खावली-(वाई)-शिक्षकी पेशाला काळिमा! विद्यार्थ्यांसमोर महिला शिक्षिकेवर दांडक्याचा हल्ला; मुख्याध्यापकाला अटक, वाई संतापाने पेटले.
पत्रकार सारिका गवते वाई तालुका महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) खावली-(वाई)-शिक्षकी पेशाला काळिमा! विद्यार्थ्यांसमोर महिला शिक्षिकेवर दांडक्याचा हल्ला; मुख्याध्यापकाला अटक, वाई संतापाने पेटले.
“मी तुमच्या बहिणीसारखी आहे… मला मारू नका!” आर्त हाकही ठरली व्यर्थ; विद्यार्थ्यांसमोरच मारहाण, शिक्षक संघटनांचा एल्गार – बडतर्फीची जोरदार मागणी.
सातारा | वाई, दि. १७ :
क्रांतिज्योती सावित्रीबाई फुले यांच्या कार्याने मुलींच्या शिक्षणाचा पाया घातलेल्या आणि शिक्षणाची समृद्ध परंपरा लाभलेल्या सातारा जिल्ह्यातील वाई तालुक्यात शिक्षकी पेशालाच हादरा देणारी संतापजनक घटना घडली आहे. खावली येथील जिल्हा परिषद प्राथमिक शाळेचे मुख्याध्यापक धर्मेंद्र विष्णू दीक्षित यांच्याविरुद्ध आपल्या सहकारी महिला शिक्षिकेवर लाकडी दांडक्याने मारहाण केल्याप्रकरणी वाई पोलिसांत गुन्हा दाखल झाला असून त्यांना अटक करण्यात आली आहे. या घटनेने केवळ वाई तालुकाच नव्हे तर संपूर्ण सातारा जिल्ह्यातील शिक्षण क्षेत्रात संतापाची तीव्र लाट उसळली आहे.
मिळालेल्या माहितीनुसार, काही दिवसांपूर्वी संबंधित महिला शिक्षिका या पाचवड येथे शासकीय प्रशिक्षणासाठी गेल्या होत्या. त्या दरम्यान शाळेतील एका विद्यार्थ्याला वर्गाबाहेर चप्पल ठेवण्याच्या ठिकाणी बसविण्यात आल्याची घटना घडली होती. प्रशिक्षणावरून परतल्यानंतर त्या विद्यार्थ्याच्या पालकांनी वर्गशिक्षिका म्हणून संबंधित शिक्षिकेकडे याबाबत नाराजी व्यक्त केली. विद्यार्थ्याच्या मानसिकतेवर अशा प्रकारचा परिणाम होऊ शकतो, या भूमिकेतून त्यांनी मुख्याध्यापकांकडे या प्रकाराची विचारणा केली.
तक्रारीनुसार, या विचारणेनंतर मुख्याध्यापक संतप्त झाले. “तुम्ही वर्गशिक्षिका आहात, तुम्हीच बघा… माझ्याकडे का आलात?” असे म्हणत त्यांनी संबंधित शिक्षिकेला दमदाटी केली. एवढेच नव्हे तर “तुम्हाला बघून घेतो,” अशी धमकी दिल्याचाही आरोप तक्रारीत करण्यात आला आहे.
गुरुवारी (दि. १६) सकाळी शाळा सुरू असताना मुख्याध्यापक दोन विद्यार्थ्यांना मारहाण करत असल्याचे संबंधित शिक्षिकेने पाहिले. विद्यार्थ्यांना परिपाठासाठी पाठविण्याची विनंती करत त्यांनी हस्तक्षेप केला. मात्र, याचाच राग मनात धरून मुख्याध्यापकांनी संतापाच्या भरात हातातील लाकडी दांडका उगारत महिला शिक्षिकेवर हल्ला केल्याचा आरोप आहे.
