वाई:-“चांदकचा पाझर तलाव तुडुंब! शेतकऱ्यांच्या आशांना नवे पंख; सिंचनासाठी पाणी वितरणाला प्रारंभ”
पत्रकार सारिका गवते वाई तालुका महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) वाई:-“चांदकचा पाझर तलाव तुडुंब! शेतकऱ्यांच्या आशांना नवे पंख; सिंचनासाठी पाणी वितरणाला प्रारंभ”
सातारा | वाई, दि. १० : चांदक येथील १०० टक्के क्षमतेने भरलेल्या पाझर तलावाचे राष्ट्रवादी काँग्रेसचे ज्येष्ठ नेते मिलिंद पाटील यांच्या हस्ते पूजन करून शेतीसाठी पाणी उपलब्ध करून देण्याच्या प्रक्रियेला प्रारंभ करण्यात आला. या वेळी परिसरातील शेतकरी मोठ्या संख्येने उपस्थित होते.
चांदक पाझर तलाव पूर्ण क्षमतेने भरल्याने परिसरातील शेतकऱ्यांमध्ये समाधानाचे वातावरण आहे. या तलावामुळे चांदक, गुडकटे, कवठे, पाडे, बोपेगाव तसेच पंचक्रोशीतील अनेक गावांच्या शेतीला सिंचनाचा मोठा आधार मिळणार आहे. पावसाळ्यानंतरही शेतीसाठी पाण्याची उपलब्धता राहणार असल्याने खरीप आणि रब्बी हंगामातील पिकांना मोठा दिलासा मिळणार आहे.
या कार्यक्रमास महादेव भाऊ मस्कर, लक्ष्मण भिलारे, आशीष संकपाळ, विश्वास भिलारे, सुनील दरेकर, प्रल्हाद येवले, विठ्ठलराव भिलारे पाटील, मनीष भिलारे, मयूर भिलारे, तानाजी संकपाळ, भूषण दरेकर यांच्यासह ग्रामस्थ व शेतकरी मोठ्या संख्येने उपस्थित होते.
यावेळी मिलिंद पाटील यांनी पाझर तलावातील पाण्याचे योग्य नियोजन करून शेतकऱ्यांना जास्तीत जास्त लाभ मिळेल, यासाठी आवश्यक ते सर्व प्रयत्न करण्यात येतील, अशी ग्वाही दिली. या उपक्रमामुळे पंचक्रोशीतील सिंचन व्यवस्थेला बळ मिळून शेती उत्पादनात वाढ होईल, असा विश्वास उपस्थित शेतकऱ्यांनी व्यक्त केला.
2) वाई:-“पश्चिम भागाचा आधारवड कोसळला! ज्येष्ठ समाजसेवक ज्ञानदेव शेठ सणस यांचे आकस्मिक निधन; जनतेच्या डोळ्यांत अश्रू”
सातारा | वाई, दि. १० :
पश्चिम भागातील जनतेच्या सुख-दुःखात कायम खंबीरपणे उभे राहणारे, सेवाभावी वृत्तीने हजारो गरजूंचा आधार बनलेले ज्येष्ठ सामाजिक कार्यकर्ते ज्ञानदेव शेठ सणस यांचे गुरुवारी हृदयविकाराच्या तीव्र झटक्याने आकस्मिक निधन झाले. त्यांच्या निधनाने संपूर्ण वाई तालुका आणि पश्चिम भागावर शोककळा पसरली असून, समाजाने एक लोकाभिमुख नेतृत्व आणि जनतेने आपला हक्काचा आधारवड गमावल्याची भावना सर्वत्र व्यक्त होत आहे.
मिळालेल्या माहितीनुसार, पंचायत समिती वाई येथे एका बैठकीसाठी गेले असताना त्यांना अचानक हृदयविकाराचा तीव्र झटका आला. तातडीने रुग्णालयात दाखल करून उपचार करण्यात आले; मात्र डॉक्टरांचे सर्व प्रयत्न निष्फळ ठरले.
