वाई:-गणेशोत्सवात ‘स्नेहाचा प्रसाद’; वाईतील मंडळांना साहित्याची भेट.
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
वाई:-गणेशोत्सवात ‘स्नेहाचा प्रसाद’; वाईतील मंडळांना साहित्याची भेट.
अनिल सावंत मित्र समूहाचा सामाजिक बांधिलकीचा उपक्रम; सत्यनारायण पूजेनिमित्त ज्योतिबा मंदिरातून शुभारंभ.
सातारा | वाई, दि. २२ : गणरायाच्या उत्सवाला भक्तीची साथ आणि सामाजिक स्नेहाची किनार देत वाईचे लोकनियुक्त नगराध्यक्ष अनिल लक्ष्मणराव सावंत यांच्या अनिल सावंत मित्र समूहाने शहरातील विविध गणेशोत्सव मंडळांना श्री सत्यनारायण पूजेसाठी आवश्यक प्रसाद साहित्य सस्नेह भेट देण्याचा उपक्रम हाती घेतला आहे. ‘आपला गणपती, आपला उत्सव आणि आपली माणसं’ या आपुलकीच्या भावनेतून सुरू झालेल्या या उपक्रमाचे शहरात स्वागत होत आहे.
सोनगीरवाडी येथील ज्योतिबा मंदिरात भक्तिमय वातावरणात या उपक्रमाचा शुभारंभ करण्यात आला. गणेशोत्सवाच्या निमित्ताने शहरातील विविध मंडळे एकत्र येतात. त्यांच्या माध्यमातून धार्मिक कार्यक्रमांसोबतच सामाजिक, सांस्कृतिक आणि जनजागृतीपर उपक्रमही राबविले जातात. या कार्याला प्रोत्साहन देण्याबरोबरच मंडळांचे पदाधिकारी, कार्यकर्ते आणि नागरिकांमध्ये स्नेहाचे बंध अधिक दृढ व्हावेत, हा या उपक्रमामागील प्रमुख हेतू आहे.
प्रसाद साहित्याची ही भेट केवळ वस्तूंचे वाटप नसून गणेशभक्तीच्या माध्यमातून माणसं जोडण्याचा प्रयत्न आहे. गणेशोत्सव हा श्रद्धेचा उत्सव असला तरी तो सामाजिक एकोपा, बंधुभाव आणि परस्पर सहकार्याची भावना वृद्धिंगत करणारा उत्सव ठरावा, या उद्देशाने अनिल सावंत मित्र समूहाकडून हा उपक्रम राबविण्यात येत आहे.
शहरातील गणेशोत्सव मंडळांना प्रोत्साहन देताना त्यांच्या कार्यकर्त्यांशी थेट संवाद आणि आपुलकीचे नाते निर्माण करण्यावरही या उपक्रमातून भर देण्यात आला आहे. वाई नगरपरिषदेचे उपाध्यक्ष, शहराध्यक्ष तसेच सर्व नगरसेवक व नगरसेविका यांनीही या उपक्रमात सहभागी होऊन सहकार्य करावे, असे आवाहन करण्यात आले.
गणेशोत्सवाच्या पार्श्वभूमीवर वाई शहरातील सर्व नागरिक, दैविक भक्त आणि गणेशभक्तांना अनिल लक्ष्मणराव सावंत, लोकनियुक्त नगराध्यक्ष, वाई नगरपरिषद तसेच अनिल सावंत मित्र समूहाच्या वतीने मनःपूर्वक शुभेच्छा देण्यात आल्या.
