रांजणगाव:- सौ.रूपाली अनिल ढमढेरे यांना सावित्रीबाई फुले पुणे विद्यापीठाची पीएच.डी.पदवी जाहीर!
पत्रकार राजकुमार इकडे पश्चिम महाराष्ट्र उपाध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) रांजणगाव:- सौ.रूपाली अनिल ढमढेरे यांना सावित्रीबाई फुले पुणे विद्यापीठाची पीएच.डी.पदवी जाहीर!
🔥 रांजणगावच्या कन्येची शैक्षणिक भरारी! संशोधनाच्या क्षेत्रात रूपाली ढमढेरे यांची मानाची कामगिरी; पीएच.डी. पदवीने तळेगाव ढमढेरेच्या शैक्षणिक लौकिकात भर! 🎓
पारनेर, सुपा, अहिल्यानगर | प्रतिनिधी – राजकुमार इकडे
पारनेर तालुक्यातील रांजणगाव हे जन्मस्थान असलेल्या सौ. रूपाली अनिल ढमढेरे (पूर्वाश्रमीच्या रूपाली किसनराव देशमुख) यांना सावित्रीबाई फुले पुणे विद्यापीठाची विद्यावाचस्पती (पीएच.डी.) पदवी जाहीर झाली आहे. त्यांच्या या उल्लेखनीय शैक्षणिक यशामुळे रांजणगावसह तळेगाव ढमढेरे परिसरातून त्यांच्यावर अभिनंदनाचा वर्षाव होत आहे.
सौ. रूपाली अनिल ढमढेरे या शिक्षण प्रसारक मंडळ संचलित, स्वातंत्र्यसैनिक रायकुमार बी. गुजर प्रशाला, तळेगाव ढमढेरे येथे उपशिक्षिका म्हणून कार्यरत आहेत. अध्यापनाच्या क्षेत्रात कार्यरत असतानाच त्यांनी संशोधनाची आवड जोपासत उच्च शिक्षणाच्या क्षेत्रातही उल्लेखनीय कामगिरी केली आहे.
त्यांनी “दिनमित्रमधील अग्रलेखांचा सामाजिक दृष्टिकोनातून अभ्यास (इ.स. १९१० ते १९३० या कालखंडाच्या संदर्भात)” या महत्त्वपूर्ण विषयावर संशोधन पूर्ण केले. त्यांचे हे संशोधन प्रेमराज सारडा महाविद्यालय, अहिल्यानगर येथील संशोधन केंद्रामार्फत पूर्ण करण्यात आले.
या संशोधन कार्यासाठी ज्येष्ठ संशोधक व मार्गदर्शक प्रा. डॉ. वसंत रघुनाथ शेंडगे यांचे मोलाचे मार्गदर्शन लाभले. त्यांच्या मार्गदर्शनाखाली सौ. रूपाली ढमढेरे यांनी ऐतिहासिक आणि सामाजिक संदर्भ असलेल्या विषयाचा सखोल अभ्यास करून आपले संशोधन कार्य यशस्वीपणे पूर्ण केले.
संशोधनाच्या या प्रवासात त्यांचे पती श्री. अनिल विजयकाका ढमढेरे, प्रा. डॉ. संदीप सांगळे, दिनमित्रकार मुकुंदराव पाटील यांचे नातू उत्तमराव पाटील तसेच शिक्षण प्रसारक मंडळ यांचे विशेष सहकार्य लाभले. या सर्वांच्या मार्गदर्शन, सहकार्य आणि प्रोत्साहनामुळे सौ. रूपाली ढमढेरे यांचा पीएच.डी. पदवीपर्यंतचा शैक्षणिक प्रवास यशस्वी झाला.
सौ. रूपाली ढमढेरे यांच्या या उल्लेखनीय शैक्षणिक यशामुळे त्यांच्या जन्मस्थान रांजणगाव येथील देशमुख परिवारातही आनंदाचे वातावरण निर्माण झाले आहे. त्यांच्या या यशाबद्दल शिक्षण, सामाजिक आणि साहित्य क्षेत्रातील मान्यवर, सहकारी शिक्षक, मित्रपरिवार आणि नातेवाईकांकडून त्यांचे अभिनंदन करण्यात येत आहे.
अध्यापन क्षेत्रात कार्यरत असताना संशोधनाच्या माध्यमातून शैक्षणिक क्षेत्रात स्वतःचा वेगळा ठसा उमटविणाऱ्या सौ. रूपाली ढमढेरे यांच्या या यशामुळे रांजणगाव तसेच तळेगाव ढमढेरे परिसराच्या शैक्षणिक आणि बौद्धिक लौकिकात निश्चितच भर पडली आहे.