ज्ञानदेव शेठ सणस हे केवळ राजकारणापुरते मर्यादित नव्हते. गोरगरीब, गरजू आणि संकटग्रस्तांच्या मदतीसाठी ते नेहमीच पुढे असत. विशेषतः कोरोना महामारीच्या काळात त्यांनी शेकडो कुटुंबांना अन्नधान्य, औषधे, वैद्यकीय मदत आणि रुग्णालयीन सुविधा उपलब्ध करून देत ‘देवदूत’ म्हणून काम केले.
अवघे ५० रुपये खिशात घेऊन मुंबईत संघर्ष सुरू करणाऱ्या ज्ञानदेव शेठ यांनी कष्ट, प्रामाणिकपणा आणि जिद्दीच्या जोरावर यशस्वी प्रिंटिंग व्यवसाय उभा केला. यशाच्या शिखरावर पोहोचूनही त्यांनी आपल्या गावाशी आणि माणसांशी असलेले नाते अखेरपर्यंत जपले.
‘श्री काळेश्वरी ट्रस्ट, रेणावळे’चे संस्थापक अध्यक्ष म्हणून त्यांनी सामाजिक, धार्मिक आणि शैक्षणिक क्षेत्रात उल्लेखनीय कार्य केले. राष्ट्रवादी काँग्रेसमधून दीर्घकाळ जनसेवा केल्यानंतर नुकताच त्यांनी शिवसेनेत प्रवेश करून पश्चिम भागाच्या विकासासाठी नव्या जोमाने काम करण्याचा संकल्प केला होता. मात्र नियतीने त्यांचा हा प्रवास अर्धवट थांबवला.
त्यांच्या पश्चात पत्नी, दोन मुले, सुना आणि नातवंडे असा परिवार आहे. त्यांच्या निधनाची बातमी समजताच विविध क्षेत्रांतील मान्यवर आणि शेकडो नागरिकांनी अंतिम दर्शन घेऊन अश्रुपूर्ण श्रद्धांजली अर्पण केली.
ज्ञानदेव शेठ सणस यांच्या निधनाने पश्चिम भागाने केवळ एक नेता नव्हे, तर जनतेच्या प्रत्येक सुख-दुःखात धावून जाणारा खरा समाजसेवक गमावला आहे.
3) वाई:-“ग्रामपंचायतीच्या नोटीसलाही केराची टोपली! जांभळीत बेकायदा उत्खननाचा धुमाकूळ; प्रशासन गप्प, ‘मुळशी पॅटर्न’ची भीती!”
डोंगर पोखरले, वृक्षतोड वाढली, पर्यावरण धोक्यात; महसूल यंत्रणा आणि ग्रामपंचायतीच्या भूमिकेवर ग्रामस्थांचा संतप्त सवाल.
सातारा | वाई, दि. १० :
वाई तालुक्यातील जांभळी (पाराटवाडी-कोळीवस्ती) परिसरात गेल्या दोन वर्षांपासून सुरू असल्याचा आरोप असलेल्या बेकायदा उत्खननामुळे पश्चिम भागातील पर्यावरण, शेती आणि डोंगररांगांचे अस्तित्व धोक्यात आल्याची गंभीर चर्चा सुरू झाली आहे. विकासाच्या नावाखाली डोंगर पोखरले जात असल्याचा आरोप ग्रामस्थांनी केला असून, संबंधितांवर कठोर कारवाईची मागणी जोर धरू लागली आहे.
स्थानिकांच्या माहितीनुसार, काही गुंतवणूकदारांनी मोठ्या प्रमाणात जमीन खरेदी केल्यानंतर मातीचे उत्खनन, वृक्षतोड आणि डोंगरांची विद्रूपता सुरू झाली. त्यामुळे पावसाळ्यात भूस्खलनाचा धोका वाढल्याची भीती व्यक्त होत आहे.
