शिक्रापूरात कानबाई माता उत्सव भक्तिमय वातावरणात थाटामाटात संपन्न!
पत्रकार योगिता पाटील शिरूर तालुका महिला कार्याध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
शिक्रापूरात कानबाई माता उत्सव भक्तिमय वातावरणात थाटामाटात संपन्न!
१० ते १२ हजार भाविकांची उपस्थिती; खान्देशी बांधवांच्या अन्नदानातून सामाजिक एकतेचा संदेश.
शिक्रापूर (RPS STAR NEWS प्रतिनिधी) :
शिक्रापूर येथे नुकताच पार पडलेला कानबाई माता महोत्सव यंदा अत्यंत उत्साहपूर्ण, भक्तिमय आणि थाटामाटात साजरा करण्यात आला. खान्देशी बांधवांसह शिक्रापूरकरांनी उत्सवात मोठ्या संख्येने सहभागी होत कानबाई मातेप्रती आपली श्रद्धा व्यक्त केली. तीन दिवस चाललेल्या या उत्सवाला यंदा तब्बल १० ते १२ हजार भाविकांनी उपस्थिती लावल्याचे सांगण्यात आले.
उत्सवाची सुरुवात ५ सप्टेंबर रोजी सप्तपूजनाच्या कार्यक्रमाने झाली. धार्मिक विधी आणि भक्तिमय वातावरणात सप्तपूजनाचा कार्यक्रम पार पडला. यावेळी भाविकांनी मोठ्या श्रद्धेने कानबाई मातेचे दर्शन घेतले.
६ सप्टेंबर रोजी महाप्रसादाचे आयोजन करण्यात आले होते. या महाप्रसादाचा हजारो भाविकांनी लाभ घेतला. विशेष म्हणजे, खान्देशी बांधवांनी स्वतः पुढाकार घेत अन्नदानाची जबाबदारी स्वीकारत सामाजिक बांधिलकीचे दर्शन घडविले. अन्नदानातून सेवा, श्रद्धा आणि माणुसकीचा सुंदर संगम पाहायला मिळाला.
७ सप्टेंबर रोजी कानबाई मातेच्या विसर्जन मिरवणुकीने उत्सवाची सांगता झाली. भक्तिमय वातावरणात निघालेल्या विसर्जन मिरवणुकीत लहानांपासून ज्येष्ठांपर्यंत सर्वच सहभागी झाले. खान्देशचा गणेश बँड मिरवणुकीचे विशेष आकर्षण ठरला. बँडच्या तालावर लहान-थोर मंडळी तसेच भगिनींनी उत्स्फूर्तपणे सहभाग घेत आनंदोत्सव साजरा केला.
यंदाच्या उत्सवाला मिळालेला मोठा प्रतिसाद पाहता कानबाई मातेवरील श्रद्धा आणि खान्देशी बांधवांची एकजूट शिक्रापूरमध्ये प्रकर्षाने दिसून आली. धार्मिक उत्सवाबरोबरच अन्नदान आणि सामाजिक सहभागातून एकोप्याचा संदेश देणारा हा महोत्सव ठरला.
