वाई:-जिल्हा बँकेच्या निवडणुकीत महायुतीने फुंकले रणशिंग! शिवेंद्रराजेंचा स्पष्ट संदेश; ‘सहकाराच्या हितासाठी राजकारण बाजूला ठेवा!’
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
1) वाई:-जिल्हा बँकेच्या निवडणुकीत महायुतीने फुंकले रणशिंग! शिवेंद्रराजेंचा स्पष्ट संदेश; ‘सहकाराच्या हितासाठी राजकारण बाजूला ठेवा!’
मकरंद आबांच्या नेतृत्वावर विश्वासाची मोहोर; वाई-खंडाळा-महाबळेश्वरमध्ये महायुतीची जोरदार मोर्चेबांधणी, सभासद मेळाव्याला मोठी गर्दी
सातारा | वाई, दि. ३० : सहकाराचा गड असलेल्या सातारा जिल्हा मध्यवर्ती सहकारी बँकेच्या निवडणुकीचे रण तापू लागले असून, महायुतीनेही आपली राजकीय ताकद पणाला लावण्यास सुरुवात केली आहे. भाजप, राष्ट्रवादी काँग्रेस आणि शिवसेना या तीन पक्षांनी एकत्र येत निवडणुकीच्या मैदानात उतरविलेल्या महायुतीच्या प्रचाराला वाई, खंडाळा आणि महाबळेश्वर तालुक्यांतून बळ देण्यासाठी आयोजित सभासद मेळाव्यात एकजुटीचा नारा घुमला. ‘जिल्हा बँकेचा विकास हा पक्षीय राजकारणापेक्षा मोठा आहे. मतभेद विसरून सहकाराच्या हितासाठी एकत्र या,’ असे थेट आवाहन सार्वजनिक बांधकाम मंत्री ना. शिवेंद्रसिंहराजे भोसले यांनी केले.
या मेळाव्यात मदत व पुनर्वसन मंत्री ना. मकरंद पाटील यांनी जिल्हा बँकेच्या कारभाराबाबत आपली भूमिका स्पष्ट करताना सर्वसमावेशक आणि पक्षनिरपेक्ष नेतृत्वाचा निर्धार व्यक्त केला.
ना. शिवेंद्रसिंहराजे भोसले म्हणाले, सातारा जिल्हा मध्यवर्ती सहकारी बँक ही जिल्ह्यातील शेतकऱ्यांची आर्थिक ताकद आहे. सहकारातील अनेक दिग्गजांच्या दूरदृष्टीतून आणि योगदानातून बँकेने आर्थिक सक्षमतेचा टप्पा गाठला आहे. आज शेतकऱ्यांना कर्जपुरवठा करण्यापासून ते वैद्यकीय शिक्षण घेणाऱ्या विद्यार्थ्यांना शून्य टक्के व्याजदराने शैक्षणिक कर्ज देण्यापर्यंत बँकेने आपली सामाजिक बांधिलकी जपली आहे. अशा संस्थेचा विकास करताना राजकीय अभिनिवेशाला थारा असता कामा नये.
मकरंद आबांना सहकार क्षेत्राचा दांडगा अनुभव आहे. अडचणीत असलेले दोन्ही साखर कारखाने त्यांनी सक्षमपणे चालवून दाखवले आहेत. त्यांच्या अनुभवाचा जिल्हा बँकेच्या प्रगतीसाठी निश्चित उपयोग होईल. राज्यातील तीन प्रमुख पक्षांनी एकत्र येऊन निवडणूक लढविण्याचा निर्णय घेतला आहे. त्यामुळे आता गट-तट आणि पक्षीय मतभेद बाजूला ठेवून महायुतीच्या उमेदवारांना विजयी करण्यासाठी सर्वांनी ताकद लावावी, असे आवाहन शिवेंद्रसिंहराजे यांनी केले.
बँकेच्या खुर्चीपेक्षा सभासदांचा विश्वास महत्त्वाचा; मकरंद आबांचा निर्वाळा!
ना. मकरंद पाटील यांनी जिल्हा बँकेच्या गौरवशाली परंपरेचा उल्लेख करताना सहकारातील जुन्या पिढीच्या योगदानापुढे कृतज्ञता व्यक्त केली. कै. यशवंतराव चव्हाण यांच्या मार्गदर्शनाखाली कै. आबासाहेब वीर यांनी स्थापन केलेल्या जिल्हा बँकेने हजारो कुटुंबांना आर्थिक आधार दिला. दादासाहेब राजे खर्डेकर, रामराजे नाईक-निंबाळकर, अभयसिंहराजे भोसले यांच्यासह अनेक दिग्गजांनी आपल्या कार्यकर्तृत्वातून बँकेचा नावलौकिक राज्याच्या सीमा ओलांडून देशपातळीवर पोहोचवला, असे त्यांनी सांगितले.