या प्रकरणाची दखल घेत जांभळी ग्रामपंचायतीने गट क्रमांक १०७ मधील शासकीय जागेवर विनापरवानगी उत्खनन व वृक्षांचे नुकसान केल्याप्रकरणी नोटीस बजावली होती. नुकसानभरपाई भरणे किंवा खुलासा सादर करण्याचे आदेश देण्यात आले होते. मात्र, नोटिशीलाही प्रतिसाद न मिळाल्याने ग्रामपंचायतीच्या अधिकारालाच आव्हान दिले जात आहे का, असा प्रश्न उपस्थित होत आहे.
ग्रामस्थांच्या आरोपानुसार, परिसरात आलिशान फार्महाऊस उभारण्याच्या नावाखाली मोठ्या प्रमाणावर डोंगर पोखरले जात आहेत. यामुळे भविष्यात भूस्खलन, मातीची धूप आणि शेतीचे अपरिमित नुकसान होण्याची शक्यता वाढली आहे.
महसूल विभागासह संबंधित यंत्रणांकडे वारंवार तक्रारी करूनही प्रभावी कारवाई होत नसल्याचा आरोप नागरिकांनी केला आहे. त्यामुळे प्रशासन नेमके कोणाची पाठराखण करत आहे का, असा सवालही ग्रामस्थांकडून उपस्थित केला जात आहे.
नागरिकांनी तहसीलदार, महसूल विभाग, ग्रामपंचायत आणि संबंधित यंत्रणांनी संयुक्त पाहणी करून विनापरवानगी उत्खननाची सखोल चौकशी करावी व दोषींवर कठोर कायदेशीर कारवाई करावी, अशी मागणी केली आहे.
आजही प्रशासनाने डोळेझाक केली, तर उद्या जांभळीच्या पश्चिम भागालाही ‘मुळशी पॅटर्न’सारख्या पर्यावरणीय संकटाचा सामना करावा लागू शकतो, असा इशारा स्थानिकांनी दिला आहे.
4) वाई:-“प्रशासनाला मोठ्या दुर्घटनेचीच प्रतीक्षा? चांदक घाटात दरडी, खडी आणि मृत्यूशी रोजची शर्यत!”
सातारा | वाई दि. ११ :
वाई-वेळे गावाला जोडणारा आणि पुणे–मांढरदेवी मार्गावरील महत्त्वाचा चांदक घाट सध्या अक्षरशः मृत्यूचा सापळा बनला आहे. पावसाच्या सुरुवातीलाच घाटात अनेक ठिकाणी दरडी कोसळल्या असून रस्त्यावर माती, दगड, खडी आणि मुरुमाचा मोठा साठा झाला आहे. त्यामुळे वाहनधारकांचा प्रत्येक प्रवास जीव मुठीत धरून करावा लागत आहे. तरीही संबंधित प्रशासन आणि सार्वजनिक बांधकाम विभागाकडून अद्याप ठोस उपाययोजना करण्यात आलेल्या नसल्याने संताप व्यक्त होत आहे.
चांदक घाट हा वाई, वेळे आणि खंडाळा एमआयडीसीकडे जाणाऱ्या शेकडो कामगारांसाठी जीवनवाहिनी मानला जातो. याच मार्गावरून पुणे आणि प्रसिद्ध तीर्थक्षेत्र मांढरदेवीकडे जाणाऱ्या पर्यटकांचीही मोठी वर्दळ असते. मात्र, पहिल्याच पावसात घाटातील डोंगरकडे खचल्याने रस्त्यावर दगड-मातीचा ढिगारा साचला आहे. अनेक ठिकाणी झाडांच्या फांद्या रस्त्यावर झुकल्याने समोरून येणारी वाहने दिसत नसल्यामुळे अपघाताचा धोका अधिकच वाढला आहे.
