भुईंज:-(वाई)-भरदिवसा दरोड्याचा डाव फसला! ‘ओम्नी’तील ६.२८ लाखांचे दागिने पोलिसांनी उकरून काढले चांदकात मजुराच्या मुसक्या आवळल्या; भुईंज पोलिसांचा विजेच्या वेगाने तपास.
पत्रकार सारिका गवते वाई तालुका महिला अध्यक्ष
ACLS INTERNATIONAL PRESS REPORTER ASSOCIATION राष्ट्रीय अध्यक्ष संपादक प्रल्हाद चव्हाण-8208717483
1) भरदिवसा दरोड्याचा डाव फसला! ‘ओम्नी’तील ६.२८ लाखांचे दागिने पोलिसांनी उकरून काढले
चांदकात मजुराच्या मुसक्या आवळल्या; भुईंज पोलिसांचा विजेच्या वेगाने तपास.
सातारा प्रतिनिधी | सारिका गवते.
भुईंज, दि. १८ : चांदक (ता. वाई) येथे भरदिवसा उभी असलेल्या ओम्नी कारमधून ६ लाख २८ हजार २०० रुपयांचे सोन्या-चांदीचे दागिने लंपास करून पसार झालेल्या चोरट्याचा भुईंज पोलिसांनी अवघ्या काही दिवसांत माग काढत डाव उधळून लावला. आरोपीला अटक करत चोरीला गेलेला १०० टक्के मुद्देमाल जप्त करण्यात आला आहे.
दि. १३ फेब्रुवारी २०२६ रोजी दुपारी २.३० ते ३.३० च्या दरम्यान चांदक येथील संकपाळ आळीत उभी असलेल्या ओम्नी कारमधील पर्स अज्ञात चोरट्याने चोरून नेली होती. या पर्समध्ये साडेपाच तोळे सोन्याचे दागिने, चांदीच्या वस्तू असा एकूण ६,२८,२०० रुपयांचा ऐवज होता. घटनेनंतर भुईंज पोलीस ठाण्यात गुन्हा दाखल करण्यात आला.
गुन्ह्याचे गांभीर्य ओळखून पोलीस अधीक्षक तुषार दोषी, अपर पोलीस अधीक्षक वैशाली कडुकर आणि उपविभागीय पोलीस अधिकारी सुनील साळुंखे यांनी तपासाबाबत स्पष्ट व कडक सूचना दिल्या. प्रभारी सहा. पोलीस निरीक्षक पृथ्वीराज ताटे यांनी गुन्हे प्रकटीकरण पथकाला तातडीने कामाला लावले.
परिसरातील सीसीटीव्ही, स्थानिकांकडून मिळालेली माहिती आणि घटनास्थळावरील हालचालींचा बारकाईने मागोवा घेत पोलिसांनी बांधकामावर काम करणाऱ्या अमोल भगवान दरेकर (वय ४०, रा. चांदक) याच्यावर संशयाची सुई रोखली. ताब्यात घेऊन कसून चौकशी केली असता त्याने गुन्ह्याची कबुली दिली.
चांदक-वेळे रोडवरील स्मशानभूमीजवळील पानवठ्याच्या शेजारी झाडाझुडपांत मोठ्या दगडाखाली दागिने लपवून ठेवले होते. पोलिसांनी तेथून सोन्याचे मोठे मंगळसूत्र, चार अंगठ्या, सोन्याचे डोरले व ११ अष्टपैलू मणी, चांदीचे ब्रेसलेट आणि चोरीला गेलेली पर्स असा सर्व मुद्देमाल हस्तगत केला.
या धडाकेबाज कारवाईत पोलीस उपनिरीक्षक पतंग पाटील, सुरज शिंदे, पो.हवा. नितीन जाधव, आप्पा कोलवडकर, पो.कॉ. सोमनाथ बल्लाळ, सागर मोहिते व किरण निंबाळकर यांनी सहभाग घेतला. पोलीस अधीक्षक तुषार दोषी यांनी पथकाचे विशेष कौतुक केले आहे.
भरदिवसा घडलेल्या या धाडसी चोरीने परिसर हादरला होता; मात्र भुईंज पोलिसांच्या वेगवान व नेमक्या तपासामुळे गुन्हेगारांच्या मनात पुन्हा धास्ती निर्माण झाली आहे.
2) कराड:-“आत्मविश्वासाची तलवार, मेहनतीची ढाल!”
१० वीच्या विद्यार्थ्यांना यशाचा दमदार कानमंत्र.
