ब्रेकिंग न्यूज:-शिरूर बायपासवर भीषण तिहेरी अपघात! एन्डेवर, कंटेनर अन् ‘शिवाई’ बसची विचित्र धडक; उद्योजकासह आयटी अभियंत्याचा जागीच मृत्यू.
पत्रकार गणेश बोऱ्हाडे शिरूर तालुका अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
शिरूर बायपासवर भीषण तिहेरी अपघात!
एन्डेवर, कंटेनर अन् ‘शिवाई’ बसची विचित्र धडक; उद्योजकासह आयटी अभियंत्याचा जागीच मृत्यू.
शिरूर | प्रतिनिधी
पुणे-अहिल्यानगर महामार्गावरील शिरूर शहराबाहेरील बायपास रस्त्यावर पाषाण मळा आणि हॉटेल संग्रामसमोर आज सायंकाळी पाचच्या सुमारास भीषण तिहेरी अपघात झाला. यु-टर्न घेणाऱ्या एन्डेवर मोटारीला भरधाव कंटेनरने मागून जोरदार धडक दिल्यानंतर एन्डेवर, दुचाकी आणि ‘शिवाई’ बस यांच्यात विचित्र साखळी अपघात झाला. या दुर्घटनेत एन्डेवर चालक उद्योजक किशोर नामदेव यादव आणि दुचाकीस्वार आयटी अभियंता प्रथमेश प्रकाश लाड यांचा जागीच दुर्दैवी मृत्यू झाला.
मृतांची ओळख
या भीषण अपघातात मृत्यू झालेल्यांची नावे पुढीलप्रमाणे आहेत—
🔴 किशोर नामदेव यादव (वय ३८) — व्यावसायिक व उद्योजक, रा. वाडेगव्हाण, ता. पारनेर, जि. अहिल्यानगर. ते वाडेगव्हाणच्या सरपंच प्रियांका यादव यांचे पती होते.
🔴 प्रथमेश प्रकाश लाड (वय ३०) — आयटी कंपनीतील अभियंता, मूळ रा. कुंडल, ता. पलूस, जि. सांगली; सध्या रा. सुंदर सृष्टी, शिरूर.
नेमका अपघात कसा घडला?
मिळालेल्या माहितीनुसार, किशोर यादव हे आपल्या एन्डेवर मोटारीतून (MH 12 SU 5589) कामानिमित्त शिरूर येथे आले होते. काम आटोपून ते वाडेगव्हाणच्या दिशेने परतत असताना हॉटेल संग्रामसमोरील दुभाजकावरून यु-टर्न घेण्याचा प्रयत्न करीत होते.
याचवेळी दुभाजकाजवळ प्रथमेश लाड हे दुचाकी (MH 10 DU 5052) घेऊन थांबले होते. दुचाकीमुळे एन्डेवरचा वेग कमी झाला असतानाच मागून आलेल्या भरधाव कंटेनरने एन्डेवरला जोरदार धडक दिली.
धडकेची तीव्रता एवढी होती की एन्डेवर दुचाकीवर आदळली आणि दोन्ही वाहने उडून विरुद्ध दिशेच्या लेनमध्ये गेली. त्याच क्षणी छत्रपती संभाजीनगरच्या दिशेने जाणाऱ्या भरधाव ‘शिवाई’ बस (MH 49 BZ 8060) ने या वाहनांना जोरदार धडक दिली.
एन्डेवरचा चक्काचूर; दोघांचा जागीच मृत्यू
या तिहेरी अपघातात एन्डेवरच्या पुढील भागाचा अक्षरशः चक्काचूर झाला. या भीषण धडकेत किशोर यादव यांचा जागीच मृत्यू झाला. तर एन्डेवर आणि बसच्या दरम्यान चिरडल्याने प्रथमेश लाड यांनाही घटनास्थळीच प्राण गमवावे लागले.
अपघाताचा आवाज एवढा मोठा होता की परिसरातील नागरिकांनी तातडीने घटनास्थळी धाव घेतली. अपघाताचे भीषण दृश्य पाहून नागरिकांमध्ये काही काळ भीतीचे वातावरण निर्माण झाले.
अपघातामुळे महामार्गावर मोठी वाहतूक कोंडी
अपघाताची माहिती मिळताच मृतांच्या नातेवाइकांसह समर्थक आणि नागरिकांनी घटनास्थळी मोठी गर्दी केली. त्यामुळे पुणे-अहिल्यानगर महामार्गावरील दोन्ही बाजूंची वाहतूक मोठ्या प्रमाणात विस्कळीत झाली. वाहनांच्या लांबच लांब रांगा लागल्याने प्रवाशांना मोठ्या वाहतूक कोंडीचा सामना करावा लागला.
शिरूर पोलिसांकडून घटनास्थळी धाव
घटनेची माहिती मिळताच शिरूर पोलिसांनी तातडीने घटनास्थळी धाव घेतली. पोलिसांनी परिस्थिती नियंत्रणात आणत वाहतूक सुरळीत करण्याचे काम केले. अपघाताची नोंद घेण्याची प्रक्रिया रात्री उशिरापर्यंत सुरू होती.
या भीषण अपघातामुळे पुणे-अहिल्यानगर महामार्गावरील वाहतूक सुरक्षेचा प्रश्न पुन्हा ऐरणीवर आला असून, भरधाव वाहनांवर नियंत्रण आणि धोकादायक ठिकाणी सुरक्षित यू-टर्नची व्यवस्था करण्याची गरज अधोरेखित झाली आहे.
