पुसेसावळी:-(खटाव)-“योगातून निरोगी जीवनाचा मंत्र” : राहुल सावंत इंग्लिश मीडियम स्कूलमध्ये आंतरराष्ट्रीय योग दिन उत्साहात साजरा.
पत्रकार विनोद पाटील सातारा जिल्हा अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
“योगातून निरोगी जीवनाचा मंत्र” : राहुल सावंत इंग्लिश मीडियम स्कूलमध्ये आंतरराष्ट्रीय योग दिन उत्साहात साजरा.
पुसेसावळी (खटाव ):-
राहुल सावंत इंग्लिश मीडियम स्कूल, थोरवेवाडी (पुसेसावळी) येथे २१ जून रोजी आंतरराष्ट्रीय योग दिन उत्साहपूर्ण आणि प्रेरणादायी वातावरणात साजरा करण्यात आला. विद्यार्थ्यांमध्ये योगाबाबत जागरूकता निर्माण करण्याच्या उद्देशाने आयोजित करण्यात आलेल्या या कार्यक्रमात विद्यार्थ्यांनी विविध योगासने आणि प्राणायामाचे प्रभावी सादरीकरण करून उपस्थितांची मने जिंकली.
कार्यक्रमाच्या अध्यक्षस्थानी शाळेचे प्रिन्सिपल क्षीरसागर सर होते, सुपरवायझर कविता भोसले मॅडम यांची प्रमुख उपस्थिती लाभली. यावेळी त्यांनी विद्यार्थ्यांना योगाचे शारीरिक, मानसिक, बौद्धिक आणि आध्यात्मिक महत्त्व समजावून सांगितले. आजच्या धकाधकीच्या जीवनात योग हा तणावमुक्त, निरोगी आणि आनंदी जीवन जगण्याचा प्रभावी मार्ग असल्याचे त्यांनी नमूद केले.
विद्यार्थ्यांनी ताडासन, वृक्षासन, भुजंगासन, वज्रासन, पद्मासन, अनुलोम-विलोम, कपालभाती आदी योगप्रकारांचे प्रात्यक्षिक सादर केले. नियमित योगाभ्यासामुळे शरीर लवचिक व सुदृढ राहते, मन शांत होते, स्मरणशक्ती आणि एकाग्रता वाढते तसेच विद्यार्थ्यांच्या सर्वांगीण विकासाला चालना मिळते, हे यावेळी प्रत्यक्ष कृतीतून दाखवून देण्यात आले.
यावेळी विद्यार्थ्यांना मार्गदर्शन करताना “करू योग, राहू निरोग” हा संदेश देण्यात आला. तसेच योगामुळे केवळ शारीरिक तंदुरुस्तीच नव्हे, तर मानसिक स्थैर्य, आत्मविश्वास आणि सकारात्मक दृष्टिकोन विकसित होतो, असे सांगण्यात आले.
कार्यक्रमात पुढील प्रेरणादायी ओळींनी सर्वांचे लक्ष वेधून घेतले.
*”योग आहे आरोग्याची गुरुकिल्ली,*
*योगातूनच मिळते जीवनाला नवी झळाळी.”*
तसेच,
“शरीर सुदृढ, मन प्रसन्न,
योगाने जीवन होते धन्य.”
आजच्या मोबाईल आणि तंत्रज्ञानाच्या युगात विद्यार्थ्यांनी दररोज काही वेळ योगासाठी दिल्यास त्यांचे शारीरिक व मानसिक आरोग्य अधिक सक्षम राहील, असा विश्वास उपस्थित मान्यवरांनी व्यक्त केला. योग हा भारताने जगाला दिलेला अमूल्य वारसा असून संपूर्ण जगाने त्याचा स्वीकार केला आहे, याचा अभिमानही यावेळी व्यक्त करण्यात आला.
कार्यक्रमास शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते. शेवटी सर्वांनी नियमित योग करण्याचा संकल्प करून निरोगी जीवनाचा संदेश समाजापर्यंत पोहोचविण्याचे आवाहन करण्यात आले.
*”योग म्हणजे केवळ व्यायाम नव्हे, तर निरोगी, संतुलित आणि यशस्वी जीवन जगण्याची एक जीवनशैली आहे.”*