प्रतिनिधी | सारिका गवते.
कराड दि. १८ : परीक्षेच्या उंबरठ्यावर उभ्या असलेल्या इयत्ता १० वीच्या विद्यार्थ्यांना आत्मविश्वास, शिस्त आणि सकारात्मकतेचा स्फोटक संदेश देत मलकापूर येथील आ. च. विद्यालयात ‘शुभचिंतन सोहळा’ उत्साहात पार पडला. सभागृहात टाळ्यांचा कडकडाट आणि विद्यार्थ्यांच्या डोळ्यांत चमक—अशी प्रेरणादायी ऊर्जा या कार्यक्रमात पाहायला मिळाली.
“यशाचे गुपित कुठेही बाहेर नाही; ते तुमच्या मेहनतीत आणि विचारांत दडलेले आहे. सूर्योदयापूर्वी उठून अभ्यासाचे नियोजन करा, स्वतःवर विश्वास ठेवा—मग कोणतीही परीक्षा कठीण नाही,” असा थेट आणि प्रभावी कानमंत्र State Bank of Indiaच्या मलकापूर शाखेच्या शाखाप्रमुख शर्वरी अमोल जोशी यांनी दिला.
कार्यक्रमाच्या अध्यक्षस्थानी प्रख्यात बालरोगतज्ज्ञ डॉ. अनिल लाहोटी होते. त्यांनी विद्यार्थ्यांच्या शारीरिक आणि मानसिक सुदृढतेवर भर देत स्पष्ट शब्दांत सांगितले, “आरोग्यपूर्ण आहार, नियमित दिनचर्या आणि सकारात्मक मनोवृत्ती—यातूनच यशाचा मजबूत पाया घडतो.” पालकांच्या सहभागाशिवाय विद्यार्थ्यांची जडणघडण अपूर्ण असल्याचेही त्यांनी नमूद केले.
विद्यार्थ्यांच्या भावना, आठवणी आणि कृतज्ञता
१० वीतील शिवराज शेवाळे, प्रसाद कोराळे, वैष्णवी पांढरपट्टे आणि वैष्णवी सावंत यांनी शालेय जीवनातील आठवणींना उजाळा देत शिक्षकांविषयी कृतज्ञता व्यक्त केली. त्यांच्या मनोगतांनी वातावरण भावनिक झाले.
इयत्ता ९ वीच्या रिधिमा धूळप हिने वरिष्ठांना परीक्षेसाठी शुभेच्छा देत निरोपाचा क्षण अधिक संस्मरणीय केला.
जिद्दीचा आणि आत्मविश्वासाचा मंत्र
संस्थेचे सचिव अशोकराव थोरात यांनी विद्यार्थ्यांना भीतीला दूर ठेवून आत्मविश्वासाने परीक्षेला सामोरे जाण्याचे आवाहन केले.
उपमुख्याध्यापक एम.पी. फराळे यांनी शाळेच्या प्रगतीचा आलेख मांडत गुणवत्तापूर्ण शिक्षणाचा ध्यास अधोरेखित केला.
संचालक तुळशीराम शिर्के, पालक प्रतिनिधी अधिकराव यादव, केदारलिंग स्वामी, सुभाष शिंदे, राहुल सावंत तसेच मोठ्या संख्येने पालक उपस्थित होते. कार्यक्रमाचे सूत्रसंचालन सविता पाटील यांनी केले, तर आभार प्रदर्शन जे.बी. पाटील यांनी मानले.
कृतज्ञतेची अनोखी भेट:
१० वीच्या विद्यार्थ्यांनी शाळेला उपयुक्त वस्तू भेट देत आपल्या शिक्षण मंदिराप्रती ऋण व्यक्त केले.
आत्मविश्वासाची तलवार आणि मेहनतीची ढाल हाती घेऊन परीक्षेच्या रणांगणात उतरणाऱ्या या विद्यार्थ्यांसाठी हा ‘शुभचिंतन सोहळा’ खऱ्या अर्थाने यशाचा दमदार प्रारंभ ठरला.
3) सातारा:-“गावपातळीवर राजकीय रणसंग्राम पेटणार!” साताऱ्यात ग्रामपंचायत निवडणुकांची उलटी गणती सुरू; प्रभागरचना कार्यक्रम जाहीर.