रस्त्यावर साचलेली खडी आणि मुरुमामुळे विशेषतः दुचाकीस्वारांची वाहने घसरत असून, सातत्याने छोटे-मोठे अपघात घडत आहेत. पावसाचा जोर वाढल्यास मोठी दरड कोसळून गंभीर दुर्घटना घडण्याची भीती स्थानिक नागरिक आणि प्रवाशांनी व्यक्त केली आहे.
सामाजिक कार्यकर्ते मनीष भिलारे-पाटील यांनी प्रशासनावर तीव्र नाराजी व्यक्त करत, कोणत्याही जीवितहानीपूर्वी युद्धपातळीवर कारवाई करून घाटातील दरडी, झाडांच्या फांद्या आणि रस्त्यावरील खडी तात्काळ हटवण्याची मागणी केली आहे.
“चांदक घाटातील निसर्गसौंदर्य पाहण्यासाठी आणि दैनंदिन कामासाठी हजारो नागरिक या मार्गाचा वापर करतात. प्रशासन एखाद्या मोठ्या अपघाताची वाट पाहत आहे का? सार्वजनिक बांधकाम विभागाने तात्काळ दखल घेऊन घाटातील दरडी, झाडांच्या फांद्या आणि रस्त्यावरील खडी साफ करून प्रवाशांचा प्रवास सुरक्षित करावा.”
— मनीष भिलारे-पाटील, सामाजिक कार्यकर्ते
5) वाई:-“डोंगर पोखरले, गाव गाडले!”; जांभळीतील बेकायदेशीर उत्खननामुळे भीषण भूस्खलन, महसूल अधिकाऱ्यांच्या निलंबनाची मागणी; राष्ट्रीय मराठा महासंघाचा १५ ऑगस्टला आंदोलनाचा इशारा.
सातारा | वाई दि. ११ :
वाई तालुक्याच्या पश्चिम भागातील जांभळी परिसरातील पारटवाडी व धनगरवाडी येथे झालेल्या भीषण भूस्खलनासाठी बेकायदेशीर आणि बेसुमार उत्खननासह महसूल विभागाची हलगर्जी जबाबदार असल्याचा गंभीर आरोप राष्ट्रीय मराठा महासंघाने केला आहे. दोषी महसूल अधिकाऱ्यांना तातडीने निलंबित करून चौकशी करावी, अन्यथा १३ जुलै रोजी घटनास्थळी आणि १५ ऑगस्ट रोजी जिल्हाधिकारी कार्यालयासमोर तीव्र धरणे आंदोलन करण्यात येईल, असा इशारा महासंघाने दिला आहे.
राष्ट्रीय मराठा महासंघाचे सातारा जिल्हाध्यक्ष विक्रम वाघ यांच्या नेतृत्वाखाली जिल्हाधिकाऱ्यांना सादर करण्यात आलेल्या निवेदनात महसूल विभागाच्या कारभारावर कठोर शब्दांत टीका करण्यात आली आहे. निवेदनानुसार, महसूल विभागाच्या कथित मेहरबानीने आणि एजंटांच्या माध्यमातून मुंबई-पुण्यातील धनदांडग्यांनी अल्प दरात जमिनी खरेदी केल्या. त्यानंतर आवश्यक परवानग्या न घेता मोठ्या प्रमाणावर डोंगर पोखरणारे उत्खनन आणि ब्लास्टिंग करण्यात आल्याचा आरोप करण्यात आला आहे.
महासंघाच्या म्हणण्यानुसार, पूर्वी यापेक्षाही अधिक पाऊस पडत असतानाही अशा प्रकारच्या दुर्घटना घडल्या नव्हत्या. मात्र, निसर्गाशी केलेल्या अतिरेकी छेडछाडीमुळे यंदा भीषण भूस्खलन झाले असून अनेक शेतकऱ्यांची शेती, घरे, सार्वजनिक रस्ते आणि पूल मातीखाली गाडले गेले आहेत. पाळीव जनावरांसह लाखो रुपयांचे नुकसान झाल्याने परिसरातील जनजीवन विस्कळीत झाले आहे.
