुन्हा उभारी देण्याचे काम सुरू झाले आहे. सहकारी संस्था या सर्वसामान्य शेतकरी आणि सभासदांच्या मालकीच्या असल्याने त्या सक्षमपणे चालल्या पाहिजेत, अशी भूमिका त्यांनी मांडली.
वाई बाजार समितीच्या प्रगतीचा आलेख मांडताना मंत्री पाटील म्हणाले की, २००८ मध्ये सत्तांतर झाले, त्यावेळी बाजार समितीची आर्थिक स्थिती अत्यंत नाजूक होती. शेतकऱ्यांसाठी आवश्यक सुविधांचीही कमतरता होती. मात्र, त्यानंतरच्या १८ वर्षांत पदाधिकारी आणि संचालक मंडळाने नियोजनबद्ध कारभार करत संस्थेचे चित्र बदलले. आज बाजार समितीला दरवर्षी ५० ते ५५ लाख रुपयांचा नफा होत आहे. ही प्रगती निश्चितच समाधानकारक आणि कौतुकास्पद असल्याचे त्यांनी नमूद केले.
सहकार व पणन मंत्री जयकुमार रावल यांच्या माध्यमातून सहकार क्षेत्रातील प्रलंबित प्रश्न सोडविण्यासाठी प्रयत्न केले जातील, अशी ग्वाहीही त्यांनी दिली. साखर कारखान्यांसमोर अनेक आव्हाने असतानाही काटकसरीने कारभार सुरू असल्याचे सांगत यंदाचा उसाचा दर प्रतिटन ३ हजार ८०० रुपये जाहीर केल्याची माहिती त्यांनी दिली. तसेच समाजमाध्यमांवर फिरणाऱ्या अपुऱ्या आणि दिशाभूल करणाऱ्या संदेशांवर विश्वास न ठेवण्याचे आवाहन केले.
जिल्हा उपनिबंधक संजयकुमार सुद्रिक यांनी बाजार समितीच्या कामकाजाचे कौतुक करताना कृषी क्षेत्रातील बदलांशी जुळवून घेण्याचे आवाहन केले. आधुनिक तंत्रज्ञानाचा वापर, ऑनलाइन मार्केटिंग आणि शेतकरी-व्यापाऱ्यांसाठी सक्षम ई-प्लॅटफॉर्म उभारण्याची आवश्यकता त्यांनी अधोरेखित केली. बदलत्या कृषी व्यवस्थेत बाजार समित्यांनीही आधुनिकतेची कास धरल्यास शेतकऱ्यांना अधिक व्यापक बाजारपेठ उपलब्ध होऊ शकते, असे त्यांनी सांगितले.
कार्यक्रमाच्या प्रारंभी बाजार समितीचे सभापती मोहन जाधव यांनी प्रास्ताविकातून बाजार समितीच्या विकासकामांचा आढावा घेतला. शेतकरी भवनाच्या उभारणीत महत्त्वपूर्ण योगदान दिल्याबद्दल स्थापत्य अभियंता सुनील संकपाळ, आर्किटेक्ट सचिन यादव आणि शंकर मांढरे यांचा मान्यवरांच्या हस्ते विशेष सन्मान करण्यात आला.
यावेळी उपसभापती विनायक येवले, बांधकाम समिती सभापती रमेश गायकवाड, संचालक राहुल डेरे, रवींद्र मांढरे, संजय मोहोळकर, राहुल वळकुंदे, दत्तात्रय बांदल, संगीता भणगे, नानासाहेब शिंदे, केशव गाढवे, तानाजी कचरे, पोपट जगताप, विवेक भोसले, अशोक सोनावणे, शकुंतला सावंत, सचिन फरांदे, तुकाराम जेधे आणि सचिव महेंद्र खांडे यांनी उपस्थितांचे स्वागत केले.
