वाई:-खाकीतील धाडसी शिलेदार काळाच्या पडद्याआड! वाई पोलीस दलावर शोककळा; कॉन्स्टेबल श्रावण राठोड यांचा भीषण अपघातात मृत्यू.
पत्रकार सारिका गवते वाई तालुका महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
खाकीतील धाडसी शिलेदार काळाच्या पडद्याआड! वाई पोलीस दलावर शोककळा; कॉन्स्टेबल श्रावण राठोड यांचा भीषण अपघातात मृत्यू.
सातारा |
वाई दि. १९ : वाई पोलीस ठाण्यातील गुन्हे प्रकटीकरण (DB) विभागाचे कर्तव्यदक्ष, धाडसी आणि लोकप्रिय पोलीस कॉन्स्टेबल श्रावण राठोड यांचे शुक्रवारी पहाटे वाकेश्वर-बावधन हद्दीत झालेल्या भीषण अपघातात दुर्दैवी निधन झाले. अज्ञात भरधाव वाहनाने दिलेल्या जोरदार धडकेत त्यांचा जागीच मृत्यू झाला असून, त्यांच्या पत्नी गंभीर जखमी झाल्या आहेत. या घटनेमुळे वाई पोलीस दलासह संपूर्ण परिसरात शोककळा पसरली आहे.
मिळालेल्या माहितीनुसार, श्रावण राठोड हे आपल्या पत्नीसह वाई-पाचवड मार्गावरून प्रवास करत होते. पहाटेच्या सुमारास वाकेश्वर-बावधन हद्दीत त्यांच्या वाहनाला अज्ञात वाहनाने जोरदार धडक दिली. धडक इतकी भीषण होती की, राठोड यांचा घटनास्थळीच मृत्यू झाला. अपघातानंतर परिसरात एकच खळबळ उडाली. स्थानिक नागरिक आणि पोलीस प्रशासनाने तत्काळ घटनास्थळी धाव घेत मदतकार्य सुरू केले. गंभीर जखमी झालेल्या त्यांच्या पत्नीला तातडीने उपचारासाठी रुग्णालयात दाखल करण्यात आले असून त्यांच्यावर वैद्यकीय उपचार सुरू आहेत.
श्रावण राठोड हे वाई पोलीस ठाण्याच्या गुन्हे प्रकटीकरण विभागात कार्यरत होते. गुन्ह्यांच्या तपासात त्यांची विशेष ओळख होती. धाडसी कारवाया, कर्तव्यनिष्ठ वृत्ती आणि नागरिकांशी असलेले आत्मीय संबंध यामुळे त्यांनी पोलीस दलात आणि समाजात वेगळे स्थान निर्माण केले होते. त्यांच्या अचानक निधनामुळे सहकारी अधिकारी, कर्मचारी आणि नागरिकांमध्ये तीव्र हळहळ व्यक्त होत आहे.
दरम्यान, अपघातानंतर धडक देणारा वाहनचालक वाहनासह घटनास्थळावरून फरार झाला. पोलिसांनी या घटनेची गंभीर दखल घेत परिसरातील सीसीटीव्ही फुटेज, तांत्रिक माहिती आणि अन्य पुराव्यांच्या आधारे फरार वाहन व चालकाचा शोध सुरू केला आहे.
श्रावण राठोड यांच्या अकाली निधनामुळे पोलीस दलाने एक कर्तव्यनिष्ठ, प्रामाणिक आणि धाडसी सहकारी गमावला आहे. त्यांच्या पश्चात पत्नी व कुटुंबीय असा परिवार आहे. त्यांच्या निधनाचे वृत्त समजताच पोलीस अधिकारी, कर्मचारी, सामाजिक संघटना आणि विविध क्षेत्रातील मान्यवरांकडून त्यांना भावपूर्ण श्रद्धांजली अर्पण करण्यात येत आहे. वाईच्या खाकी दलातील हा विश्वासू शिलेदार काळाच्या पडद्याआड गेल्याने सर्वत्र शोक व्यक्त केला जात आहे.