त्यांच्या या यशातून “जिद्द, मेहनत, ज्ञानाची आस आणि संशोधनाची चिकाटी असेल तर कोणतेही शैक्षणिक शिखर गाठता येते” हा प्रेरणादायी संदेश मिळतो. त्यांच्या या उल्लेखनीय यशाबद्दल सर्व स्तरातून त्यांच्यावर अभिनंदनाचा वर्षाव होत असून, पुढील शैक्षणिक आणि संशोधन कार्यासाठी त्यांना शुभेच्छा दिल्या जात आहेत.
🎓 रांजणगावच्या कन्येची ज्ञानाच्या क्षेत्रात भरारी!
📚 अध्यापनासोबत संशोधनाची कास; रूपाली ढमढेरे यांच्या पीएच.डी. यशाने परिसराचा गौरव!
🌟 ‘दिनमित्र’च्या अग्रलेखांचा सामाजिक दृष्टिकोनातून अभ्यास; संशोधनाला विद्यावाचस्पती पदवीची मान्यता!
2) रायतळे:-(अहिल्यानगर)-अवघ्या ९ तासांत चितळकर वस्ती उजळली!
आमदार काशिनाथजी दाते साहेबांच्या तत्परतेने हायमॅक्स सोलर पोलचा लखलखाट; ग्रामस्थांच्या सुरक्षेला मिळाला मोठा आधार!
रायतळे | प्रतिनिधी – राजकुमार इकडे, अहिल्यानगर
मौजे रायतळे येथील चितळकर वस्तीवर काही दिवसांपूर्वी घडलेल्या जबर चोरी व दरोड्याच्या दुर्दैवी घटनेनंतर परिसरातील नागरिकांच्या सुरक्षेचा प्रश्न ऐरणीवर आला होता. या घटनेची माहिती मिळताच कर्तव्यदक्ष आमदार मा. काशिनाथजी दाते साहेब यांनी तात्काळ घटनास्थळी भेट देऊन पीडित कुटुंबीय तसेच ग्रामस्थांची सांत्वनपर भेट घेतली. यावेळी त्यांनी नागरिकांना धीर देत त्यांच्या अडचणी जाणून घेतल्या.
घटनास्थळाची पाहणी करताना भविष्यात अशा प्रकारच्या घटना टाळण्यासाठी तसेच रात्रीच्या वेळी परिसरात सुरक्षितता वाढविण्यासाठी चितळकर वस्ती परिसरात हायमॅक्स सोलर पोल उभारण्याची अत्यंत आवश्यकता असल्याची मागणी ग्रामस्थांनी आमदार दाते साहेबांकडे केली.
ग्रामस्थांची ही मागणी ऐकताच आमदार काशिनाथजी दाते साहेबांनी क्षणाचाही विलंब न करता संबंधित प्रशासकीय अधिकारी व यंत्रणेशी संपर्क साधून तातडीने आवश्यक त्या सूचना दिल्या. आमदार साहेबांनी केलेल्या तत्पर पाठपुराव्यामुळे अवघ्या काही तासांतच, म्हणजेच केवळ ९ तासांच्या आत, या दुर्गम वस्तीवर हायमॅक्स सोलर पोल उभारण्यात आला आणि परिसर प्रकाशाने उजळून निघाला.
आमदार साहेबांच्या या जलद आणि तत्पर कार्यपद्धतीमुळे चितळकर वस्तीवरील नागरिकांना रात्रीच्या वेळी सुरक्षिततेचा मोठा आधार मिळाला असून, परिसरातील अंधार दूर होऊन सुरक्षेच्या दृष्टीने महत्त्वपूर्ण पाऊल उचलले गेले आहे.
“जनतेच्या सुरक्षेशी कोणतीही तडजोड नाही” या भूमिकेतून अवघ्या काही तासांत समस्या मार्गी लावल्याबद्दल रायतळे गावातील ग्रामस्थ आणि चितळकर वस्तीवरील नागरिकांनी आमदार काशिनाथजी दाते साहेबांचे मनःपूर्वक आभार मानत समाधान व्यक्त केले.
यावेळी राहुल पाटील शिंदे (भाजप तालुका अध्यक्ष), वसंतदादा चेडे, दत्तानाना पवार, मनोज मुंगसे, कोठुळे साहेब (पोलीस उपनिरीक्षक, सुपा पोलीस स्टेशन), गणेश घुले (ग्रामसेवक), प्रशांत भोईटे (तलाठी) तसेच रायतळे ग्रामस्थ सुदाम येणारे, योगेश (राहुल) येणारे, शिवदास चितळकर, गोरख साबळे, मनोज चितळकर, प्रमोद चितळकर, देविदास मेमाणे आणि हृतिक दरेकर आदी उपस्थित होते.
