पुणे:-चिंचवडची पोटनिवडणूक लढविण्याचा निर्णय राज्यपातळीवरून अंतिम होईल – अजित गव्हाणे.

मुख्य संपादक प्रल्हाद चव्हाण:-8208717483

…चिंचवडची पोटनिवडणूक लढविण्याचा निर्णय राज्यपातळीवरून अंतिम होईल – अजित गव्हाणे
पिंपरी, दि. 29 (शफिक शेख):- आमदार महेश लांडगे यांच्यावतीने चिंचवड विधानसभा पोटनिवडणूक बिनविरोध करण्याबाबतच्या पत्रावर उत्तर म्हणून राष्ट्रवादी कॉंग्रेस पक्षाचे शहराध्यक्ष अजित गव्हाणे यांनी आपली भूमिका स्पष्ट केली. दिवंगत आमदार लक्ष्मण जगताप हे पिंपरी-चिंचवड शहराचे लोकनेते होते. त्यांच्या निधनाचे आम्हालाही दुख: असून त्यांच्याबद्दल आम्हाला आदरच आहे. परंतू भाजपविरोधातील जनभावना आणि राज्यात झालेल्या पोटनिवडणुकांमध्ये भाजपने घेतलेली स्वार्थी भूमिका लक्षात घेऊन चिंचवड विधानसभेची पोटनिवडणूक लढविण्याची भूमिका स्थानिक पातळीवर घेण्यात आली असून अंतिम निर्णय वरिष्ठ नेते घेणार आहेत. राज्यपातळीवर जो निर्णय घेतला जाईल त्यानुसार पुढील दिशा ठरविली जाईल, अशी माहिती राष्ट्रवादीचे शहराध्यक्ष अजित गव्हाणे यांनी दिली आहे.
यापूर्वी पंढरपूरचे राष्ट्रवादीचे आमदार भारत भालके यांचे निधन झाल्यानंतर राष्ट्रवादीच्या नेत्यांनी भाजपकडे वारंवार विनंती करूनही त्यांनी सदर निवडणूक बिनविरोध केली नव्हती. त्याशिवाय कोल्हापूर, देगलूर येथेही निवडणूक लढविण्याची भूमिका घेतली. तर मुंबईमध्ये झालेल्या पोटनिवडणुकीत शिवसेनेच्या उमेदवाराला त्रास देऊन नोटाचा प्रचार करण्याची भूमिका घेतली. विरोधी पक्षांच्या आमदारांचे निधन झाल्यानंतर वेगळी भूमिका आणि आपल्या पक्षाच्या आमदाराचे निधन झाल्यानंतर भावनिक आवाहन करून निवडणूक बिनविरोध करण्याबाबत भूमिका घेणे हा स्वार्थी प्रकार आहे. भाजपविरोधात शहरातील जनतेच्या भावनाही तीव्र आहेत.
महापालिकेत गेल्या पाच वर्षांत भाजपचे नेते आणि पदाधिकाऱ्यांनी महापालिकेमध्ये चुकीचा कारभार केला. चिंचवडची निवडणूक बिनविरोध करणे म्हणजे चुकीच्या कामांना पाठींबा देण्यासारखे ठरू शकते. भाजपने यापूर्वी चुकीची आणि स्वार्थी भूमिका घेऊन पोटनिवडणुका लढविल्यामुळे शहरातील पक्षाच्या कार्यकर्त्यांच्या भावनाही तीव्र असून स्थानिक नेतेमंडळींनी पोटनिवडणूक लढविण्याचा एकमुखी निर्णय घेतला आहे. आमच्या भावना आम्ही वरिष्ठांपर्यंत पोहोचविल्या असून पक्षश्रेष्ठी जो निर्णय घेतील तो अंतिम असणार आहे, असेही गव्हाणे यांनी म्हटले आहे.
जगताप कुटुंबियांबद्दल आदरच
दिवंगत आमदार लक्ष्मणभाऊ जगताप यांच्या कुटूंबाबद्दल मला व माझ्या पक्षाच्या प्रत्येकाला आदर आहे. त्यामध्ये कोणतेच दुमत नाही. भाजपने यापूर्वी पोटनिवडणुकांमध्ये घेतलेल्या भूमिकेला आमचा विरोध आहे. त्यामुळे जगताप कुटुंबियांचा आदर कायम ठेवत निवडणूक लढविण्याची भूमिका स्थानिक पातळीवरील नेत्यांनी घेतलेली आहे. शहराध्यक्ष म्हणून महेश लांडगे यांनी घेतलेली भूमिका देखील स्वागतार्ह आहे. परंतू वरीष्ठ पातळीवरील नेत्यांचा निर्णय अंतिम राहणार असल्याचेही गव्हाणे यांनी या पत्रात म्हटले आहे.