जीव वाचवण्यासाठी शिक्षिका शाळेच्या मैदानाकडे धावत सुटल्या. मात्र, मुख्याध्यापकांनी त्यांचा पाठलाग करून पाय, हात, पाठ आणि मानेवर दांडक्याने वार केल्याचे तक्रारीत नमूद करण्यात आले आहे. या वेळी “मला लहान मुलगी आहे… मी तुमच्या बहिणीसारखी आहे… मला मारू नका!” अशी आर्त विनवणी करूनही मारहाण सुरूच राहिल्याचा आरोप करण्यात आला आहे. शाळेतील दुसऱ्या महिला शिक्षिकेने मध्यस्थी करण्याचा प्रयत्न केला, मात्र त्यांनाही दाद मिळाली नसल्याचे समोर आले आहे.
विद्यार्थ्यांसमोर घडलेल्या या प्रकारामुळे शाळेत भीतीचे वातावरण निर्माण झाले. काही विद्यार्थी घाबरून रडू लागल्याची माहितीही समोर येत आहे. पालकांमध्येही या घटनेबद्दल तीव्र संताप व्यक्त होत असून, शाळेत मुलांच्या सुरक्षिततेबाबत प्रश्नचिन्ह निर्माण झाले आहे.
मारहाणीत जखमी झालेल्या महिला शिक्षिकेला तातडीने वाई येथील शासकीय रुग्णालयात दाखल करण्यात आले असून त्यांच्यावर उपचार सुरू आहेत. वाई पोलिसांनी तक्रारीच्या आधारे मुख्याध्यापक धर्मेंद्र विष्णू दीक्षित यांच्याविरुद्ध गुन्हा दाखल करून त्यांना अटक केली आहे. पुढील तपास पोलीस करत आहेत.
दरम्यान, या घटनेनंतर वाई तालुका शिक्षक संघटना आक्रमक झाली आहे. आरोपी मुख्याध्यापकाला तात्काळ शासकीय सेवेतून बडतर्फ करावे, अन्यथा संपूर्ण तालुक्यात तीव्र आंदोलन छेडण्यात येईल, असा इशारा संघटनेने दिला आहे. “विद्यार्थ्यांना संस्कार देणाऱ्या शिक्षकांकडूनच अशी घटना घडणे अत्यंत दुर्दैवी असून अशा वर्तनाला शिक्षण व्यवस्थेत कोणतीही जागा नाही,” अशी प्रतिक्रिया अनेक शिक्षकांनी व्यक्त केली आहे.
या घटनेमुळे शिक्षण क्षेत्रातील शिस्त, शिक्षकांची सुरक्षितता आणि विद्यार्थ्यांसमोर घडणाऱ्या हिंसक घटनांबाबत गंभीर प्रश्न निर्माण झाले आहेत. शाळा ही विद्यार्थ्यांना ज्ञान, संस्कार आणि सुरक्षित वातावरण देणारी जागा मानली जाते. मात्र, त्याच शाळेत अशा प्रकारची घटना घडल्याने पालक, शिक्षक आणि समाजात तीव्र अस्वस्थता निर्माण झाली आहे.
2) वाईत मतदार यादी अद्ययावत विशेष कॅम्पला नागरिकांचा उत्स्फूर्त प्रतिसाद; शेकडो नागरिकांनी घेतला लाभ.
सातारा | वाई, दि. १७ : भारत निवडणूक आयोगाच्या विशेष सखोल पुनर्निरीक्षण (SIR) अभियानांतर्गत वाई शहरात आयोजित करण्यात आलेल्या मतदार नोंदणी व दुरुस्ती विशेष कॅम्पला नागरिकांचा उत्स्फूर्त प्रतिसाद मिळाला. नवमतदार नोंदणी, मतदार यादीतील दुरुस्ती, आधार लिंक, मोबाईल क्रमांक अद्ययावत करणे आदी कामांसाठी नागरिकांनी मोठ्या संख्येने उपस्थिती लावली.
