वाई:-महागणपती घाटावर ‘दीपोत्सव स्वरांचा’चा दिमाखदार सोहळा; भक्तिगीत, भावगीत अन् नाट्यगीतांच्या सुरेल मैफलीने रसिकांची मने जिंकली!
राष्ट्रीय अध्यक्ष संपादक प्रल्हाद चव्हाण – 8208717483
वाई:-महागणपती घाटावर ‘दीपोत्सव स्वरांचा’चा दिमाखदार सोहळा; भक्तिगीत, भावगीत अन् नाट्यगीतांच्या सुरेल मैफलीने रसिकांची मने जिंकली!
वाई, दि. १२ : दिव्यांची रोषणाई, कृष्णामाईचा नयनरम्य काठ आणि कानावर पडणारे सुरेल स्वर… अशा भारलेल्या वातावरणात वाईच्या ऐतिहासिक महागणपती घाटावर दीपावली पाडव्याची संध्याकाळ अविस्मरणीय ठरली. प्रसिद्ध गायक प्रथेमेश लगाटे आणि मुग्धा वैशंपायन यांच्या गायनाने रसिकांना अक्षरशः मंत्रमुग्ध केले. ‘दीपोत्सव स्वरांचा’ या सांगीतिक सोहळ्याने वाईच्या सांस्कृतिक वैभवात सुरेल भर घालत उपस्थितांची मने जिंकली.
दिवाळीच्या उत्साहाला संगीताची जोड देणाऱ्या या अनोख्या उपक्रमासाठी महागणपती घाटावर रसिकांची मोठी उपस्थिती होती. कार्यक्रमाची सुरुवात मान्यवरांच्या हस्ते दीपप्रज्वलनाने झाली. त्यानंतर उपस्थित मान्यवरांचे शाल व श्रीफळ देऊन स्वागत करण्यात आले. विधानपरिषदेचे आमदार धैर्यशील कदम यांच्या हस्ते श्रीफळ वाढवून कार्यक्रमाचा शुभारंभ करण्यात आला.
यावेळी नगराध्यक्ष अनिल सावंत यांनी या सांगीतिक सोहळ्यामागील संकल्पना स्पष्ट केली. दीपावलीच्या निमित्ताने वाईकरांना दर्जेदार सांस्कृतिक अनुभवाची भेट देण्याच्या उद्देशाने या कार्यक्रमाचे आयोजन केल्याचे त्यांनी सांगितले. साक्षी कन्स्ट्रक्शन, इंद्रजा कन्स्ट्रक्शन, मोशन लर्निंग एक्सप्रेस, बिल्डर असोसिएशन आणि इंडिया व्हॉइस सेंटर यांच्या सहकार्याने हा उपक्रम साकारण्यात आला.
आमदार धैर्यशील कदम यांनी आपल्या मनोगतात ‘दक्षिण काशी’ म्हणून ओळखल्या जाणाऱ्या वाईच्या ऐतिहासिक, धार्मिक आणि सांस्कृतिक परंपरेचा गौरव केला. महागणपती आणि कृष्णामाईच्या पवित्र सान्निध्यात आयोजित या सांगीतिक सोहळ्याचा वाईकरांनी मनमुराद आनंद घ्यावा, असे आवाहन त्यांनी केले. यापूर्वी वाईत झालेल्या लघुकुंभ सोहळ्याला लाखो भाविकांनी उपस्थिती लावून कृष्णामाईचे आणि साधुसंतांचे दर्शन घेतल्याच्या आठवणींनाही त्यांनी उजाळा दिला.
राज्यातील दुष्काळी परिस्थितीतून शेतकरी बांधवांना बाहेर पडण्याचे बळ मिळावे, बळीराजाच्या जीवनात सुख-समृद्धी नांदावी आणि शेतकरी कुटुंबांच्या चेहऱ्यावर आनंद फुलावा, अशी प्रार्थना त्यांनी महागणपतीच्या चरणी केली. उपस्थित वाईकरांना दीपावलीच्या शुभेच्छाही त्यांनी दिल्या.
लगाटे-वैशंपायन यांच्या सुरांनी महागणपती घाट दुमदुमला!
कार्यक्रमाचा खरा रंग चढला तो प्रथेमेश लगाटे आणि मुग्धा वैशंपायन यांच्या बहारदार गायनाने. भक्तिगीतांमधील भक्तिभाव, भावगीतांमधील भावस्पर्शी अनुभूती आणि नाट्यगीतांमधील नाट्यमयता अशा विविध रंगांनी सजलेल्या त्यांच्या सादरीकरणाने रसिकांना सुरेल मेजवानी मिळाली. प्रत्येक गीताला उपस्थितांकडून उत्स्फूर्त दाद मिळत होती.
कृष्णामाईचा शांत किनारा, ऐतिहासिक महागणपती घाटाचे देखणे वातावरण आणि कलाकारांच्या आवाजातील सुरेल जादू यांचा अनोखा संगम या मैफलीत अनुभवायला मिळाला. दिवाळीच्या आनंदात संगीताची भर पडल्याने उपस्थित रसिकांसाठी हा सोहळा खास पर्वणी ठरला.
या सोहळ्यास आमदार धैर्यशील कदम, नगराध्यक्ष अनिल सावंत, उपनगराध्यक्ष घनश्याम चक्के, सर्व नगरसेवक व नगरसेविका, पंचायत समिती सदस्य सुरभी भोसले, स्वप्निल गायकवाड, सचिन पाटील, दीपक ननावरे, रोहित वाडकर, प्रतापराव यादव, सरिता सावंत, विजय पाटणे, संतोष जमदाडे, आप्पा मालुसरे, सचिन गांधी, प्रवीण जाधव, निलेश मोरे, डॉ. मकरंद पोरे, स्वप्नील भिलारे, संदेश सावंत यांच्यासह ज्येष्ठ नागरिक, महिला आणि मोठ्या संख्येने वाईकर उपस्थित होते.
सुरांच्या मैफलीने वाईच्या सांस्कृतिक वैभवात मानाचा तुरा!
परंपरा, भक्तिभाव आणि संगीत यांचा सुरेख संगम घडवणारा हा सोहळा वाईकरांच्या स्मरणात राहणारा ठरला. नगराध्यक्ष अनिल सावंत यांच्या पुढाकारातून आयोजित या उपक्रमाचे नागरिकांनी विशेष कौतुक केले. दिवाळीच्या रोषणाईसोबतच सुरांच्या प्रकाशाने उजळलेली महागणपती घाटावरील ही संध्याकाळ वाईच्या सांस्कृतिक वैभवाची नवी ओळख ठरली.
