वाई पालिकेचा हायटेक पॉवर शो! हाऊसफुल्ल विशेष सभेत पाच ऐतिहासिक निर्णय.
पत्रकार सारिका गवते वाई तालुका महिला अध्यक्ष
ACLS INTERNATIONAL PRESS REPORTER ASSOCIATION राष्ट्रीय अध्यक्ष संपादक प्रल्हाद चव्हाण-8208717483
वाई पालिकेचा हायटेक पॉवर शो! हाऊसफुल्ल विशेष सभेत पाच ऐतिहासिक निर्णय.
वाई | दि. १६ :
तीर्थक्षेत्र आणि ‘दक्षिण काशी’ म्हणून ओळखल्या जाणाऱ्या वाई शहराच्या विकासाचा वेग आता स्पष्टपणे वाढताना दिसत आहे. नवनिर्वाचित नगराध्यक्ष अनिल सावंत यांच्या नेतृत्वाखाली शुक्रवार, दि. १६ जानेवारी २०२६ रोजी वाई नगरपरिषदेची पहिलीच विशेष सभा पार पडली. या सभेने वाई पालिकेचा नवा, ठाम आणि पारदर्शक चेहरा वाईकरांसमोर मांडला.
नगरपरिषदेच्या श्रीमंत छत्रपती शिवाजी महाराज सभागृहात पार पडलेली ही सभा केवळ ‘हाऊसफुल्ल’ नव्हे, तर हायटेक कारभाराचं जिवंत उदाहरण ठरली. सभेचं संपूर्ण कामकाज पालिकेच्या प्रवेशद्वारावर थेट डिजिटल स्क्रीनवर लाईव्ह प्रक्षेपित करण्यात आलं. त्यामुळे प्रशासनाचे निर्णय बंद दरवाजाआड न राहता थेट जनतेच्या नजरेसमोर झाले. वाई पालिकेच्या इतिहासात पहिल्यांदाच पारदर्शकतेचा असा ठोस प्रयोग करण्यात आला.
वादळी ठरण्याची शक्यता असलेले विषयही या सभेत कोणताही गोंधळ न होता एकमताने मंजूर करण्यात आले. सभागृहाने शहराच्या भविष्यासाठी अत्यंत महत्त्वाचे असे पाच निर्णय घेतले. न्यायालयासमोर शहर विकास योजनेअंतर्गत छत्रपती शिवाजी महाराजांचा भव्य पुतळा, कृष्णा नदीच्या तीरावरील दुर्गंधी दूर करण्यासाठी दलदलीचे भाग बुजवणे, नाना–नानी पार्कमध्ये लेझर शो व सोलर लाईट्स, परशुराम मंदिर परिसरात रॅम्प व पायऱ्या बांधणे आणि वाई शहराच्या हद्दवाढीचा प्रस्ताव — या सर्व निर्णयांनी विकासाचा स्पष्ट रोडमॅप आखला.
शहरातील वाहतूक शिस्त लावण्यासाठी नो-पार्किंग झोन, एकेरी वाहतूक, सीसीटीव्ही कॅमेरे आणि बेशिस्त वाहनांवर थेट कारवाईसाठी क्रेन व्हॅन घेण्यास सभेने मंजुरी दिली. शिक्षणाच्या क्षेत्रातही मोठा निर्णय घेत पालिकेच्या दोन शाळा आता इंग्रजी माध्यमात चालवल्या जाणार आहेत. शाळेनंतरच्या वेळेत या इमारती स्पर्धा परीक्षा देणाऱ्या विद्यार्थ्यांसाठी अभ्यासिका व अकॅडमी म्हणून उपलब्ध करून दिल्या जाणार आहेत.
हरित लवादाकडून पालिकेला ठोठावण्यात आलेल्या २५ लाख रुपयांच्या दंडावर सभेत सडेतोड चर्चा झाली. यावेळी नगराध्यक्ष अनिल सावंत यांनी स्पष्ट केले की, दंड जरी भरावा लागला असला तरी तेवढ्याच रकमेचा निधी ‘नदी सुधार योजनेसाठी’ लवादाकडून मंजूर करून घेण्यात पालिका यशस्वी ठरली आहे. म्हणजेच, दंडालाही विकासात रूपांतरित करण्यात आलं आहे.
पालिकेच्या मुख्याधिकारी संजीवनी दळवी यांनी,
“सभागृहाच्या मंजुरीशिवाय एक रुपयाही खर्च केला जाणार नाही. सर्व कामांचे सविस्तर प्रस्ताव नगरसेवकांना आधीच दिले जातील,” असे स्पष्ट करत पारदर्शक कारभाराची ठाम घोषणा केली.
या विशेष सभेस उपनगराध्यक्ष घनशाम चक्के, ज्येष्ठ नगरसेवक भारत खामकर, संदीप जावळे, विजय ढेकाणे, प्रसाद बनकर, संग्राम पवार यांच्यासह सर्व नगरसेवक-नगरसेविका व पालिकेचे विभागप्रमुख मोठ्या संख्येने उपस्थित होते. कार्यालयीन अधीक्षक नारायण गोसावी यांनी विषयपत्रिकेचे वाचन केले.