मंत्री मकरंद पाटील यांच्या सूचनेनुसार व मार्गदर्शनाखाली हा उपक्रम राबविण्यात आला. “एकही मतदार मतदानाच्या हक्कापासून वंचित राहू नये” हा या मोहिमेचा प्रमुख उद्देश होता.
वाई येथील स्वामी विवेकानंद चौक (फुले दत्त मंदिर), गणपती आळी येथे मंगळवार, दि. १४ रोजी आयोजित करण्यात आलेल्या या कॅम्पमध्ये दुपारपासूनच नागरिकांची मोठी गर्दी झाली होती. विशेषतः नवमतदार, तरुण आणि ज्येष्ठ नागरिकांनी विविध सेवांचा लाभ घेतला.
कॅम्प यशस्वी करण्यासाठी बाल विठ्ठल मंडळ, शिवदत्त गणेशोत्सव मंडळ आणि संघर्ष प्रतिष्ठान यांच्या कार्यकर्त्यांनी मोलाचे योगदान दिले. तसेच विशाल मोरे, किशोर फुले, मयुर फुले, दिपक हजारे, राजेंद्र तांबेकर, प्रताप खामकर, सचिन किर्वे, अक्षय खाडे, निरज ढोबळे, सौरभ मोरे, अजिम बागवान आणि राजनिश मोरे यांनी नागरिकांना फॉर्म भरणे, आवश्यक कागदपत्रे तयार करणे आणि प्रक्रिया पूर्ण करण्यासाठी सक्रिय सहकार्य केले. निवडणूक निर्णय अधिकारी व कर्मचाऱ्यांनीही नागरिकांचे अर्ज स्वीकारून प्रक्रिया जलदगतीने पार पाडली.
या उपक्रमामुळे अधिकाधिक पात्र नागरिकांची मतदार यादीत नोंद होण्यास मदत होणार असून, आगामी निवडणुकांमध्ये मतदानाची टक्केवारी वाढण्यासही हातभार लागेल, असा विश्वास आयोजकांनी व्यक्त केला.
3) लोणंद:-वारकऱ्यांच्या सेवेत ‘उत्कर्ष’! लोणंदमध्ये हजारो भाविकांना खाऊ वाटप भक्ती -सेवेचा सुंदर संगम.
आषाढी वारीत ‘उत्कर्ष’ नागरी सहकारी पतसंस्था, वाईचा स्तुत्य सामाजिक उपक्रम.
सातारा | लोणंद, दि. १७ : आषाढी वारीच्या पावन पर्वावर सामाजिक बांधिलकी जपत उत्कर्ष नागरी सहकारी पतसंस्था मर्यादित, वाई यांच्या वतीने लोणंद येथे संतश्रेष्ठ श्री ज्ञानेश्वर महाराजांच्या पालखी सोहळ्यात सहभागी झालेल्या हजारो वारकरी भाविकांना खाऊचे वाटप करण्यात आले. भक्ती, सेवा आणि सामाजिक उत्तरदायित्वाचा सुंदर संगम घडविणाऱ्या या उपक्रमाचे वारकरी तसेच स्थानिक नागरिकांकडून कौतुक होत आहे.
बुधवार, दि. १५ जुलै रोजी माउलींची पालखी लोणंद येथे विसावली असताना, उत्कर्ष परिवाराने वारकरी बांधवांचे आदरपूर्वक स्वागत करत त्यांना खाऊचे वाटप केले. विठ्ठलनामाच्या गजरात आणि भक्तिमय वातावरणात पार पडलेल्या या सेवाभावी उपक्रमाला वारकऱ्यांनी उत्स्फूर्त प्रतिसाद दिला.
यावेळी संस्थेच्या वतीने सांगण्यात आले की, “वारी ही केवळ पायी चालण्याची परंपरा नसून भक्ती, समता, बंधुभाव आणि सेवाभावाचा उत्सव आहे. अशा पवित्र सोहळ्यात वारकरी माउलींची सेवा करण्याची संधी मिळणे हे आमच्यासाठी भाग्याची बाब आहे.”
