वाई:-वाईत सण-उत्सवांच्या पार्श्वभूमीवर पोलिसांची ‘हाय अलर्ट’ तयारी; ६२ पोलीस पाटलांची विशेष बैठक.
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) वाई:-वाईत सण-उत्सवांच्या पार्श्वभूमीवर पोलिसांची ‘हाय अलर्ट’ तयारी; ६२ पोलीस पाटलांची विशेष बैठक.
वाई, दि. २४ : आगामी काळात येणारे ईद-ए-मिलाद, गणेशोत्सव, दहीहंडी आदी सण-उत्सव शांततेत आणि सुरळीत पार पडावेत यासाठी वाई पोलीस ठाण्याच्या वतीने पोलीस पाटलांची विशेष बैठक किसनवीर सभागृह, पंचायत समिती वाई येथे पार पडली. उपविभागीय पोलीस अधिकारी सुनील साळुंखे यांच्या मार्गदर्शनाखाली आणि पोलीस निरीक्षक प्रदीप सूर्यवंशी यांच्या प्रमुख उपस्थितीत ही बैठक संपन्न झाली.
बैठकीत सणासुदीच्या काळात वाद्यांबाबत योग्य ती खबरदारी घेणे, कायदा-सुव्यवस्थेचा प्रश्न निर्माण होईल असे जिवंत देखावे, पोस्टर्स व बॅनर्स न लावणे याबाबत सर्व पोलीस पाटलांना स्पष्ट सूचना देण्यात आल्या. तसेच गावपातळीवर एमडी ड्रग्जसंदर्भात सतर्क राहून संशयास्पद व्यक्ती, हालचाली किंवा वस्तू आढळल्यास तात्काळ पोलीस ठाण्याला कळविण्याचे तसेच नागरिकांमध्ये याबाबत जनजागृती करण्याचे आवाहनही करण्यात आले.
घरमालकांनी आपल्या भाडेकरूंची माहिती पोलीस ठाण्यात नोंदवावी, तसेच सध्या पावसाळ्याचे दिवस असल्याने आपत्कालीन परिस्थिती उद्भवल्यास संबंधित यंत्रणा व पोलीस ठाण्याला तातडीने कळविण्याच्या सूचनाही देण्यात आल्या.
या बैठकीस वाई पोलीस ठाणे हद्दीतील तब्बल ६२ पोलीस पाटील उपस्थित होते. बैठक शांततेत व सुसंवादी वातावरणात पार पडली.
2) वाई:-सणांच्या पार्श्वभूमीवर वाई पोलिसांचा ‘अलर्ट मोड’; दंगा नियंत्रणाची रंगीत तालीम, शहरातून रूट मार्च.
सातारा | वाई, दि. २४ : ईद-ए-मिलाद आणि रक्षाबंधनाच्या पार्श्वभूमीवर वाई शहरातील कायदा व सुव्यवस्था अबाधित ठेवण्यासाठी वाई पोलिसांनी सोमवारी दंगा नियंत्रणाची रंगीत तालीम घेतली. संभाव्य अनुचित परिस्थितीला तातडीने आणि प्रभावीपणे सामोरे जाण्यासाठी पोलिस दलाने विविध उपाययोजनांचा सराव केला. त्यानंतर शहरातील प्रमुख मार्गांवरून रूट मार्च काढत पोलिसांनी सज्जतेचा संदेश दिला.
उपविभागीय पोलीस अधिकारी सुनील साळुंखे यांच्या मार्गदर्शनाखाली सकाळी १०.३० ते दुपारी १२.२० या कालावधीत ही रंगीत तालीम पार पडली. पोलीस निरीक्षक प्रदीप सूर्यवंशी, पोलीस उपनिरीक्षक काळे यांच्यासह वाई व पाचगणी पोलीस ठाण्यांचे अधिकारी-कर्मचारी, राज्य राखीव पोलीस दलाचे जवान तसेच होमगार्ड यामध्ये सहभागी झाले.