सातारा प्रतिनिधी | सारिका गवते
सातारा दि. १८ : सातारा जिल्ह्यात ग्रामपंचायत निवडणुकांचा राजकीय रणसंग्राम रंगण्याची चिन्हे स्पष्ट झाली आहेत. जानेवारी २०२६ ते डिसेंबर २०२६ दरम्यान मुदत संपणाऱ्या तसेच नव्याने स्थापन झालेल्या ग्रामपंचायतींसाठी निवडणूकपूर्व प्रक्रियेचा पहिला आणि महत्त्वाचा टप्पा सुरू झाला आहे. महाराष्ट्र राज्य निवडणूक आयोगच्या मार्गदर्शनाखाली प्रभागरचना कार्यक्रम जाहीर होताच प्रशासन आणि राजकीय इच्छुक दोघेही सतर्क झाले आहेत.
ग्रामीण भागातील राजकीय समीकरणांना वेग आला असून, संभाव्य उमेदवारांनी ‘फील्डिंग’ लावण्यास सुरुवात केली आहे. प्रत्येक वॉर्डाच्या सीमांकनाकडे इच्छुकांचे बारकाईने लक्ष लागले आहे. यंदा प्रभागरचनेत आधुनिक तंत्रज्ञानाचा वापर होणार असून गुगल अर्थ आणि सुपर-इम्पोज पद्धतीमुळे सीमारेषा अधिक अचूक ठरणार आहेत.
ठरलेले वेळापत्रक; प्रशासन सज्ज
२० फेब्रुवारी २०२६ – गुगल अर्थद्वारे नकाशा निश्चिती
२७ फेब्रुवारी २०२६ – तलाठी व ग्रामसेवकांकडून प्रत्यक्ष पाहणी व प्रभाग पाडणे
११ मार्च २०२६ – जिल्हाधिकाऱ्यांकडे प्रस्ताव सादर
२३ मार्च २०२६ – महाराष्ट्र राज्य निवडणूक आयोगची प्राथमिक मान्यता
७ एप्रिल २०२६ – प्रारूप प्रसिद्ध; हरकती व सूचना मागविणे
नागरिकांना ७ ते १३ एप्रिल दरम्यान हरकती नोंदवण्याची संधी दिली जाणार आहे. उपविभागीय अधिकाऱ्यांकडे २१ एप्रिलपर्यंत सुनावणी होईल. जिल्हाधिकारी २८ एप्रिलपर्यंत अंतिम प्रस्ताव आयोगाकडे पाठवतील आणि ४ मे २०२६ रोजी अंतिम प्रभागरचना जाहीर होणार आहे.
समितीची कडक नजर
तहसीलदारांच्या अध्यक्षतेखालील समितीत गटविकास अधिकारी (BDO) आणि मंडळ अधिकारी यांचा समावेश असेल. प्रत्येक टप्प्यावर बारकाईने तपासणी करून पारदर्शकता राखण्याचा प्रशासनाचा निर्धार आहे.
गावोगावी हालचालींना वेग
प्रभागरचना जाहीर होताच गावोगावी राजकीय चर्चा रंगल्या आहेत. संभाव्य उमेदवार, स्थानिक गट आणि कार्यकर्त्यांनी आपापली रणनीती आखण्यास सुरुवात केली आहे. ग्रामपंचायत निवडणुकीचा हा प्रारंभिक बिगुलच आता ग्रामीण राजकारणात चुरस निर्माण करणार आहे.
साताऱ्यातील गावपातळीवरील सत्ता समीकरणे लवकरच स्पष्ट होणार—आता सर्वांचे लक्ष ४ मेच्या अंतिम प्रभागरचनेकडे!
4) कराड:-“ मार्चला दणक्यात होणार रणरागिणींचा सन्मान!”
ईगल फाउंडेशनतर्फे ‘रणरागिणी पुरस्कार २०२६’साठी प्रस्तावांचे जोरदार आवाहन.
प्रतिनिधी | सारिका गवते.
कराड दि. १८ : समाजात आपल्या कर्तृत्वाने वेगळी ओळख निर्माण करणाऱ्या महिलांसाठी मोठी संधी निर्माण झाली आहे. ईगल फाउंडेशनतर्फे जागतिक महिला दिनानिमित्त ‘रणरागिणी पुरस्कार २०२६’ या बहुप्रतिष्ठित सन्मान सोहळ्याचे आयोजन करण्यात आले असून, ८ मार्च रोजी हा भव्य कार्यक्रम पार पडणार आहे. विविध क्षेत्रांतील कर्तृत्ववान महिलांकडून नामांकन प्रस्ताव मागविण्यात आले आहेत.
