वाई:-पवार गटाला भूकंप! डॉ.नितीन सावंतांचा भाजपमध्ये प्रवेश; वाईची राजकीय गणिते उलटली निष्ठावंताने फिरवली पाठ; भाजपची ताकद दुप्पट, विरोधक गाफील.
पत्रकार सारिका गवते वाई तालुका महिला अध्यक्ष
ACLS INTERNATIONAL PRESS REPORTER ASSOCIATION राष्ट्रीय अध्यक्ष संपादक प्रल्हाद चव्हाण-8208717483
पवार गटाला भूकंप! डॉ.नितीन सावंतांचा भाजपमध्ये प्रवेश; वाईची राजकीय गणिते उलटली
निष्ठावंताने फिरवली पाठ; भाजपची ताकद दुप्पट, विरोधक गाफील.
वाई | दि. १७ :
सातारा जिल्ह्याच्या राजकारणात आज मोठी उलथापालथ घडली आहे. वाई–खंडाळा–महाबळेश्वर मतदारसंघात राष्ट्रवादी (शरदचंद्र पवार) पक्षाचा मजबूत कणा मानले जाणारे डॉ. नितीन सावंत यांनी शरद पवार गटाची साथ सोडत भारतीय जनता पक्षात जाहीर प्रवेश केला आहे. स्थानिक स्वराज्य संस्थांच्या निवडणुकांच्या तोंडावर झालेल्या या प्रवेशामुळे पवार गटाला जबर धक्का बसला असून, वाईतील राजकीय समीकरणे पूर्णपणे उलटली आहेत.
‘पवार कुटुंबाचे डोळे आणि कान’ म्हणून ओळखले जाणारे डॉ. सावंत हे केवळ पदाधिकारी नव्हते, तर मतदारसंघातील राष्ट्रवादीची संपूर्ण यंत्रणा त्यांच्या खांद्यावर उभी होती. मात्र, गेल्या काही काळापासून पक्षातील अंतर्गत गटबाजी, कुरघोडीचे राजकारण आणि निष्ठावंत कार्यकर्त्यांना डावलण्याचे प्रकार वाढल्याने सावंत अस्वस्थ झाले होते. अखेर पक्षातील घुसमटीचा स्फोट होत त्यांनी भाजपची वाट धरली.
डॉ. सावंतांसोबतच वाई शहराध्यक्ष संतोष शिंदे यांनी यापूर्वीच राजीनामा देत बंडाचे संकेत दिले होते. त्यामुळे वाई मतदारसंघात राष्ट्रवादी (शरदचंद्र पवार) पक्षाची संघटनात्मक बांधणी अक्षरशः ढासळली आहे. दुसरीकडे, भाजपला या प्रवेशामुळे अनुभवी नेतृत्वासह मोठी व्होट बँक मिळाल्याने भाजपचा राजकीय वरचष्मा स्पष्टपणे वाढला आहे.
जिल्हा परिषद आणि पंचायत समितीच्या निवडणुकीच्या पार्श्वभूमीवर राष्ट्रवादीला आता नव्या चेहऱ्यांचा शोध घ्यावा लागणार असून, ही लढाई त्यांच्यासाठी अधिक अवघड ठरणार आहे. विशेष म्हणजे, मदत व पुनर्वसन मंत्री ना. मकरंद पाटील यांच्या बालेकिल्ल्यातच भाजपने डॉ. सावंतांच्या माध्यमातून थेट ‘होम ग्राऊंड’वर घुसखोरी केल्याची चर्चा राजकीय वर्तुळात रंगू लागली आहे.
आता एकच प्रश्न वाईच्या राजकारणात घुमतोय—
आयुष्यभर पवार विचारधारेचा झेंडा वाहणाऱ्या डॉ. नितीन सावंतांना पक्षाबाहेर जाण्यास भाग पाडणारे ‘ते’ अदृश्य हात कोणाचे? आणि भाजप त्यांना या मतदारसंघात किती मोठी जबाबदारी देणार? याकडे संपूर्ण वाई तालुक्याचे लक्ष लागले आहे.
चौकट | डॉ. नितीन सावंत यांची भूमिका
“मतदारसंघातील प्रलंबित प्रश्न आणि विकासाची गती पाहता, सत्ताधारी पक्षासोबत राहूनच जनतेची कामे अधिक प्रभावीपणे करता येतील, असा माझा ठाम विश्वास आहे. पंतप्रधान नरेंद्र मोदी आणि राज्यातील नेतृत्व ज्या वेगाने विकास करत आहे, त्या प्रवाहात सहभागी होण्याचा निर्णय मी घेतला आहे. उपमुख्यमंत्री देवेंद्र फडणवीस आणि भाजपच्या वरिष्ठ नेतृत्वावर माझा पूर्ण विश्वास आहे. मतदारसंघाच्या सर्वांगीण प्रगतीसाठी भाजप हा सक्षम पर्याय आहे.”