या उपक्रमात संस्थेचे संचालक मदन साळवेकर, डॉ. मंगल अहिवळे, नीला कुलकर्णी, अलका घाडगे, प्रीति कोल्हापुरे, स्नेहा फुले, प्रणाली शिंदे, मुख्य व्यवस्थापक प्रकाश पवार तसेच पतसंस्थेचे कर्मचारी मोठ्या संख्येने सहभागी झाले होते.
आर्थिक सेवांसोबतच सामाजिक, सांस्कृतिक आणि धार्मिक क्षेत्रात सातत्याने विविध उपक्रम राबविणाऱ्या उत्कर्ष नागरी सहकारी पतसंस्था, वाई यांच्या या सेवाभावी कार्याचे लोणंद व वाई परिसरात सर्वत्र कौतुक होत आहे.
4) कराड:-पुस्तक हेच व्यक्तिमत्त्व घडविण्याचे प्रभावी साधन; एपीआय प्रकाश भुजबळ यांचे प्रतिपादन.
कराड | दि. १७ : “पुस्तक हेच मानवाचे खरे व्यक्तिमत्त्व घडविणारे साधन असून नियमित वाचन करणारा युवक कधीही चुकीच्या मार्गाला जात नाही. समाजात कायद्याचे पालन, सामाजिक जाणीव आणि वाचन संस्कृती रुजविण्यासाठी पोलीस प्रशासन व सामाजिक संस्थांमध्ये समन्वय आवश्यक आहे,” असे प्रतिपादन कराड तालुका पोलीस स्टेशनचे सहाय्यक पोलीस निरीक्षक (एपीआय) प्रकाश भुजबळ यांनी केले.
नांदलापूर (ता. कराड) येथील सुखशांती सार्वजनिक वाचनालयाला दिलेल्या सदिच्छा भेटीदरम्यान ते बोलत होते. यावेळी त्यांनी वाचनालयातील ग्रंथसंपदा, स्पर्धा परीक्षा विभाग, संदर्भ ग्रंथ, वृत्तपत्रे, मासिके तसेच विद्यार्थ्यांसाठी उपलब्ध विविध सुविधांची पाहणी करून कौतुक केले. ग्रामीण भागात वाचन संस्कृती जोपासण्याचे कार्य अत्यंत स्तुत्य असल्याचे त्यांनी नमूद केले.
या भेटीदरम्यान पोलीस प्रशासन आणि वाचनालय यांच्या संयुक्त विद्यमाने युवकांमध्ये कायदेविषयक जनजागृती, व्यसनमुक्ती, सायबर गुन्हे प्रतिबंध, महिला सुरक्षा आणि संविधान जागृती यांसारखे उपक्रम राबविण्याबाबत सकारात्मक चर्चा झाली.
कार्यक्रमाच्या प्रारंभी वाचनालयाचे प्रमुख मार्गदर्शक शेखर शिर्के यांनी वाचनालयाच्या स्थापनेपासूनचा प्रवास, शैक्षणिक, सामाजिक व सांस्कृतिक उपक्रम तसेच स्पर्धा परीक्षा मार्गदर्शनाची माहिती दिली. यावेळी विश्वासराव शिर्के आणि हिंदूराव निकम यांच्या हस्ते एपीआय प्रकाश भुजबळ यांचा शाल, श्रीफळ आणि ग्रंथ देऊन सत्कार करण्यात आला.
याप्रसंगी अनिल शिर्के, गीताई फाउंडेशनचे संस्थापक अध्यक्ष प्रदीप शिंदे, दत्तात्रय कुंभार, सातारा जिल्हा ग्रंथालय संघाचे संचालक विश्वासराव निकम, सुनिल सावंत, आनंदराव शिंदे आणि संजय लावंड यांनी मनोगत व्यक्त केले.
