कराड:-महायुतीत बिघाडी? विधान परिषद निवडणुकीवरून शंभुराज देसाईंचा भाजपला इशारा! “असाच प्रतिसाद राहिला तर आम्हालाही वेगळा विचार करावा लागेल”; कराडच्या बैठकीवरून नाराजी उघड.
पत्रकार सारिका गवते वाई तालुका महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) कराड:-महायुतीत बिघाडी? विधान परिषद निवडणुकीवरून शंभुराज देसाईंचा भाजपला इशारा!
“असाच प्रतिसाद राहिला तर आम्हालाही वेगळा विचार करावा लागेल”; कराडच्या बैठकीवरून नाराजी उघड.
कराड दि. १६ : सातारा-सांगली स्थानिक स्वराज्य संस्था मतदारसंघाच्या विधान परिषद निवडणुकीच्या पार्श्वभूमीवर महायुतीत अंतर्गत मतभेद उफाळून आल्याचे संकेत मिळत आहेत. विशेषतः भाजप आणि शिवसेना (शिंदे गट) यांच्यातील तणाव आता उघडपणे समोर येऊ लागला असून, राज्याचे पर्यटन व खनिकर्म मंत्री शंभुराज देसाई यांनी भाजपला थेट इशारा दिला आहे.
“तुमचा असाच प्रतिसाद असेल तर आम्हालाही वेगळा विचार करावा लागेल. निर्माण होणाऱ्या परिस्थितीला भाजपलाच सामोरे जावे लागेल,” अशा शब्दांत देसाईंनी आपली नाराजी व्यक्त केली. त्यामुळे महायुतीतील समन्वयाबाबत प्रश्नचिन्ह निर्माण झाले आहे.
१३ जून रोजी कराड येथे सातारा-सांगली विधान परिषद निवडणुकीसंदर्भात महायुतीच्या समन्वय समितीची बैठक आयोजित करण्यात आली होती. या बैठकीला भाजपचे वरिष्ठ नेते व मंत्री उपस्थित होते. मात्र, शिवसेना (शिंदे गट) आणि राष्ट्रवादी काँग्रेस (अजित पवार गट) यांच्या प्रमुख नेत्यांची अनुपस्थिती चर्चेचा विषय ठरली.
या बैठकीकडे शंभुराज देसाई यांनी पाठ फिरवल्याने राजकीय वर्तुळात विविध तर्क-वितर्कांना उधाण आले आहे. उमेदवारी, जागावाटप आणि स्थानिक पातळीवरील राजकीय समीकरणांवरून महायुतीतील घटक पक्षांमध्ये नाराजी असल्याची चर्चा रंगू लागली आहे.
दरम्यान, देसाई यांच्या वक्तव्यामुळे सातारा-सांगली विधान परिषद निवडणुकीच्या पार्श्वभूमीवर महायुतीतील अंतर्गत संघर्ष अधिक तीव्र होण्याची शक्यता व्यक्त केली जात आहे. आगामी काळात भाजप आणि मित्रपक्ष यांच्यातील समन्वय कसा राखला जातो, याकडे राजकीय वर्तुळाचे लक्ष लागले आहे.
2) पाटण:-बैलगाडीतून ‘शाही’ स्वागत; पालकमंत्र्यांचा विद्यार्थ्यांशी थेट संवाद, मरळी शाळेचा पहिला दिवस ठरला संस्मरणीय!
पाटण |
शाळेचा पहिला दिवस म्हटला की अनेक विद्यार्थ्यांच्या मनात भीती, संकोच आणि उत्सुकता असते. मात्र पाटण तालुक्यातील मरळी येथील जिल्हा परिषद शाळेत पहिल्याच दिवशी विद्यार्थ्यांचे असे काही स्वागत करण्यात आले की, हा दिवस त्यांच्या कायम स्मरणात राहणार आहे.
‘बॅक टू स्कूल’ उपक्रमांतर्गत विद्यार्थ्यांचे पारंपरिक पद्धतीने बैलगाडीतून शाळेत आगमन करण्यात आले. फुले, फुगे आणि आकर्षक सजावटीने नटलेल्या बैलगाड्यांमधून चिमुकल्यांनी शाळेत प्रवेश केला. ढोल-ताशांच्या गजरात आणि आनंदोत्सवाच्या वातावरणात झालेल्या या स्वागत सोहळ्याने उपस्थित पालक, ग्रामस्थ आणि विद्यार्थ्यांचे मन जिंकले.
