महाबळेश्वर तालुक्यात धक्कादायी प्रकार – कळमगावात वनवा लावून वन्यजिवांची घरे उद्ध्वस्त; ‘भूमाफिया’ प्रवृत्तीविरोधात कारवाईसाठी वंचित बहुजन आघाडी आक्रमक!
पत्रकार उत्तम भालेराव महाबळेश्वर तालुका अध्यक्ष
राष्ट्रीय अध्यक्ष संपादक प्रल्हाद चव्हाण – 8208717484
महाबळेश्वर तालुक्यात धक्कादायी प्रकार – कळमगावात वनवा लावून वन्यजिवांची घरे उद्ध्वस्त; ‘भूमाफिया’ प्रवृत्तीविरोधात कारवाईसाठी वंचित बहुजन आघाडी आक्रमक!
महाबळेश्वर: महाबळेश्वर तालुका परिसरातील मौजे कळमगाव येथे पर्यावरण संवेदनशील क्षेत्राच्या (Eco-Sensitive Zone) नियमांची सर्रास पायमल्ली करून निसर्गाचा संहार करण्याचा एक धक्कादायक प्रकार उघडकीस आला आहे. मौजे कळमगाव येथील सर्वे नंबर २५ आणि २६ या मिळकतींमध्ये जेसीबीच्या साहाय्याने बेकायदेशीर मोठे उत्खनन, वृक्षतोड आणि मुद्दामहून वनवा लावून मौल्यवान वनसंपदा नष्ट केली जात आहे. यामुळे वन्यजिवांच्या नैसर्गिक वास्तव्याचा घास घेतला गेला असून त्यांच्या जिवाला थेट धोका निर्माण झाला आहे.
या गंभीर प्रकाराबाबत वंचित बहुजन आघाडीचे महाबळेश्वर तालुकाध्यक्ष उत्तम भालेराव यांनी थेट प्रांताधिकारी, उपविभागीय अधिकारी (वाई) आणि मंडल अधिकारी यांच्याकडे लेखी तक्रार दाखल करून फौजदारी कारवाई करण्याची मागणी केली आहे.
अधिकाऱ्यांची उदासीनता; ‘एनओसी’ नसतानाही काम सुरूच!
तक्रारदारांनी स्थानिक तलाठी, ग्रामसेवक आणि तहसील कार्यालयाकडे रीतसर चौकशी केली असता, या वादग्रस्त उत्खनन आणि बांधकामासाठी प्रशासनाकडून कोणत्याही प्रकारची ना हरकत प्रमाणपत्र (NOC), परवानगी किंवा मान्यता देण्यात आलेली नाही ही धक्कादायक बाब समोर आली आहे. महसूल विभागातील संबंधित पदाधिकार्यांना वेळोवेळी फोनद्वारे व रीतसर अर्ज देऊनही आजतागायत कोणतीही ठोस कारवाई करण्यात आलेली नाही. प्रशासनाच्या या ढिम्म आणि उदासीन कारभारामुळे संताप व्यक्त होत असून, हे कृत्य करणाऱ्यांना शासकीय पाठींबा आहे का? असा सवाल आता उपस्थित होत आहे.
तक्रार अर्जातील प्रमुख मुद्दे आणि मागण्या:
निसर्गाचे विद्रुपीकरण: सर्वोच्च न्यायालयाचे पर्यावरणविषयक दिशानिर्देश धाब्यावर बसवून, जेसीबी आणि मोठ्या वाहनांच्या साहाय्याने परिसराचे विद्रुपीकरण केले जात असून तिथे बेकायदेशीर दगडी बांधकामे सुरू आहेत.
तातडीने ‘स्टॉप वर्क’ नोटीस द्या: सर्वे नंबर २५ व २६ मधील सुरू असलेले बेकायदेशीर काम तात्काळ थांबवून अनधिकृत बांधकामे निष्कासित (तोडून) करण्यात यावीत.
फौजदारी गुन्हे (FIR) दाखल करा: पर्यावरण कायदे, वन्यजीव संरक्षण कायदा आणि शासकीय परिपत्रकांचे जाणीवपूर्वक उल्लंघन केल्याप्रकरणी तसेच बनावट रेकॉर्ड तयार करण्याचा संशय असल्याने संबंधित दोषी मिळकतधारकांवर भारतीय न्याय संहिता (BNS) आणि पर्यावरण संरक्षण कायद्यान्वये तात्काळ फौजदारी गुन्हे दाखल करावेत.
वाहने जप्त करा: अनधिकृत कामासाठी वापरण्यात येणारे जेसीबी, ट्रक, डंपर जप्त करून संबंधित ठेकेदारावर कडक कारवाई करावी.
…तर वरिष्ठ कार्यालयाकडे कारवाईची मागणी करणार: उत्तम भालेराव यांचा कडक इशारा
”पर्यावरण (संरक्षण) कायदा, १९८६ अंतर्गत महाबळेश्वर तालुका हा इको-सेन्सिटिव्ह झोन म्हणून घोषित आहे. येथे कोणत्याही प्रकारच्या व्यावसायिक उत्खननाला आणि वृक्षतोडीला कडक बंदी आहे. असे असतानाही येथे राजरोसपणे ‘भूमाफिया’ प्रवृत्ती डोके वर काढत आहे. जर स्थानिक प्रशासनाने या गंभीर प्रकरणाची दखल घेऊन आपल्या स्तरावरून तात्काळ कायदेशीर कारवाई केली नाही, तर प्रशासनाच्या या निष्क्रियतेविरोधात त्यांच्या वरिष्ठ कार्यालयाकडे संबंधित अधिकार्यांवरच कारवाई करण्यासाठी दाद मागण्यात येईल,” असा कडक इशारा वंचित बहुजन आघाडीचे तालुकाध्यक्ष उत्तम भालेराव यांनी दिला आहे.
आता या निसर्गाच्या गंभीर र्हासावर आणि शासकीय अधिकार्यांच्या भूमिकेवर वरिष्ठ प्रशासन काय पावले उचलणार, याकडे संपूर्ण महाबळेश्वर तालुक्याचे लक्ष लागले आहे.