जिल्हा उपनिबंधक संजयकुमार सुद्रिक, राष्ट्रवादी काँग्रेसचे प्रदेश चिटणीस प्रताप पवार, तालुका उपाध्यक्ष प्रमोद शिंदे, पंचायत समिती सभापती विक्रांत डोंगरे, उपसभापती वर्षाताई जगताप, जिल्हा बँकेचे संचालक सत्यजित वीर, सहाय्यक निबंधक अनिल क्षीरसागर यांच्यासह विविध क्षेत्रांतील मान्यवर उपस्थित होते.
विठ्ठल माने यांनी सूत्रसंचालन केले, तर तानाजी कचरे यांनी आभार मानले. जिल्हा परिषद सदस्य बापूसाहेब शिंदे, वृषाली चव्हाण, दिलीप पिसाळ, महादेव मस्कर, ॲड. उदयसिंह पिसाळ, शशिकांत पवार, निशा डाळवाले, अनिल जगताप यांच्यासह शेतकरी, व्यापारी, पदाधिकारी आणि कार्यकर्ते मोठ्या संख्येने उपस्थित होते.
2) वाई:-राष्ट्रीय मल्लखांब स्पर्धेसाठी किसन वीर महाविद्यालयाचे दोन शिलेदार सज्ज!

ओम गाढवेची प्रथम, तर सई शिंदेची द्वितीय क्रमांकासह महाराष्ट्र संघात दिमाखदार निवड; तेलंगणात राष्ट्रीय स्तरावर दाखवणार कौशल्य.

वाई, दि. २१ : मल्लखांबच्या मैदानात आपल्या कौशल्याची चमक दाखवत किसन वीर कनिष्ठ महाविद्यालयाच्या दोन खेळाडूंनी राज्यस्तरावर यशाचा झेंडा फडकावला आहे. ओम महादेव गाढवे आणि सई किरण शिंदे यांनी खेलो इंडिया युथ गेम्सच्या मल्लखांब निवड चाचणीत उल्लेखनीय कामगिरी करत महाराष्ट्राच्या संघात स्थान पटकावले आहे. त्यांच्या या यशामुळे महाविद्यालयाच्या क्रीडा क्षेत्रातील लौकिकात आणखी भर पडली आहे.
पुण्यातील बालेवाडी येथे १७ व १८ नोव्हेंबर रोजी पार पडलेल्या खेलो इंडिया युथ गेम्स २०२६-२७ च्या मल्लखांब निवड चाचणीत राज्यातील ६० मुले आणि ६० मुली अशा एकूण १२० खेळाडूंनी सहभाग घेतला होता. अत्यंत चुरशीच्या या स्पर्धेत ओम गाढवे याने मुलांच्या गटात प्रथम क्रमांक मिळवला, तर सई शिंदे हिने मुलींच्या गटात द्वितीय क्रमांकाची कामगिरी केली. या यशाच्या जोरावर दोघांचीही महाराष्ट्र संघात निवड झाली आहे.
आता येत्या १९ ते २१ डिसेंबर २०२६ दरम्यान तेलंगणा येथे होणाऱ्या खेलो इंडिया युथ गेम्सच्या राष्ट्रीय मल्लखांब स्पर्धेत हे दोन्ही खेळाडू महाराष्ट्राचे प्रतिनिधित्व करणार आहेत. राष्ट्रीय स्तरावर आपल्या खेळाचा ठसा उमटवण्याची संधी त्यांना मिळाली आहे.
या खेळाडूंना महाविद्यालयाचे क्रीडा शिक्षक शिवराज तलवारे यांचे मार्गदर्शन लाभले. तसेच आंतरराष्ट्रीय प्रशिक्षक व पंच प्रसाद बेडेकर आणि राष्ट्रीय प्रशिक्षक व राज्यस्तरीय पंच प्रसाद गोळे यांनी खेळाडूंच्या सरावासाठी आणि कौशल्यविकासासाठी विशेष मेहनत घेतली.
