सातारा:-स्वकुळ साळी समाजाच्या एकजुटीचा साताऱ्यात जागर; भव्य मेळाव्याने दिला संघटनशक्तीला नवा आयाम.
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
सातारा:-स्वकुळ साळी समाजाच्या एकजुटीचा साताऱ्यात जागर; भव्य मेळाव्याने दिला संघटनशक्तीला नवा आयाम.
सुकाणू समिती सदस्यांच्या मार्गदर्शनाखाली आणि राज्यस्तरीय पदाधिकाऱ्यांच्या सन्माननीय उपस्थितीत मेळावा; नवनिर्वाचित जिल्हा कार्यकारिणीचा सत्कार.
सातारा | दि. ५ : “एकीच्या धाग्यातून समाजाची ताकद, संघटनेच्या बळातून प्रगतीची वाट आणि संस्कृतीच्या जतनातून उज्ज्वल भविष्य…” या भावनेला प्रत्यक्ष रूप देत स्वकुळ साळी समाज बांधवांचा भव्य जिल्हा मेळावा रविवार, दि. ४ ऑक्टोबर रोजी सातारा येथील गुलबहार हॉटेलमध्ये उत्साहपूर्ण वातावरणात संपन्न झाला. सुकाणू समिती सदस्यांच्या मार्गदर्शनाखाली आणि राज्यस्तरीय पदाधिकाऱ्यांच्या सन्माननीय उपस्थितीत झालेल्या या मेळाव्याला जिल्ह्याच्या विविध भागांतून समाजबांधवांचा उत्स्फूर्त प्रतिसाद लाभला. एकत्र आलेल्या समाजबांधवांच्या उपस्थितीने “एकजूट, संघटन आणि समाजहित” या त्रिसूत्रीचा प्रभावी संदेश दिला.
कार्यक्रमात नवनिर्वाचित सातारा जिल्हा कार्यकारिणीतील महिला व पुरुष पदाधिकाऱ्यांचा सत्कार करण्यात आला. राज्यस्तरीय पदाधिकाऱ्यांच्या हस्ते झालेल्या या सत्कार सोहळ्यात नवनिर्वाचित पदाधिकाऱ्यांना त्यांच्या पुढील सामाजिक वाटचालीसाठी शुभेच्छा देण्यात आल्या. समाजाच्या संघटनात्मक वाटचालीची जबाबदारी स्वीकारलेल्या सर्व पदाधिकाऱ्यांनी एकजुटीने, समन्वयाने आणि समाजहिताला प्राधान्य देत कार्य करावे, असे आवाहन यावेळी करण्यात आले.
कार्यक्रमाला अखिल महाराष्ट्र साळी समाज अधिवेशनाचे अध्यक्ष उदय दुधाने यांची प्रमुख उपस्थिती होती. यावेळी त्यांनी दि. २६ व २७ डिसेंबर रोजी कोल्हापूर येथे होणाऱ्या अखिल महाराष्ट्र साळी समाज अधिवेशनाची माहिती दिली. या अधिवेशनाला राज्यभरातील समाजबांधवांनी मोठ्या संख्येने उपस्थित राहावे तसेच अधिवेशनाच्या यशस्वी आयोजनासाठी सढळ हाताने आर्थिक मदत करावी, असे आवाहन त्यांनी केले.
यावेळी आपल्या अष्टपैलू नेतृत्वातून युवकांमध्ये तसेच समाजामध्ये नवचैतन्य निर्माण करणारे जिव्हेश्वर सांस्कृतिक विकास मंचाचे अध्यक्ष मा. श्री. विवेकजी ठोके यांची महाराष्ट्र युवक संघाच्या अध्यक्षपदी नियुक्ती झाल्याबद्दल त्यांचे हार्दिक अभिनंदन करण्यात आले. त्यांच्या निवडीबद्दल उपस्थित समाजबांधवांनी आनंद व्यक्त करून पुढील सामाजिक वाटचालीसाठी शुभेच्छा दिल्या.
मेळाव्यात समाजाच्या सर्वांगीण प्रगतीसाठी एकजूट अधिक मजबूत करण्याची गरज व्यक्त करण्यात आली. युवकांचा सक्रिय सहभाग, सामाजिक उपक्रमांना चालना, संस्कृती व परंपरांचे जतन तसेच समाजहिताच्या विविध उपक्रमांना व्यापक स्वरूप देण्याबाबत विचारमंथन झाले.
जिल्ह्याच्या विविध भागांतून आलेल्या समाजबांधवांनी एकत्र येत मेळाव्याची शोभा वाढविली. उपस्थित राहून, सहकार्य करून, आपुलकीने वेळ देऊन आणि कार्यक्रमाच्या यशस्वीतेत योगदान देणाऱ्या प्रत्येक समाजबांधवांचे आयोजकांच्या वतीने मनःपूर्वक आभार मानण्यात आले.
“आपली एकजूट हीच आपली खरी ताकद असून, समाजहिताची वाटचाल हीच आपली संपदा आहे. ही एकी अशीच कायम राहो आणि समाजाच्या प्रगतीची नवी क्षितिजे खुलत राहोत,” अशी भावना यावेळी व्यक्त करण्यात आली.
मेळाव्याच्या यशस्वी आयोजनासाठी सातारा जिल्हा महिला अध्यक्ष सौ. शैलजा जयवंत ठोके, सातारा जिल्हा अध्यक्ष श्री. महेशजी पागडे, जिव्हेश्वर सांस्कृतिक विकास मंचाचे अध्यक्ष मा. श्री. विवेकजी ठोके तसेच सर्व महिला व पुरुष कार्यकारिणी मंडळाने परिश्रम घेतले.
साताऱ्यातील या मेळाव्यामुळे समाजबांधवांमध्ये नवचैतन्य निर्माण झाले असून, आता २६ व २७ डिसेंबर रोजी कोल्हापूर येथे होणाऱ्या अखिल महाराष्ट्र साळी समाज अधिवेशनासाठी समाजबांधव सज्ज झाले आहेत.
