श्रीरामपूर:-“हाच का तो आत्मनिर्भर भारत?” – रशियाकडून तेल खरेदीसाठी अमेरिकेची परवानगी; वंचित बहुजन आघाडीचे तालुका अध्यक्ष डॉ. गौतम चित्ते यांची भाजप सरकार वर सडकून टीका.
पत्रकार संजय पगारे श्रीरामपूर तालुका अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
“हाच का तो आत्मनिर्भर भारत?” – रशियाकडून तेल खरेदीसाठी अमेरिकेची परवानगी; वंचित बहुजन आघाडीचे तालुका अध्यक्ष डॉ. गौतम चित्ते यांची भाजप सरकार वर सडकून टीका.
श्रीरामपूर :
रशियाकडून तेल खरेदी करण्यासाठी भारताला अमेरिकेची परवानगी घ्यावी लागत असल्याच्या चर्चेमुळे देशाच्या स्वाभिमान आणि परराष्ट्र धोरणावर गंभीर प्रश्नचिन्ह निर्माण झाले आहे. या पार्श्वभूमीवर वंचित बहुजन आघाडीचे श्रीरामपूर तालुका अध्यक्ष डॉ. गौतम चित्ते यांनी पंतप्रधान नरेंद्र मोदी आणि केंद्र सरकारवर जोरदार व आक्रमक शब्दांत टीका केली आहे.
डॉ. गौतम चित्ते म्हणाले की, “पंतप्रधान नरेंद्र मोदी सातत्याने ‘आत्मनिर्भर भारत’च्या घोषणा देत आहेत. देशभर मोठमोठ्या सभा घेऊन आत्मनिर्भरतेचे स्वप्न दाखवले जात आहे. मात्र प्रत्यक्षात भारताला रशियाकडून तेल खरेदी करण्यासाठी जर अमेरिकेची परवानगी घ्यावी लागत असेल, तर हा आत्मनिर्भर भारत नसून पूर्णपणे परावलंबी भारत आहे. देशाचा स्वाभिमान आणि परराष्ट्र धोरण कोणाच्या दबावाखाली चालते आहे, हा गंभीर प्रश्न आता देशातील जनतेसमोर उभा राहिला आहे.”
ते पुढे म्हणाले की, “देशाला आत्मनिर्भर बनवण्याच्या घोषणा करून केवळ जनतेची दिशाभूल केली जात आहे. प्रत्यक्षात महत्त्वाचे आर्थिक आणि धोरणात्मक निर्णय घेण्यासाठी जर भारताला अमेरिकेकडे पाहावे लागत असेल, तर हा देशाच्या सार्वभौमत्वाला आणि स्वाभिमानाला लागलेला मोठा धक्का आहे. जगातील सर्वात मोठी लोकशाही असलेल्या भारताची अशी परावलंबी भूमिका अत्यंत लाजिरवाणी आहे.”
डॉ. चित्ते यांनी केंद्र सरकारवर गंभीर आरोप करत सांगितले की, “मोदी सरकारने परराष्ट्र धोरणाचा वापर केवळ प्रतिमा निर्माण करण्यासाठी केला आहे. ‘मित्र देश’ आणि ‘जागतिक नेतृत्व’ यासारख्या घोषणा केल्या जातात, पण प्रत्यक्षात भारताचे निर्णय स्वतंत्रपणे होत आहेत का, याबाबत शंका निर्माण झाली आहे. देशाच्या आर्थिक धोरणांपासून ते आंतरराष्ट्रीय संबंधांपर्यंत सर्वच बाबतीत पारदर्शकता नसल्याचे दिसत आहे.”
ते म्हणाले की, “देशातील बेरोजगारी, महागाई, शेतकऱ्यांचे प्रश्न, उद्योगधंद्यांची अडचण या गंभीर समस्यांकडे दुर्लक्ष करून केवळ मोठमोठ्या घोषणांच्या माध्यमातून राजकारण केले जात आहे. आत्मनिर्भर भारताचा नारा देऊन जर प्रत्यक्षात परकीय दबावाखाली निर्णय घ्यावे लागत असतील, तर ही घोषणा केवळ राजकीय स्टंट ठरते.”
डॉ. गौतम चित्ते यांनी इशारा देत म्हटले की, “देशाचा स्वाभिमान आणि संविधानिक मूल्यांशी तडजोड करणारे निर्णय घेतले जात असतील, तर वंचित बहुजन आघाडी गप्प बसणार नाही. देशाच्या हितासाठी आणि जनतेच्या स्वाभिमानासाठी आम्ही रस्त्यावर उतरून तीव्र आंदोलन उभारू. देशाच्या सार्वभौमत्वाशी खेळ करणाऱ्या कोणत्याही निर्णयाचा वंचित बहुजन आघाडी कठोर शब्दांत विरोध करेल.”
दरम्यान, या मुद्द्यावरून राजकीय वर्तुळात चर्चा रंगू लागली असून, ‘आत्मनिर्भर भारत’ या घोषणेच्या वास्तवावर पुन्हा एकदा प्रश्न उपस्थित केले जात आहेत. अनेक राजकीय आणि सामाजिक संघटनांकडून केंद्र सरकारने याबाबत स्पष्ट भूमिका मांडावी, अशी मागणीही पुढे येत आहे.