या दुहेरी यशाबद्दल जनता शिक्षण संस्थेचे अध्यक्ष मदनदादा भोसले, सचिव डॉ. जयवंत चौधरी, संचालक मंडळ, महाविद्यालयाचे प्राचार्य डॉ. गुरुनाथ फगरे, उपप्राचार्य श्रावण पवार, पर्यवेक्षक डॉ. विलास खंडाईत यांच्यासह प्राध्यापक, शिक्षक व शिक्षकेतर कर्मचाऱ्यांनी खेळाडू आणि प्रशिक्षकांचे अभिनंदन केले. आगामी राष्ट्रीय स्पर्धेतही महाराष्ट्राचा नावलौकिक उंचावावा, अशा शुभेच्छा त्यांना देण्यात आल्या.
3) वाई:-बेंदवस्तीत भटक्या कुत्र्यांचा उच्छाद; चार गाभण शेळ्यांचा दुर्दैवी मृत्यू!

कृष्णा नदीकाठच्या शेतात कुत्र्यांचा हल्ला; शेतकरी मनोज टिके यांचे ६० हजारांचे नुकसान, पशुपालकांमध्ये भीती.
सातारा | वाई, दि. २१ : कडेगाव येथील कृष्णा नदीकाठच्या बेंदवस्ती परिसरात भटक्या कुत्र्यांनी धुमाकूळ घालत चार गाभण शेळ्यांवर हल्ला करून त्यांना ठार केल्याची घटना उघडकीस आली आहे. या हल्ल्यात शेतकरी मनोज रामदास टिके (वय ५०, रा. कडेगाव) यांचे सुमारे ६० हजार रुपयांचे आर्थिक नुकसान झाले आहे. या घटनेमुळे परिसरातील पशुपालक शेतकऱ्यांमध्ये चिंतेचे वातावरण पसरले आहे.
मनोज टिके यांनी नेहमीप्रमाणे सकाळी साडेआठच्या सुमारास ऊस तोडून रिकाम्या झालेल्या शेतात आपल्या चार शेळ्या चरण्यासाठी सोडल्या होत्या. त्यानंतर ते शेजारील शेतातील घराकडे गेले. मात्र, या दरम्यान भटक्या कुत्र्यांनी शेळ्यांवर हल्ला केला. सकाळी दहाच्या सुमारास टिके शेतात परतले असता चारही शेळ्या अर्धवट खाल्लेल्या अवस्थेत मृत पडल्याचे दिसून आले. हे दृश्य पाहून त्यांना मोठा धक्का बसला.
घटनेची माहिती मिळताच वनरक्षक शुभम पाटील यांनी पथकासह घटनास्थळी भेट देऊन पाहणी केली. परिसरातील प्राण्यांच्या पायांचे ठसे तपासण्यात आले. पशुवैद्यकीय अधिकाऱ्यांनी मृत शेळ्यांचे शवविच्छेदन केले. प्राथमिक तपासणीनंतर हा हल्ला बिबट्याचा नसून भटक्या कुत्र्यांनी केल्याचे वनविभागाच्या पथकाने स्पष्ट केले.
विशेष म्हणजे हल्ल्यात मृत झालेल्या चारही शेळ्या गाभण होत्या. त्यामुळे टिके यांचे नुकसान केवळ जनावरांच्या किमतीपुरते मर्यादित राहिले नसून भविष्यात मिळणाऱ्या उत्पन्नावरही मोठा परिणाम झाला आहे. आधीच शेती आणि पशुपालन व्यवसाय अनेक अडचणींचा सामना करत असताना अशा घटनांमुळे शेतकऱ्यांच्या आर्थिक अडचणीत आणखी भर पडत आहे.