कार्यक्रमाला पोलीस हवालदार सचिन निकम, बाबुराव यादव, प्रफुल्ल गाडे, प्रकाश शिर्के, जालिंदर माने, मंगल निकम, बाळासाहेब शिंदे, दर्शन निकम, मंजुनाथ कांबळे, अजित सगरे, संजय कांबळे यांच्यासह वाचनालयाचे सभासद, वाचक आणि ग्रामस्थ मोठ्या संख्येने उपस्थित होते.
कार्यक्रमाचे सूत्रसंचालन ग्रंथपाल स्नेहल निकम यांनी केले, तर आभार स्वरूप निकम यांनी मानले.
5) राजगड:-(वेल्हे):-अंधारातून उजेडाकडे! – दुर्गम आदिवासी वाड्यांमध्ये सौर दिव्यांची क्रांती; ३८ कुटुंबांच्या जीवनात पडला प्रकाश.
राजगड, दि. १७ : राजगड (वेल्हे) तालुक्यातील चांदर–माणगाव पोळे ग्रामपंचायत हद्दीतील दुर्गम आदिवासी वाड्या-वस्त्यांवर ग्रामीण विद्युतीकरण कार्यक्रमांतर्गत सौर घरगुती दिवे बसविण्याची योजना यशस्वीपणे पूर्ण झाली आहे. या उपक्रमामुळे अनेक वर्षांपासून विजेपासून वंचित असलेल्या ३८ कुटुंबांच्या घरात प्रथमच उजेड पोहोचला असून ग्रामस्थांमध्ये आनंदाचे वातावरण आहे.
या दुर्गम भागात वीज नसल्याने विद्यार्थ्यांच्या शिक्षणावर परिणाम होत होता. तसेच रात्रीच्या वेळी जंगली प्राणी, साप आणि विंचू यांचा धोका कायम असल्याने ग्रामस्थांना अनेक अडचणींचा सामना करावा लागत होता. सौर घरगुती दिव्यांमुळे या समस्यांवर मोठ्या प्रमाणात उपाय होणार असून नागरिकांचे दैनंदिन जीवन अधिक सुरक्षित आणि सुलभ होणार आहे.
या योजनेसाठी ग्रामपंचायतीच्या सरपंच चंद्रभागा ढेबे यांनी महाराष्ट्र राज्य विद्युत वितरण कंपनीच्या पुणे येथील कार्यकारी अभियंत्यांकडे सातत्याने पाठपुरावा केला. प्रस्ताव मंजुरीसाठी शिवाजीराव हिरवे आणि रामराजे ढेबे यांनी विशेष प्रयत्न केले, तर जिओ-टॅग सर्वेक्षणासाठी मारुती ढेबे आणि शिवाजी ढेबे यांनी महाऊर्जा व क्रिस्टल कंपनीच्या कर्मचाऱ्यांना मोलाचे सहकार्य केले.
क्रिस्टल कंपनीचे अधिकारी अजित पाटील तसेच ग्रामपंचायत अधिकारी विवेक झेंडे यांनीही या मोहिमेत सक्रिय सहभाग घेतला. महाऊर्जा मुख्यालयाचे महाव्यवस्थापक जयेंद्र वाडेकर आणि पुणे विभागाचे महाव्यवस्थापक हेमंत कुलकर्णी यांच्या मार्गदर्शनामुळे हा उपक्रम यशस्वीपणे पूर्णत्वास गेला.
सौर दिव्यांच्या स्थापनेमुळे दुर्गम डोंगराळ भागातील नागरिकांना सुरक्षितता, विद्यार्थ्यांना अभ्यासासाठी आवश्यक प्रकाश आणि कुटुंबांना दैनंदिन जीवनात मोठा दिलासा मिळणार आहे. ग्रामीण विकासाच्या दिशेने हा उपक्रम महत्त्वाचे पाऊल ठरत असून ग्रामस्थांकडून त्याचे उत्स्फूर्त स्वागत होत आहे.