या कार्यक्रमाला सातारा जिल्ह्याचे पालकमंत्री शंभूराज देसाई यांनी विशेष उपस्थिती लावली. त्यांनी विद्यार्थ्यांशी थेट संवाद साधत त्यांच्या शैक्षणिक प्रगतीची माहिती घेतली. मुलांनीही आत्मविश्वासाने दिलेल्या उत्तरांनी पालकमंत्री प्रभावित झाले. ग्रामीण भागातील विद्यार्थ्यांमधील गुणवत्ता आणि आत्मविश्वासाचे त्यांनी विशेष कौतुक केले.
यावेळी बोलताना त्यांनी, “शिक्षण हे उज्ज्वल भविष्यासाठीचे सर्वात मोठे सामर्थ्य आहे. विद्यार्थ्यांनी मनापासून शिक्षण घेत आपल्या कुटुंबासह गाव आणि राज्याचे नाव उज्ज्वल करावे,” असे आवाहन केले.
पहिल्याच दिवशी विद्यार्थ्यांना मोफत पाठ्यपुस्तकांचे वाटप करण्यात आले तसेच गुलाबपुष्प देऊन त्यांचे स्वागत करण्यात आले. राज्याचे मंत्री शाळेत आल्याने मरळी गावात उत्सवाचे वातावरण निर्माण झाले होते.
या कार्यक्रमास मुख्याध्यापक, शिक्षकवृंद, अंगणवाडी सेविका, शाळा व्यवस्थापन समितीचे पदाधिकारी, ग्रामस्थ, पालक आणि मोठ्या संख्येने नागरिक उपस्थित होते. मरळी जिल्हा परिषद शाळेच्या या अनोख्या स्वागत सोहळ्याची चर्चा सध्या संपूर्ण पाटण तालुक्यात रंगत आहे.
3) कराड:-कृष्णा’च्या हितासाठी महाडीक कुटुंबाची ‘सहकार पॅनल’ला ठाम साथ!
पेठ नाका येथे सभासद संवाद मेळाव्यात राहुल महाडीक यांचा निर्धार.
कराड | प्रतिनिधी
यशवंतराव मोहिते कृष्णा सहकारी साखर कारखाना, रेठरे बुद्रुकच्या पंचवार्षिक निवडणुकीच्या पार्श्वभूमीवर पेठ नाका येथील वनश्री नानासाहेब महाडीक शैक्षणिक संकुलात आयोजित करण्यात आलेला भव्य सभासद संवाद मेळावा उत्साहपूर्ण वातावरणात पार पडला. या मेळाव्यात बोलताना सांगली जिल्हा मध्यवर्ती सहकारी बँकेचे संचालक राहुल महाडीक यांनी, कारखान्याच्या हितासाठी महाडीक कुटुंब व सर्व सभासद ‘जयवंतराव भोसले सहकार पॅनल’च्या पाठीशी खंबीरपणे उभे असल्याचा विश्वास व्यक्त केला.
मेळाव्याला कारखान्याचे चेअरमन डॉ. सुरेश भोसले यांच्यासह अनेक मान्यवरांची उपस्थिती होती. सभासदांना मार्गदर्शन करताना राहुल महाडीक म्हणाले, “डॉ. सुरेशबाबा भोसले यांच्या नेतृत्वाखाली कारखान्याचा कारभार पारदर्शक, सक्षम आणि शेतकरीहिताचा राहिला आहे. कारखान्याची विकासाची घोडदौड कायम ठेवण्यासाठी ‘जयवंतराव भोसले सहकार पॅनल’ला विक्रमी मतांनी विजयी करण्याचा निर्धार आम्ही केला आहे.”
या मेळाव्यात वाळवा तालुक्यातील अनेक प्रमुख नेते, पदाधिकारी आणि कार्यकर्त्यांनी सहभाग घेतला. तसेच विविध गावांतील शेकडो सभासद आणि महायुतीचे कार्यकर्ते मोठ्या संख्येने उपस्थित होते.
मेळाव्यानंतर परिसरात ‘सहकार पॅनल’च्या बाजूने सकारात्मक आणि उत्साही वातावरण निर्माण झाल्याची चर्चा सभासदांमध्ये रंगली. निवडणुकीच्या पार्श्वभूमीवर झालेल्या या शक्तिप्रदर्शनामुळे कारखाना निवडणुकीतील राजकीय समीकरणांकडे सर्वांचे लक्ष लागले आहे.
4) कराड:-बहेत ‘सहकार पॅनेल’ची शक्तिप्रदर्शन सभा; सभासदांचा उत्स्फूर्त सहभाग
कारखान्याच्या विकासाची ग्वाही; ‘कपबशी’ चिन्हाला भरघोस मतांनी विजयी करण्याचे आवाहन.