दरम्यान, बेंदवस्ती आणि कृष्णा नदीकाठच्या परिसरात भटक्या कुत्र्यांचा वाढता उपद्रव हा गंभीर चिंतेचा विषय बनला आहे. या कुत्र्यांचा तातडीने बंदोबस्त करावा, पशुधनाच्या संरक्षणासाठी उपाययोजना कराव्यात आणि नुकसानग्रस्त शेतकरी मनोज टिके यांना योग्य आर्थिक मदत मिळवून द्यावी, अशी मागणी परिसरातील नागरिक आणि पशुपालक शेतकऱ्यांकडून होत आहे.
4) वाई:-दसवडीत स्वामीभक्तीचा जागर! नूतन श्री स्वामी समर्थ मठाचे दिमाखात लोकार्पण.

मूर्ती प्राणप्रतिष्ठा आणि कलशस्थापनेचा मंगल सोहळा उत्साहात; पंचक्रोशीतील भाविकांची दर्शनासाठी अलोट गर्दी.
सातारा | वाई, दि. २१ :श्री शंकर महाराज प्रकट दिनाचे औचित्य साधत दसवडी येथे नव्याने उभारण्यात आलेल्या श्री स्वामी समर्थ मठाचा लोकार्पण सोहळा धार्मिक उत्साहात आणि भक्तिमय वातावरणात संपन्न झाला. मूर्ती प्राणप्रतिष्ठा, कलशस्थापना आणि विविध धार्मिक विधींनी संपूर्ण दसवडी नगरी स्वामीमय झाली. या मंगल सोहळ्यास पंचक्रोशीतील भाविकांनी मोठ्या संख्येने उपस्थित राहून श्री स्वामी समर्थांचे दर्शन घेतले.
नूतन मठाच्या लोकार्पणानिमित्त आयोजित एकदिवसीय धार्मिक महोत्सवात मंत्रोच्चार, पूजाविधी आणि विधिवत प्राणप्रतिष्ठा सोहळा पार पडला. भक्तांच्या श्रद्धा आणि सामूहिक प्रयत्नांतून साकारलेल्या या मठामुळे परिसरातील स्वामीभक्तांना आता आध्यात्मिक उपासना, नामस्मरण आणि साधनेसाठी हक्काचे स्थान उपलब्ध झाले आहे.
या सोहळ्याला वाई पंचायत समितीचे सभापती विक्रांत डोंगरे, उपसभापती वर्षा जगताप, जिल्हा परिषद सदस्य बाबूसाहेब शिंदे, पंचायत समिती सदस्य शैलेश सपकाळ, आनंद चिरगुटे, राजेंद्र शेलार, दसवडीचे सरपंच सुनील फणसे, मयूर चव्हाण, केतन मराठे, प्रशांत थोरवे आणि संदीप मानकुंबरे यांची प्रमुख उपस्थिती होती.
यावेळी निलेश फणसे, रंजित फणसे, योगेश फणसे, सुरेश फणसे, रणजित फणसे, भगवान फणसे, अर्जुन फणसे, दत्तू फणसे, जयसिंग फणसे, शंकर फणसे, रोहिदास फणसे, महादेव फणसे, गेणुबा फणसे, कृष्णदेव फणसे, प्रवीण फणसे, दीपक फणसे यांच्यासह ग्रामस्थ, मान्यवर आणि पंचक्रोशीतील स्वामीभक्त मोठ्या संख्येने उपस्थित होते.
लोकार्पण सोहळ्यानंतर भाविकांनी श्री स्वामी समर्थांचे दर्शन घेतले. उपस्थितांसाठी महाप्रसादाचे आयोजन करण्यात आले होते. भक्ती, श्रद्धा आणि एकोप्याच्या भावनेतून उभारलेला हा नूतन मठ आगामी काळात दसवडीसह पंचक्रोशीतील भाविकांसाठी श्रद्धा आणि आध्यात्मिक ऊर्जेचे महत्त्वपूर्ण केंद्र ठरणार असल्याची भावना यावेळी व्यक्त करण्यात आली.





