मायणी:-“कलेढोण-विखळे परिसरात अवकाळी पावसाचा धडाका; वादळी वाऱ्यांसह मुसळधार सरींनी जनजीवन विस्कळीत”
ज्येष्ठ पत्रकार प्रा.दिलीप पुस्तके सातारा
राष्ट्रीय अध्यक्ष संपादक प्रल्हाद चव्हाण – 8208717483
“कलेढोण-विखळे परिसरात अवकाळी पावसाचा धडाका; वादळी वाऱ्यांसह मुसळधार सरींनी जनजीवन विस्कळीत”
मायणी प्रतिनिधी | कलेढोण
कलेढोण व विखळे परिसरात आज दुपारी सुमारे १ वाजल्यापासून वादळी वाऱ्यासह जोरदार पावसाने अचानक हजेरी लावली. अवकाळी पावसाच्या या जोरदार सरींमुळे परिसरातील जनजीवन काही काळासाठी विस्कळीत झाले.
दुपारपासून सुरू झालेला पाऊस सलग दोन तासांहून अधिक काळ कोसळत राहिला. पावसाचा जोर इतका प्रचंड होता की कलेढोणमधील अनेक रस्ते अक्षरशः पाण्याखाली गेले. रस्त्यांवरून आणि नाल्यांतून पाणी ओसंडून वाहत असल्याचे चित्र पाहायला मिळाले.
यावेळी वादळी वाऱ्यांसह विजांचा कडकडाटही होत होता. आकाशात ढगांचा प्रचंड गडगडाट होत असल्याने नागरिकांमध्ये काही प्रमाणात भीतीचे वातावरण निर्माण झाले होते.
या अवकाळी पावसामुळे वातावरणात अचानक गारवा निर्माण झाला असून, सध्या उन्हाळा सुरू आहे की पावसाळा, असा प्रश्न नागरिकांना पडला आहे.
दरम्यान, उद्यापासून सुरू होणाऱ्या हनुमान यात्रेवरही या पावसाचा परिणाम होण्याची शक्यता व्यक्त केली जात आहे. अचानक झालेल्या पावसामुळे यात्रेच्या तयारीवर परिणाम झाला असून, उत्साहावरही काहीसा परिणाम होईल की काय अशी चिंता व्यक्त होत आहे.
एकूणच, कलेढोण व विखळे परिसरात अवकाळी पावसाने जोरदार एन्ट्री करत सर्वच चित्र बदलून टाकले आहे. नागरिकांना या बदलत्या हवामानाचा सामना करत सतर्क राहण्याचे आवाहन करण्यात येत आहे.