महिलांच्या अंगी असलेल्या जिद्द, कर्तृत्व आणि नेतृत्वगुणांना योग्य व्यासपीठ मिळावे, त्यांच्या कार्याची समाजाने दखल घ्यावी, या उद्देशाने हा उपक्रम राबविला जातो. यामध्ये रणरागिणी पुरस्कार, गरुडझेप पुरस्कार, तसेच आदर्श माता / आदर्श पिता / आदर्श माता-पिता पुरस्कार यांचा समावेश आहे.
🌟 सर्व क्षेत्रांसाठी खुली संधी
वैद्यकीय, शैक्षणिक, राजकीय, प्रशासकीय, उद्योग, शेती, पत्रकारिता, सामाजिक, सांस्कृतिक, क्रीडा, युवा नेतृत्व तसेच आदर्श सरपंच म्हणून उल्लेखनीय कार्य करणाऱ्या महिला किंवा महिला संस्थांना नामांकन करता येणार आहे. समाजपरिवर्तनाचा ठसा उमटवणाऱ्या महिलांना या सन्मानातून प्रकाशझोतात आणले जाणार आहे.
⏳ २५ फेब्रुवारीपर्यंत अर्ज करा
नामांकन प्रस्ताव २५ फेब्रुवारी २०२६ पर्यंत पीडीएफ स्वरूपात किंवा प्रत्यक्ष अर्जाद्वारे सादर करावेत.
नामांकन फॉर्म मिळवण्यासाठी ९४२२४२०६११ या व्हॉट्सॲप क्रमांकावर नाव, पत्ता व हुद्दा पाठवावा. अधिक माहितीसाठी सायंकाळी ६ ते ७ या वेळेत संपर्क साधता येईल, असे आयोजकांनी स्पष्ट केले आहे.
? पदाधिकाऱ्यांचे आवाहन
फाउंडेशनच्या प्रमुख पदाधिकारी शालन कोळेकर, सुलक्षणा राशिनकर (गुहागर), शर्वरी सूर्यवंशी (सांगली), मीरा मोटे (धाराशिव), प्रा. रिता शेटीया (पुणे), संगिता शिंदे (सातारा), पुष्पावती वंजोळे (रत्नागिरी), मालती भावसार (नाशिक), ॲड. रामरक्षा सोनार (मुंबई), सुप्रिया भारस्वाडकर (पुणे), प्रा. डॉ. अहिल्या वाघमोडे (कोल्हापूर) यांनी जास्तीत जास्त महिलांनी या सुवर्णसंधीचा लाभ घ्यावा, असे आवाहन केले आहे.
८ मार्चला स्त्रीशक्तीचा सन्मान करणारा हा दिमाखदार सोहळा समाजाला प्रेरणेची नवी दिशा देणार, अशी अपेक्षा व्यक्त होत आहे.
5) सातारा:-ताटात ‘हेल्थ क्रांती’चा एल्गार! २०-२१ फेब्रुवारीला सातारात ‘पौष्टिक तृणधान्य महोत्सव’ दणक्यात.
सातारा प्रतिनिधी | सारिका गवते
सातारा, दि. १८ : सातारकरांच्या आरोग्याच्या ताटात आता थेट शेतातून सकस अन्नाचा घमघमाट येणार आहे. बदलत्या जीवनशैलीत वाढणाऱ्या आजारांना उत्तर देत कृषी विभागाने २० आणि २१ फेब्रुवारी रोजी भव्य ‘पौष्टिक तृणधान्य महोत्सवा’चे आयोजन करून आरोग्य क्रांतीचा एल्गार केला आहे. सकाळी १० ते रात्री ८ या वेळेत प्रशासकीय इमारत प्रांगण (एस.टी. स्टँडच्या मागे, पारंगे चौक) येथे हा महोत्सव रंगणार आहे.
महोत्सवाचे उद्घाटन पालकमंत्री शंभुराज देसाई, जिल्हाधिकारी संतोष पाटील आणि मुख्य कार्यकारी अधिकारी याशनी नागराजन यांच्या हस्ते होणार असून, जिल्ह्यातील शेतकरी आणि महिला बचत गटांची ताकद या व्यासपीठावर झळकणार आहे.
मालदांडी, सुपर मोती, परभणी मोती, फुले रेवती, फुले सूचित्रा या उच्च दर्जाच्या ज्वारींपासून परळी खोऱ्यातील देशी नाचणी, जावळीची नाचणी, मान-खटावची बाजरी आणि पाटणचा सुवासिक देशी इंद्रायणी तांदूळ अशा अस्सल तृणधान्यांचा खजिना ग्राहकांसाठी खुला होणार आहे.