“प्रशासनाने तातडीने जांभळी भागाची प्रत्यक्ष पाहणी करून दोषींवर कठोर कारवाई करावी. अन्यथा १३ जुलै रोजी घटनास्थळी आंदोलन आणि त्यानंतर १५ ऑगस्ट रोजी जिल्हाधिकारी कार्यालयासमोर धरणे आंदोलन करण्यात येईल,” असा इशारा विक्रम वाघ यांनी दिला.
या निवेदनावर विक्रम वाघ, अतुल शिंदे, सीताराम नवघणे, अमित गायकवाड, नंदिनी गायकवाड, कलावती चव्हाण आणि मंगेश जाधव यांच्या स्वाक्षऱ्या आहेत.
दरम्यान, जांभळी परिसरातील कथित बेकायदेशीर उत्खननाची सखोल चौकशी करून दोषींवर काय कारवाई होते आणि जिल्हा प्रशासन कोणती भूमिका घेते, याकडे आता संपूर्ण वाई तालुक्याचे लक्ष लागले आहे.
6) वाठार:-“शेतकऱ्यांची झोप उडवणारी केबलचोर टोळी अखेर गजाआड!; वाठार पोलिसांची धडाकेबाज कारवाई, ३ गुन्हे उघड, ८३ हजारांचा मुद्देमाल जप्त”
सातारा | वाठार स्टेशन, दि. ११ :
वाठार पोलीस ठाण्याच्या हद्दीत शेतीपंपांच्या तांब्याच्या केबल चोरी करून शेतकऱ्यांचे मोठे आर्थिक नुकसान करणाऱ्या टोळीच्या मुसक्या आवळण्यात वाठार पोलिसांना मोठे यश आले आहे. पोलिसांच्या धडाकेबाज कारवाईत तीन चोरीचे गुन्हे उघडकीस आले असून सहा शेतकऱ्यांच्या मालकीची तब्बल ९६० फूट तांब्याची केबल, अंदाजे ८३ हजार रुपयांचा मुद्देमाल जप्त करण्यात आला आहे. या कारवाईमुळे परिसरातील शेतकऱ्यांनी समाधान व्यक्त करत पोलिसांचे कौतुक केले आहे.
देऊर (ता. कोरेगाव) येथील मळवी शिवारात अजित धनसिंग कदम यांच्या विहिरीवरील शेतीपंपाची सुमारे ७० फूट तांब्याची केबल चोरटे कापत असल्याची माहिती मिळताच ग्रामसुरक्षा दल, पोलीस पाटील आणि वाठार पोलिसांनी तातडीने घटनास्थळी धाव घेत दोन आरोपींना रंगेहात पकडले.
अटक करण्यात आलेल्या आरोपींची नावे विकास बबन कोळी (वय २७, रा. रेल्वे स्टेशन, कोरेगाव) आणि अरुण भरत काळे (वय १९, रा. बावधन नाका, वाई) अशी आहेत.
सखोल चौकशीत आरोपींनी देऊर आणि तळीये परिसरातील धरणाजवळ तसेच विविध विहिरींवरील शेतीपंपांच्या तांब्याच्या केबल चोरीची कबुली दिली. या कबुलीनंतर वाठार पोलीस ठाण्यातील एकूण तीन गुन्ह्यांचा उलगडा झाला असून ८३ हजार रुपयांचा ९६० फूट तांब्याच्या केबलचा मुद्देमाल जप्त करण्यात आला.
ही कारवाई जिल्हा पोलीस अधीक्षक निखिल पिंगळे, अप्पर पोलीस अधीक्षक डॉ. वैशाली कडुकर आणि उपविभागीय पोलीस अधिकारी राजश्री तेरणी यांच्या मार्गदर्शनाखाली पार पडली.