तालमीदरम्यान दंगलसदृश परिस्थिती निर्माण झाल्यास जमाव नियंत्रण, तातडीची पोलिसी कारवाई, पथकांमधील समन्वय आणि परिस्थिती नियंत्रणात आणण्यासाठी आवश्यक असलेल्या विविध रणनीतींचा प्रत्यक्ष सराव करण्यात आला. अचानक उद्भवणाऱ्या परिस्थितीवर वेगाने नियंत्रण मिळविण्यासाठी पोलिसांची कार्यक्षमता तपासण्यात आली.
रंगीत तालीम संपल्यानंतर पोलिसांनी शहरातील प्रमुख भागांतून रूट मार्च काढला. किसनवीर चौक येथून सुरू झालेला मार्च पी. आर. चौक, जामा मशीद, चावडी चौक, दातार हॉस्पिटल, ब्राह्मणशाही चौक मार्गे पुन्हा किसनवीर चौक येथे आला. त्यानंतर मोठ्या पुलावरून मार्गक्रमण करत हा रूट मार्च वाई पोलीस ठाण्यात पोहोचला. या कारवाईसाठी तीन शासकीय वाहनांचा वापर करण्यात आला.
आगामी सण-उत्सवांच्या पार्श्वभूमीवर शहरात शांतता, सलोखा आणि सुव्यवस्था कायम राहावी यासाठी पोलिसांनी अधिकारी व कर्मचाऱ्यांना आवश्यक सूचना दिल्या. नागरिकांनी अफवांवर विश्वास न ठेवता प्रशासनाला सहकार्य करावे आणि सण-उत्सव शांततेत व उत्साहात साजरे करावेत, असे आवाहन पोलिसांनी केले.
3) भुईंज:-गांजाच्या काळ्या धंद्यावर पोलिसांचा घणाघात! दोघे तस्कर जेरबंद; ५ किलो ७३० ग्रॅम गांजा जप्त.
फलटणच्या सोमवार पेठेत पोलिसांचा छापा; आतापर्यंत सव्वा लाखांचा अमली पदार्थांचा साठा जप्त.
सातारा | भुईंज, दि. २४ : अमली पदार्थांच्या अवैध धंद्याविरोधात भुईंज पोलिसांनी आणि स्थानिक गुन्हे शाखेने धडक मोहीम सुरू केली असून, गांजा विक्रीच्या प्रकरणात आणखी दोघांना बेड्या ठोकण्यात आल्या आहेत. फलटण शहरातील सोमवार पेठेत केलेल्या कारवाईत ३ किलो ९३० ग्रॅम गांजा जप्त करण्यात आला. या कारवाईमुळे आतापर्यंत या प्रकरणातील तीन आरोपींकडून ५ किलो ७३० ग्रॅम गांजा आणि तब्बल १ लाख २१ हजार ३३० रुपयांचा मुद्देमाल जप्त करण्यात आला आहे.
गांजा विक्रीप्रकरणी भुईंज पोलीस ठाण्यात दाखल असलेल्या गुन्ह्याचा तपास सुरू असताना पोलिसांना मिळालेल्या माहितीच्या आधारे सोमवार पेठ परिसरात छापा टाकण्यात आला. परिविक्षाधीन पोलीस उपअधीक्षक पूनम झगडे यांच्या नेतृत्वाखाली स्थानिक गुन्हे शाखेच्या पथकाने ही कारवाई केली.
छाप्यात अमरदीप संजय गायकवाड (वय ३८) आणि संजय रायबा गायकवाड (वय ६०) यांना ताब्यात घेण्यात आले. त्यांच्याकडून ८२ हजार ५३० रुपये किमतीचा ३ किलो ९३० ग्रॅम गांजा हस्तगत करण्यात आला. या कारवाईनंतर अमली पदार्थांच्या विक्री-वितरणाच्या साखळीचा तपास अधिक वेगाने सुरू करण्यात आला आहे.
पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी सुनील साळुंखे यांच्या मार्गदर्शनाखाली ही कारवाई पार पडली. पोलीस निरीक्षक विश्वजीत घोडके, सहाय्यक पोलीस निरीक्षक पृथ्वीराज ताटे यांच्यासह स्थानिक गुन्हे शाखा आणि भुईंज पोलीस ठाण्यातील अधिकारी व कर्मचाऱ्यांनी कारवाईत सहभाग घेतला.
अमली पदार्थांची विक्री, वाहतूक अथवा साठवणूक करणाऱ्यांची गय केली जाणार नाही, असा स्पष्ट इशारा पोलिसांनी दिला आहे. गांजाच्या अवैध धंद्याचे जाळे उखडून काढण्यासाठी पोलिसांकडून तपास आणि कारवाई आणखी तीव्र केली जाण्याची शक्यता आहे.
4) वाई:-एकसरच्या लेकीची जिल्हास्तरावर दमदार झेप! ओजस्वी शिर्केचे शिष्यवृत्ती परीक्षेत घवघवीत यश.
सातारा | वाई, दि. २४ : महाराष्ट्र राज्य परीक्षा परिषदेतर्फे घेण्यात आलेल्या इयत्ता चौथीच्या प्राथमिक शिष्यवृत्ती परीक्षेत जिल्हा परिषद केंद्र शाळा, एकसर (ता. वाई) येथील विद्यार्थिनी कु. ओजस्वी शुभांगी प्रमोद शिर्के हिने उल्लेखनीय यश संपादन करत आपल्या गुणवत्तेची चमक दाखवून दिली आहे. प्रतिकूल परिस्थितीवर मात करत ग्रामीण भागातील विद्यार्थ्यांनीही स्पर्धात्मक परीक्षांमध्ये मोठी भरारी घेऊ शकते, हे ओजस्वीने आपल्या यशातून सिद्ध केले आहे.
ओजस्वीने शिष्यवृत्ती परीक्षेत सातारा जिल्ह्यात ग्रामीण विभागातून ७५ वा, शहरी विभागातून २९ वा, तर वाई तालुक्यात पाचवा क्रमांक पटकावला. तिच्या या यशामुळे एकसरसह व्याहळी, म्हसवे परिसराच्या शैक्षणिक क्षेत्रात आनंदाचे वातावरण निर्माण झाले आहे.
ओजस्वीचे आई-वडील दोघेही शिक्षक असल्याने घरातूनच तिला अभ्यासाची शिस्त आणि शिक्षणाची प्रेरणा मिळाली. लहानपणापासूनच विविध स्पर्धा परीक्षांमध्ये सातत्यपूर्ण कामगिरी करत तिने आपल्या गुणवत्तेची छाप उमटवली आहे. अक्षरगंगा परीक्षेत जिल्ह्यात प्रथम क्रमांक, प्रज्ञाशोध परीक्षेत जिल्ह्यात सातवा, अभिरूप शिष्यवृत्ती परीक्षेत आठवा, तर बीडीएस परीक्षेत देशपातळीवर ४३ वा क्रमांक मिळवत तिने यापूर्वीही उल्लेखनीय कामगिरी केली आहे.
भविष्यात केंद्रीय लोकसेवा आयोगाची (UPSC) परीक्षा उत्तीर्ण होऊन उच्चपदस्थ अधिकारी होण्याचे स्वप्न ओजस्वीने मनाशी बाळगले आहे. तिच्या या ध्येयाकडे पाहता, आतापासूनच स्पर्धात्मक परीक्षांची भक्कम तयारी करण्याची तिची जिद्द कौतुकास्पद ठरत आहे.