कराड दि. १६ : यशवंतराव मोहिते कृष्णा सहकारी साखर कारखाना निवडणूक २०२६ च्या प्रचाराचा जोर वाढत असताना बहे येथे आयोजित करण्यात आलेल्या सहकार पॅनेलच्या जाहीर सभेला सभासद, ऊस उत्पादक शेतकरी आणि कार्यकर्त्यांनी मोठ्या संख्येने उपस्थिती लावली. उत्साहपूर्ण वातावरणात झालेल्या या सभेत कारखान्याच्या प्रगतीचा आढावा घेण्यात आला तसेच आगामी काळातील विकासाची दिशा मांडण्यात आली.
सभेत बोलताना प्रमुख वक्त्यांनी कृष्णा कारखान्याने नेहमीच सभासद, शेतकरी आणि कामगारांच्या हिताला प्राधान्य दिल्याचे सांगितले. पारदर्शक प्रशासन, नियोजनबद्ध कारभार आणि विकासाभिमुख धोरणांमुळे कारखान्याने सहकार क्षेत्रात वेगळी ओळख निर्माण केल्याचा दावा त्यांनी केला. सभासदांचा विश्वास आणि शेतकरी-कामगारांचे योगदान हेच कारखान्याच्या यशामागील खरे बळ असल्याचेही त्यांनी नमूद केले.
यावेळी उपस्थित सभासद व कार्यकर्त्यांनी कारखान्याची प्रगती कायम राखण्यासाठी आणि सहकाराची परंपरा अधिक बळकट करण्यासाठी ‘कपबशी’ चिन्हासमोर शिक्का मारून सहकार पॅनेलला मोठ्या मताधिक्याने विजयी करण्याचा निर्धार व्यक्त केला.
बहे व परिसरातील शेकडो सभासद, शेतकरी, पदाधिकारी आणि युवक कार्यकर्ते सभेला उपस्थित होते. नेत्यांच्या भाषणांना उपस्थितांनी टाळ्यांच्या कडकडाटात प्रतिसाद दिला. सभेतील उत्साह आणि मोठी गर्दी पाहता निवडणुकीत सहकार पॅनेलची ताकद वाढल्याचे चित्र दिसून आले.
5) कराडात मनरेगा कामांकडे दुर्लक्ष?; अपूर्ण कामे रखडली, नव्या पाणंद रस्त्यांवर भर असल्याचा आरोप.
कराड दि. १६ : महात्मा गांधी राष्ट्रीय रोजगार हमी योजना (मनरेगा) अंतर्गत सुरू असलेली जुनी व अपूर्ण कामे प्राधान्याने पूर्ण करण्याचे शासनाचे निर्देश असतानाही कराड तालुक्यात अनेक कामे रखडल्याची चर्चा सुरू आहे. अशा परिस्थितीत विविध गावांमध्ये नव्या पाणंद रस्त्यांच्या कामांना प्राधान्य दिले जात असल्याचा आरोप नागरिकांकडून करण्यात येत आहे.
केंद्र शासनाच्या ग्रामीण विकास मंत्रालयाच्या सूचनांनुसार १ जुलैपासून रोजगार हमी योजनेची अंमलबजावणी नव्या स्वरूपात होणार आहे. त्याआधी प्रलंबित कामे पूर्ण करण्यावर भर देण्याचे आदेश देण्यात आले होते. मात्र, कराड तालुक्यात वैयक्तिक आणि सार्वजनिक स्वरूपातील अनेक कामे अद्याप अपूर्ण असल्याचे सांगितले जात आहे.
नागरिकांच्या मते, जुनी कामे पूर्ण करण्याऐवजी नव्या पाणंद रस्त्यांची कामे मोठ्या प्रमाणावर सुरू करण्यात येत आहेत. त्यामुळे प्राधान्यक्रमाबाबत प्रश्न उपस्थित होत असून, संबंधित विभागांच्या कार्यपद्धतीवरही चर्चा रंगू लागली आहे.
यासंदर्भात पंचायत समिती स्तरावर संबंधित कामांना मंजुरी आहे का, तसेच सार्वजनिक बांधकाम विभाग आणि महसूल प्रशासनाच्या माध्यमातून ही कामे कोणत्या प्रक्रियेनुसार राबवली जात आहेत, याबाबतही नागरिकांकडून स्पष्टीकरणाची मागणी केली जात आहे. या प्रकरणाची सखोल चौकशी करून वस्तुस्थिती समोर आणावी, अशी मागणी होत आहे.
परिपत्रकांकडे दुर्लक्ष करून नव्या कामांना प्राधान्य?
तालुक्यात सुरू असलेल्या काही नव्या कामांबाबत स्थानिक स्तरावर विविध चर्चा सुरू आहेत. शासनाच्या निर्देशानुसार अपूर्ण कामे पूर्ण करण्यावर भर अपेक्षित असताना नव्या कामांना प्राधान्य दिले जात असल्याचा आरोप नागरिकांकडून करण्यात येत आहे. यामागील कारणे आणि प्रक्रिया स्पष्ट करण्याची मागणी होत आहे.