सहाय्यक पोलीस निरीक्षक सुशील भोसले, पोलीस उपनिरीक्षक गहिनीनाथ सातव यांच्यासह वाठार पोलीस ठाण्यातील अधिकारी व कर्मचाऱ्यांनी या कारवाईत महत्त्वाची भूमिका बजावली. पुढील तपास पोलीस हवालदार अमोल कर्णे, सहदेव तुपे आणि अजय झुंजार करत आहेत.
दरम्यान, मालमत्तेच्या चोरीसंदर्भात संशयास्पद हालचाली आढळल्यास नागरिकांनी कोणतीही भीती न बाळगता गोपनीयपणे पोलिसांशी संपर्क साधावा, असे आवाहन उपविभागीय पोलीस अधिकारी राजश्री तेरणी आणि सहाय्यक पोलीस निरीक्षक सुशील भोसले यांनी केले आहे.
7) वाई:-“रक्ताच्या प्रत्येक थेंबातून कै.अजय थोरवेंना मानवंदना!”
आठव्या पुण्यस्मरणानिमित्त १३ जुलै रोजी व्याहळीत भव्य रक्तदान शिबिर; ‘मोरया रे ग्रुप’चा प्रेरणादायी सामाजिक उपक्रम
सातारा | वाई, दि. ११ :
सामाजिक कार्याची जपलेली परंपरा आणि दिवंगत मित्राच्या स्मृतीला समाजोपयोगी कार्यातून अभिवादन करण्याच्या भावनेतून व्याहळी (ता. वाई) येथे कै. अजय दिगंबर थोरवे यांच्या आठव्या पुण्यस्मरणानिमित्त सोमवार, दि. १३ जुलै २०२६ रोजी भव्य रक्तदान शिबिराचे आयोजन करण्यात आले आहे. **’मोरया रे ग्रुप’**च्या वतीने आयोजित हे शिबिर जिल्हा परिषद प्राथमिक शाळा, व्याहळी कॉलनी येथे सकाळी ८ ते सायंकाळी ५ या वेळेत पार पडणार आहे.
कै. अजय थोरवे हे मनमिळावू स्वभाव, मित्रत्वाची नाळ आणि सामाजिक बांधिलकी यामुळे परिसरात लोकप्रिय होते. त्यांच्या अकाली निधनाने व्याहळीसह संपूर्ण परिसराला मोठा धक्का बसला होता. त्यांच्या स्मृती चिरंतन राहाव्यात आणि त्यातून समाजाला जीवनदान देणारे कार्य घडावे, या उद्देशाने ‘मोरया रे ग्रुप’ने रक्तदान शिबिराची परंपरा सुरू केली.
गेल्या सात वर्षांपासून हा उपक्रम सातत्याने आणि यशस्वीपणे राबविण्यात येत असून, दरवर्षी शेकडो रक्तदाते यात सहभागी होत आहेत. या शिबिरातून संकलित झालेल्या रक्तामुळे अनेक गरजू रुग्णांना वेळेवर रक्त उपलब्ध होऊन जीवनदान मिळाले आहे.
‘रक्तदान हेच सर्वश्रेष्ठ दान’ हा संदेश अधिक व्यापक करण्यासाठी परिसरातील सर्व निरोगी युवक-युवती आणि नागरिकांनी मोठ्या संख्येने रक्तदानासाठी उपस्थित राहावे, असे आवाहन आयोजकांनी केले आहे. रक्तदान करणाऱ्या प्रत्येक रक्तदात्याचा आकर्षक भेटवस्तू देऊन सन्मान करण्यात येणार आहे.
रक्तदान शिबिराबाबत अधिक माहितीसाठी निलेश थोरवे – ९९७००२३१२७ किंवा रोहित – ८६००७१०२५२ यांच्याशी संपर्क साधावा, असे आवाहन ‘मोरया रे ग्रुप’ने केले आहे.
