पुणे विद्यापीठात कॉकरोच जनता पक्षाचा एल्गार; शिक्षण व्यवस्थेतील गैरप्रकारांविरोधात विद्यार्थ्यांचा प्रचंड आक्रोश.
पत्रकार विजय देवकुळे पुणे जिल्हा उपाध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
पुणे विद्यापीठात कॉकरोच जनता पक्षाचा एल्गार; शिक्षण व्यवस्थेतील गैरप्रकारांविरोधात विद्यार्थ्यांचा प्रचंड आक्रोश.
पुणे: प्रतिनिधी :
सावित्रीबाई फुले पुणे विद्यापीठाच्या परिसरात काल कॉकरोच जनता पक्षाच्या (CJP) नेतृत्वाखाली हजारो विद्यार्थी, युवक आणि समर्थक एकत्र येत शिक्षण व्यवस्थेतील कथित गैरप्रकारांविरोधात जोरदार मोर्चा काढण्यात आला. केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसह परीक्षा व्यवस्थेतील पारदर्शकता आणि विद्यार्थ्यांना न्याय मिळावा यासाठी आंदोलनकर्त्यांनी घोषणाबाजी करत संपूर्ण परिसर दणाणून सोडला.
मोर्चाचे नेतृत्व Abhijeet Dipke यांनी केले. आंदोलनादरम्यान विद्यार्थ्यांच्या विविध समस्या, पेपरफुटी प्रकरणे, भरती प्रक्रियेतील कथित अनियमितता आणि शिक्षण क्षेत्रातील वाढत्या गोंधळाविरोधात तीव्र नाराजी व्यक्त करण्यात आली. यावेळी “धर्मेंद्र प्रधान इस्तीफा दो” अशा घोषणांनी विद्यापीठ परिसर दुमदुमून गेला.
मोर्चादरम्यान पक्षाकडून पाच कलमी “एक्झाम मॅनिफेस्टो” देखील जाहीर करण्यात आले. परीक्षा रद्द झाल्यास विद्यार्थ्यांचे नुकसान भरून काढणे, पेपरफुटी प्रकरणात जबाबदार अधिकाऱ्यांवर कठोर कारवाई आणि विद्यार्थ्यांच्या हिताचे निर्णय तातडीने घेण्याची मागणी यामध्ये करण्यात आली.
विशेष म्हणजे हा मोर्चा केवळ पुण्यापुरता मर्यादित नसून देशव्यापी आंदोलनाची सुरुवात असल्याचा दावा आयोजकांनी केला आहे. पुण्यातून सुरू झालेला हा लढा दिल्लीतील जंतर-मंतरपर्यंत नेण्याचा निर्धार आंदोलनकर्त्यांनी व्यक्त केला.
आंदोलनात अनेक विद्यार्थी संघटना, युवक आणि सामाजिक कार्यकर्त्यांनी सहभाग घेतला. शिक्षण क्षेत्रातील प्रश्नांवर सरकारने तातडीने भूमिका स्पष्ट करावी, अन्यथा आंदोलन आणखी तीव्र करण्यात येईल, असा इशाराही यावेळी देण्यात आला.
“विद्यार्थ्यांच्या भवितव्याशी खेळणाऱ्यांना आता उत्तर द्यावेच लागेल. पुण्याच्या शैक्षणिक राजधानीतून उठलेला हा आवाज आता देशभर घुमणार आहे,” असा निर्धार आंदोलनकर्त्यांनी व्यक्त केला.