जिल्ह्यातील सर्व नेत्यांनी सहकार्य केल्यामुळे आपण बिनविरोध निवडून आलो आहोत. बँकेने तीन लाख रुपयांपर्यंत शून्य टक्के व्याजदराने कर्जपुरवठा करण्याचा निर्णय घेतला आहे. उच्च शिक्षणासाठीही शून्य टक्के व्याजदराने कर्ज उपलब्ध करून देण्याची योजना राबवली जात आहे. हे निर्णय केवळ आर्थिक व्यवहार नसून शेतकरी आणि विद्यार्थ्यांच्या भवितव्याला बळ देणारे आहेत. नाबार्डसह विविध स्तरांवरील पुरस्कारांनी बँकेच्या कामगिरीची दखल घेतली आहे.
आगामी काळात बँकेचा कारभार करताना कोणत्याही पक्षाचा झेंडा किंवा राजकीय भेदभाव आड येणार नाही. सर्व नेत्यांना, सभासदांना आणि घटकांना विश्वासात घेऊन बँकेचे हित जपणारा सक्षम कारभार करण्यास माझे प्राधान्य असेल. जिल्हा बँकेची प्रगती आणि सभासदांचा विश्वास हेच माझ्यासाठी महत्त्वाचे असेल, असा ठाम निर्धार मकरंद पाटील यांनी व्यक्त केला.
तीन तालुक्यांची ताकद एकवटली!
जिल्हा बँकेच्या निवडणुकीतील मतदान प्रक्रिया, उमेदवार आणि सभासदांची भूमिका याबाबत माहिती देण्यासाठी या मेळाव्याचे आयोजन करण्यात आले होते. वाई, खंडाळा आणि महाबळेश्वर या तिन्ही तालुक्यांतील सभासद व कार्यकर्त्यांनी मोठ्या संख्येने उपस्थिती लावत महायुतीच्या शक्तिप्रदर्शनाला प्रतिसाद दिला. ही माहिती किसनवीर सहकारी साखर कारखान्याचे उपाध्यक्ष प्रमोद शिंदे यांनी दिली.
दरम्यान, सत्यजित वीर यांची बिनविरोध निवड झाली आहे. या मेळाव्यास आमदार धैर्यशील कदम, बाळासाहेब सोळसकर, प्रतापराव पवार, माजी जिल्हाध्यक्ष उदय कुबुले, रमेश धायगुडे, दत्तात्रय ढमाळ, महादेव मस्कर, मदन भोसले, मोहनराव जाधव, बाळासाहेब चिरगुटे, शशिकांत पवार, दिलीप पिसाळ, संजय गायकवाड, अजित शिंदे, मयूर चव्हाण, किरण काळोखे, भारत खामकर, प्रमोद शिंदे, विक्रांत डोंगरे, वर्षा जगताप, ऋषाली चव्हाण यांच्यासह विविध पदाधिकारी, सभासद आणि कार्यकर्ते उपस्थित होते.
2) वाई:-एमडी ड्रग्स प्रकरणात मोठा दिलासा! मंदार शहाणे यांना न्यायालयाकडून जामीन मंजूर
जप्ती, नमुने आणि पंचनाम्याच्या प्रक्रियेवर बचाव पक्षाचे आक्षेप; वैज्ञानिक पुरावे आणि तपासातील त्रुटींचा युक्तिवाद ठरला महत्त्वाचा.
सातारा |
वाई, दि. ३१ : शिरवळ पोलीस ठाण्यात NDPS कायद्यांतर्गत दाखल झालेल्या एमडी ड्रग्स प्रकरणातील आरोपी मंदार शहाणे यांना वाई येथील जिल्हा व सत्र न्यायालयाने जामीन मंजूर केला आहे. जून २०२६ मध्ये दाखल झालेल्या या प्रकरणात बचाव पक्षाने तपास यंत्रणेच्या कार्यपद्धतीवर तसेच जप्तीच्या प्रक्रियेतील त्रुटींवर प्रश्न उपस्थित करत आरोपीच्या जामिनासाठी जोरदार बाजू मांडली.
बचाव पक्षाच्या वतीने युक्तिवाद करताना जप्त करण्यात आलेला पदार्थ अमली पदार्थ असल्याचे वैज्ञानिक पुराव्यांद्वारे अद्याप सिद्ध झालेले नसल्याचा मुद्दा मांडण्यात आला. तसेच तपासादरम्यान अवलंबलेल्या प्रक्रियेत अनेक त्रुटी असल्याचे निदर्शनास आणून देण्यात आले. जप्तीची कार्यवाही, नमुने घेण्याची पद्धत आणि पंचनामा प्रक्रियेबाबतही गंभीर शंका उपस्थित करण्यात आल्या.
