पारनेर सुपा:-अंगणवाडी कर्मचाऱ्यांना सरसकट उन्हाळी सुट्टी द्या; जिल्हाधिकाऱ्यांना निवेदन.
पत्रकार राजकुमार इकडे पश्चिम महाराष्ट्र उपाध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
अंगणवाडी कर्मचाऱ्यांना सरसकट उन्हाळी सुट्टी द्या; जिल्हाधिकाऱ्यांना निवेदन.
अंगणवाडी सेविका मदतनीस एकजूट सेवा संघाच्या वतीने निवेदन.
पारनेर, सुपा ; राजकुमार इकडे
राज्यात वाढत्या उन्हाची तीव्रता आणि उष्णतेच्या लाटेमुळे अंगणवाडी सेविका आणि मदतनीस यांच्या आरोग्याचा तसेच सुरक्षिततेचा प्रश्न ऐरणीवर आला आहे. या भीषण परिस्थितीचा विचार करता, अहिल्यानगर जिल्ह्यातील अंगणवाडी सेविका व मदतनीस यांना सरसकट एक महिन्याची उन्हाळी सुट्टी मंजूर करण्यात यावी, अशी आग्रही मागणी करण्यात आली आहे. या मागणीचे निवेदन जिल्हाधिकाऱ्यांना अंगणवाडी सेविका मदतनीस एकजूट सेवा संघाच्या वतीने अध्यक्षा जयश्री वाबळे-झावरे यांनी दिले आहे.
सध्या अहिल्यानगर जिल्ह्यात तापमानाचा पारा ४२ अंश सेल्सिअसच्या पुढे जाऊ लागला आहे. अशा कडक उन्हामध्ये अंगणवाडीत येणाऱ्या लहान बालकांसह गरोदर आणि स्तनदा माता यांच्या आरोग्याला धोका निर्माण होण्याची शक्यता नाकारता येत नाही. सद्यस्थितीत अंगणवाडी सेविका १५ दिवस आणि मदतनीस १५ दिवस अशा आळीपाळीने उन्हाळी सुट्ट्यांचा लाभ घेतात. मात्र, या काळातही अंगणवाडी सुरूच ठेवावी लागते. ग्रामीण भागात अनेक अंगणवाड्या दुर्गम भागात असल्याने, तेथे बालके येत नसतानाही केवळ सेविका किंवा मदतनीस यांना पूर्ण वेळ अंगणवाडीत उपस्थित राहण्याची सक्ती करणे अन्यायकारक असल्याचे निवेदनात म्हटले आहे.
गेल्या काही दिवसांपूर्वी पारनेर तालुक्यातील एका अंगणवाडी शिक्षिकेचा उन्हाच्या तीव्रतेमुळे दुर्दैवी मृत्यू झाला होता. या घटनेमुळे कर्मचाऱ्यांच्या सुरक्षिततेचा प्रश्न अत्यंत गंभीर झाला आहे. याशिवाय, ग्रामीण भागातील एका अंगणवाडीच्या लाभार्थ्यासोबत घडलेल्या अनुचित घटनेची पुनरावृत्ती टाळण्यासाठी प्रशासनाने योग्य ती खबरदारी घेणे गरजेचे असल्याचे नमूद करण्यात आले आहे.
अंगणवाडी सेविका व मदतनीस यांनी शासनाला पूर्ण सहकार्य दर्शवत, पोषण ट्रॅकरवरील सर्व कामे पूर्ण करून देण्याची तसेच बालकांचा आहार घरपोच देण्याची तयारी दर्शवली आहे. कोरोना काळाप्रमाणेच हा पर्याय उपलब्ध करून द्यावा, अशी विनंती त्यांनी केली आहे.
हे निवेदन देताना अंगणवाडी सेविका मदतनीस एकजूट सेवा संघाच्या अध्यक्षा जयश्री वाबळे-झावरे, उपाध्यक्ष छाया सारबंदे, सचिव संगीता गागरे-उंडे आणि नगर अध्यक्ष प्रभावती सत्रे उपस्थित होत्या. तसेच समन्वय समितीचे पदाधिकारी रामकृष्ण पाटील, युवराज बैसाणे आणि संजय मापले यांचे ही सहकार्य लाभले. प्रशासनाने या संवेदनशील विषयावर तात्काळ निर्णय घेऊन कर्मचाऱ्यांना सरसकट एक महिन्याची उन्हाळी सुट्टी द्यावी, अशी मागणी कर्मचाऱ्यांकडून होत आहे.
चौकट :
सध्या तापमानाचा पारा ४२ अंश सेल्सिअसच्या पुढे गेला आहे. अशा भीषण परिस्थितीत लहान बालके, गरोदर व स्तनदा माता यांच्या आरोग्याला धोका निर्माण झाला आहे. नुकत्याच घडलेल्या दुर्दैवी घटना पाहता कर्मचाऱ्यांच्या सुरक्षिततेचा प्रश्न गंभीर बनला आहे. पोषण ट्रॅकरची कामे आणि आहाराचे वाटप आम्ही घरपोच करू, पण कर्मचाऱ्यांच्या जीवाशी खेळ थांबवून प्रशासनाने त्यांना सरसकट एक महिन्याची उन्हाळी सुट्टी द्यावी.
जयश्री वाबळे-झावरे (अध्यक्षा : अंगणवाडी सेविका मदतनीस एकजूट सेवा संघ)