१ जुलैपासून नवे स्वरूप; प्रलंबित कामांबाबत चिंता
केंद्र शासनाच्या निर्णयानुसार १ जुलैपासून ग्रामीण रोजगार हमी योजनेची अंमलबजावणी नव्या स्वरूपात होणार आहे. त्यामुळे सध्या सुरू असलेली अपूर्ण कामे वेळेत पूर्ण न झाल्यास निधी आणि प्रशासकीय प्रक्रियेवर परिणाम होण्याची शक्यता व्यक्त केली जात आहे. यामुळे संबंधित विभागांनी प्रलंबित कामांकडे तातडीने लक्ष देण्याची मागणी होत आहे.
6) कराड:-मोठी स्वप्ने पाहा, मोबाईल-टीव्हीचा ज्ञानासाठी वापर करा! — शिक्षणाधिकारी धनंजय चोपडे.
कोळे येथील श्री संत गाडगेनाथ हायस्कूलमध्ये प्रवेशोत्सव उत्साहात.
कराड, दि. १६ : विद्यार्थ्यांनी मोठी स्वप्ने पाहून ती पूर्ण करण्यासाठी जिद्द, चिकाटी आणि कठोर परिश्रमांची जोड द्यावी. आजच्या डिजिटल युगात टीव्ही आणि मोबाईल ही केवळ मनोरंजनाची नव्हे तर ज्ञानाची प्रभावी साधने आहेत. त्यांचा योग्य आणि मर्यादित वापर विद्यार्थ्यांच्या प्रगतीसाठी होणे गरजेचे आहे, असे प्रतिपादन सातारा जिल्ह्याचे माध्यमिक शिक्षणाधिकारी धनंजय चोपडे यांनी केले.
कोळे (ता. कराड) येथील श्री संत गाडगेनाथ हायस्कूलमध्ये आयोजित प्रवेशोत्सव कार्यक्रमात ते प्रमुख मार्गदर्शक म्हणून बोलत होते.
कार्यक्रमाच्या सुरुवातीला नव्याने प्रवेश घेतलेल्या विद्यार्थ्यांचे ढोल-लेझीमच्या गजरात आणि उत्साहपूर्ण वातावरणात स्वागत करण्यात आले. विद्यार्थ्यांना पेन, फुले व पेढे देऊन त्यांच्या शैक्षणिक प्रवासासाठी शुभेच्छा देण्यात आल्या. शाळेच्या पहिल्याच दिवशी विद्यार्थ्यांमध्ये आनंदाचे वातावरण निर्माण व्हावे यासाठी उभारण्यात आलेला आकर्षक सेल्फी पॉइंट विशेष लक्षवेधी ठरला.
यावेळी मार्गदर्शन करताना चोपडे म्हणाले, “आज शाळेच्या बाकावर बसलेला विद्यार्थी उद्या शिक्षणाधिकारी, तहसीलदार, फौजदार किंवा जिल्हाधिकारी होऊ शकतो. त्यासाठी आजपासूनच मोठे ध्येय निश्चित करून वेळेचे योग्य नियोजन करणे आवश्यक आहे.” मोबाईल आणि टीव्हीच्या वापराबाबत त्यांनी विद्यार्थी व पालकांना सजग राहण्याचे आवाहन केले. स्पर्धा परीक्षा, ज्ञानवृद्धी आणि शैक्षणिक प्रगतीसाठी या साधनांचा अधिकाधिक उपयोग करण्याचा सल्लाही त्यांनी दिला.
या कार्यक्रमाला सातारा जिल्ह्याचे प्राथमिक शिक्षणाधिकारी अनिस नायकवडी, शिक्षण विस्तार अधिकारी जमीला मुलाणी, केंद्रप्रमुख आनंदा धायगुडे, कराड पंचायत समितीचे नवनिर्वाचित सदस्य अर्जुन कराळे, शाळा व्यवस्थापन समितीचे अध्यक्ष प्रशांत भिसे, ज्येष्ठ शिक्षणतज्ज्ञ पुजारी सर तसेच कनवटे सर यांच्यासह अनेक मान्यवर उपस्थित होते.
शिक्षणाधिकाऱ्यांच्या प्रेरणादायी मार्गदर्शनामुळे विद्यार्थी, पालक आणि शिक्षकांमध्ये नवचैतन्य निर्माण झाल्याचे चित्र पाहायला मिळाले.
कार्यक्रमाचे सूत्रसंचालन सविता कदम यांनी केले. मुख्याध्यापक डाळे सर यांनी उपस्थित मान्यवरांचे स्वागत केले, तर आभार प्रदर्शनाने कार्यक्रमाची सांगता झाली.