केवळ आरोपांच्या आधारे आरोपीला दीर्घकाळ न्यायालयीन कोठडीत ठेवणे योग्य ठरणार नाही, असा युक्तिवाद बचाव पक्षाने न्यायालयासमोर केला.
आरोपी मंदार शहाणे यांच्या वतीने ॲड. प्रधुन्य गाढवे, ॲड. स्नेहांकित सूर्यवंशी आणि ॲड. शुभम मालुसरे यांनी न्यायालयात प्रभावी बाजू मांडली. दोन्ही बाजूंचे म्हणणे ऐकून घेतल्यानंतर व उपलब्ध बाबींचा विचार करून वाई जिल्हा व सत्र न्यायालयाने आरोपीला जामीन मंजूर करण्याचा आदेश दिला.
या निर्णयामुळे शिरवळ येथील एमडी ड्रग्स प्रकरणात आरोपीला न्यायालयीन दिलासा मिळाला असून, तपासातील प्रक्रियात्मक बाबी आणि वैज्ञानिक पुराव्यांचे महत्त्व पुन्हा एकदा अधोरेखित झाले आहे.
टीप : जामीन मंजूर होणे म्हणजे आरोपातून निर्दोष मुक्तता नव्हे. प्रकरणाचा पुढील न्यायालयीन तपास व सुनावणी सुरू राहणार आहे.
3) वाई:-‘किसन वीर’चा शब्द पाळला! सभासदांची दिवाळी गोड; कारखान्याच्या पाठीशी एकजुटीची ताकद उभी
साखर वाटपाचा उत्साहात शुभारंभ; संपूर्ण ऊस ‘किसन वीर’लाच देण्याचा सभासदांचा निर्धार.
सातारा | वाई, दि. ३१ :दिलेला शब्द पाळला की विश्वास अधिक दृढ होतो, याचा प्रत्यय किसन वीर सहकारी साखर कारखान्याच्या साखर वाटपातून आला. दिवाळीच्या पार्श्वभूमीवर मेणवली गट पश्चिम भागातील सभासदांसाठी साखर वाटपाचा शुभारंभ शुक्रवारी (दि. ३०) मेणवली विकास सेवा सोसायटी येथे उत्साहपूर्ण वातावरणात करण्यात आला. सोसायटीचे चेअरमन मधुकर चौधरी यांच्या हस्ते श्रीफळ वाढवून या उपक्रमाचा प्रारंभ झाला.
सणासुदीच्या काळात संचालक मंडळाने दिलेला शब्द प्रत्यक्ष कृतीत उतरवल्याने सभासदांमध्ये समाधान आणि आनंदाचे वातावरण निर्माण झाले. ऊस उत्पादक शेतकऱ्यांची दिवाळी गोड केल्याबद्दल सभासदांनी कारखान्याचे चेअरमन, व्हाईस चेअरमन आणि संपूर्ण संचालक मंडळाचे आभार मानले.
या उपक्रमाचे वैशिष्ट्य म्हणजे केवळ साखर वाटपाचा आनंद नव्हे, तर कारखान्याच्या भवितव्यासाठी सभासदांनी व्यक्त केलेली एकजूट! अडचणींच्या काळातून कारखान्याला बाहेर काढून पुन्हा वैभवाच्या दिशेने नेण्यासाठी आम्ही ठामपणे साथ देऊ, असा विश्वास उपस्थित शेतकऱ्यांनी व्यक्त केला. यापुढे आपला संपूर्ण ऊस किसन वीर कारखान्यालाच देण्याचा निर्धारही सभासदांनी जाहीर केला. कारखान्याच्या प्रगतीसाठी आवश्यक ते सर्व सहकार्य करण्याची ग्वाही देत सभासदांनी संचालक मंडळाच्या पाठीशी ताकद उभी केली.
दरम्यान, साखर वाटपासाठी जागा उपलब्ध करून दिल्याबद्दल मेणवली विकास सेवा सोसायटीचे विशेष आभार व्यक्त करण्यात आले.
यावेळी साहेबराव चौधरी, मधुकर चौधरी, जयसिंग पोळ, अरविंद हेरकळ, अक्षय निंबाळकर, श्रीरंग येवले, दिनकर निंबाळकर, शंकर सणस, शरद कोचळे, जगन्नाथ काटे, महादेव येवले यांच्यासह परिसरातील विविध गावांतील सभासद व कार्यकर्ते मोठ्या संख्येने उपस्थित होते.