नाचणीच्या शेवया, इडली पीठ, उडीद लाडू, नाचणीचे आंबिल, जीआय मानांकन प्राप्त कोरेगावचा ‘वाघ्या घेवडा’, उच्च कुरकुमिनयुक्त वाईची सेंद्रिय हळद आणि धुमाळवाडीची दर्जेदार फळे—अशा साताऱ्याच्या मातीतील संपन्नतेचा थेट अनुभव येथे घेता येणार आहे.
विशेष म्हणजे, हा माल शेतकरी गट आणि महिला बचत गटांच्या माध्यमातून थेट ग्राहकांपर्यंत पोहोचणार आहे. त्यामुळे मध्यस्थांची साखळी तुटून सातारकरांना भेसळमुक्त, ताजे आणि रास्त दरातील अन्नधान्य मिळणार आहे; तर स्थानिक शेतकऱ्यांच्या उत्पन्नाला थेट बळकटी मिळणार आहे.
“नागरिकांनी आपल्या आहारात पौष्टिक तृणधान्यांचा समावेश करून आरोग्यदायी जीवनशैली स्वीकारावी आणि स्थानिक शेतकऱ्यांना प्रोत्साहन द्यावे,” असे आवाहन जिल्हा अधीक्षक कृषी अधिकारी भाग्यश्री फरांदे यांनी केले आहे.
आरोग्य, परंपरा आणि शेतकरी सक्षमीकरण यांचा संगम घडवणारा हा ‘पौष्टिक तृणधान्य महोत्सव’ सातारकरांसाठी खऱ्या अर्थाने ताटातील क्रांती ठरणार आहे!
6) फलटण:-हिंगणगावचा आवाज बुलंद! दत्ताबापूंना जिल्हा परिषदेतच स्थान हवे
निसटत्या पराभवानंतरही विकासावर ठाम विश्वास; ‘राजे’ गटाच्या निर्णयाकडे सर्वांचे लक्ष.
फलटण प्रतिनिधी | सारिका गवते
जावली दि. १८ : हिंगणगाव गटातील विकासाची चाकं थांबू नयेत, यासाठी धैर्यशील उर्फ दत्ताबापू अनपट यांना जिल्हा परिषदेच्या स्वीकृत सदस्यपदी किंवा जिल्हा नियोजन समितीवर संधी द्यावी, अशी जोरदार मागणी स्थानिक कार्यकर्त्यांनी केली आहे. “विकासाचा प्रवास अर्धवट राहू नये,” असा स्पष्ट संदेश हिंगणगावमधून दिला जात आहे.
नुकत्याच झालेल्या जिल्हा परिषद निवडणुकीत शिवसेनेच्या तिकिटावर लढलेल्या सारिका धैर्यशील अनपट यांचा अत्यंत निसटता पराभव झाला. मात्र, काही मतांनी झालेला हा पराभव जनतेच्या मनातील विश्वास कमी करणारा नाही, असे कार्यकर्त्यांचे म्हणणे आहे. उलट, विकासाच्या मुद्द्यावर बापूंच्या नेतृत्वाला आजही मोठा पाठिंबा असल्याचे ते सांगतात.
दत्ताबापू अनपट यांनी पाच वर्षे आणि त्यांच्या पत्नी सारिका अनपट यांनी पाच वर्षे अशी एकूण दहा वर्षे जिल्हा परिषद सदस्य म्हणून काम पाहिले. या काळात रस्ते, पाणीपुरवठा, शिक्षण आणि आरोग्य क्षेत्रात उल्लेखनीय कामे करून हिंगणगाव गटाचा चेहरामोहरा बदलल्याचा दावा कार्यकर्त्यांनी केला आहे.
“निवडणुकीचा निकाल आकड्यांचा असतो; पण जनतेच्या मनातील जागा कायम असते. विकासकामांची साखळी तुटू नये म्हणून दत्ताबापूंना पुन्हा जबाबदारी द्यावी,” अशी आग्रही भूमिका स्थानिक पदाधिकारी व कार्यकर्त्यांनी मांडली आहे.
आता शिवसेना (राजे गट) नेतृत्व काय निर्णय घेते, याकडे तालुक्याचे लक्ष लागले आहे. दत्ताबापूंना स्वीकृत सदस्यपद किंवा जिल्हा नियोजन समितीवर स्थान दिल्यास हिंगणगावच्या विकासाला नवे बळ मिळेल, असा विश्वास व्यक्त होत आहे.