या यशासाठी ओजस्वीला शाळेच्या मुख्याध्यापिका प्रभावती थोरवे, मार्गदर्शक शिक्षक तसेच आई-वडिलांचे मोलाचे मार्गदर्शन लाभले. तिच्या यशाबद्दल गटशिक्षणाधिकारी हर्षवर्धन मोरे, विस्ताराधिकारी साईनाथ वाळेकर, केंद्रप्रमुख क्रांती तापकीर, शाळा व्यवस्थापन समितीचे अध्यक्ष मयूर चव्हाण पाटील यांच्यासह मुख्याध्यापिका प्रभावती थोरवे, एकसर, व्याहळी व म्हसवे परिसरातील ग्रामस्थ आणि शिक्षणप्रेमींनी अभिनंदन केले. ओजस्वीच्या पुढील शैक्षणिक वाटचालीसाठी सर्व स्तरांतून शुभेच्छांचा वर्षाव होत आहे.
5) वाई:-गणेशोत्सवापूर्वी वाई पोलिसांचा रिक्षाचालकांना ‘कडक इशारा’! ९०० रिक्षामालक-चालकांची बैठक; नियम तोडल्यास कारवाई अटळ.
सातारा | वाई, दि. २४ : आगामी गणेशोत्सवाच्या पार्श्वभूमीवर शहरातील वाहतूक व्यवस्था सुरळीत ठेवण्यासाठी वाई पोलिसांनी रिक्षामालक आणि चालकांना नियमांचे काटेकोर पालन करण्याचे स्पष्ट निर्देश दिले. वाई पोलीस ठाण्याच्या वतीने रिक्षामालक-चालकांची विशेष बैठक घेण्यात आली. या बैठकीला तब्बल ९०० रिक्षामालक व चालकांनी सहभाग नोंदवला.
गणेशोत्सव काळात शहरात मोठ्या प्रमाणावर गर्दी होण्याची शक्यता असल्याने वाहतूक कोंडी, बेशिस्त पार्किंग आणि नागरिकांना होणारा त्रास टाळण्यासाठी पोलिसांनी रिक्षाचालकांना विशेष सूचना दिल्या. ‘नो पार्किंग’, ‘नो हॉर्न’, वाहन चालविताना आवश्यक कागदपत्रे, परवाना, पीयूसी तसेच वाहतूक नियमांचे पालन करण्याचे निर्देश यावेळी देण्यात आले.
रिक्षा चालविताना प्रवाशांशी वाद घालणे, उद्धट वर्तन करणे किंवा वाहतुकीला अडथळा निर्माण होईल अशा पद्धतीने रिक्षा उभी करणे खपवून घेतले जाणार नाही, असा स्पष्ट इशारा पोलिसांनी दिला. गणेशोत्सव काळात कायदा व सुव्यवस्था अबाधित ठेवण्यासाठी रिक्षाचालकांनी पोलिसांना सहकार्य करावे, असे आवाहनही करण्यात आले.
शहरातील प्रमुख चौक, बाजारपेठा आणि गर्दीच्या ठिकाणी वाहतुकीला अडथळा निर्माण होणार नाही, याची खबरदारी घेण्याच्या सूचना देण्यात आल्या. नियमांचे उल्लंघन करणाऱ्या वाहनचालकांवर दंडात्मक कारवाई करण्याबरोबरच आवश्यकतेनुसार कठोर कायदेशीर कारवाई केली जाईल, असे पोलिसांनी स्पष्ट केले.
गणेशोत्सवाच्या काळात वाहतूक नियंत्रणासाठी पोलिसांकडून विशेष नियोजन करण्यात येणार असून, रिक्षाचालकांनीही शिस्त पाळून प्रशासनाला सहकार्य करावे, असे आवाहन करण्यात आले. बैठकीस वाई पोलीस ठाण्याचे अधिकारी, पोलीस कर्मचारी तसेच रिक्षा संघटनेचे पदाधिकारी व चालक मोठ्या संख्येने उपस्थित होते.
“उत्सवाच्या काळात वाहतूक कोंडी अथवा नागरिकांना त्रास होईल, अशी कोणतीही बेशिस्त वर्तणूक सहन केली जाणार नाही. नियमभंग करणाऱ्यांवर कारवाई निश्चित आहे,” असा कडक संदेश या बैठकीतून रिक्षाचालकांना देण्यात आला.
