वाई:-अन्नसुरक्षेचे नियम पाळा, ग्राहकांचा विश्वास जिंका!
पत्रकार सारिका गवते सातारा जिल्हा महिला अध्यक्ष
राष्ट्रीय अध्यक्ष संपादक प्रल्हाद चव्हाण – 8208717483
वाई:-अन्नसुरक्षेचे नियम पाळा, ग्राहकांचा विश्वास जिंका!
वाई व्यापारी महासंघ आणि अन्न व औषध प्रशासनाच्या संयुक्त कार्यशाळेत व्यापाऱ्यांना मोलाचे मार्गदर्शन.
परवाना, स्वच्छता, खाद्यपदार्थांतील रंगांचा वापर, तेलाची गुणवत्ता आणि सुरक्षित अन्न हाताळणीवर भर.
सातारा | वाई, दि. १४ : ग्राहकांचे आरोग्य सुरक्षित ठेवण्यासोबतच व्यवसायाची विश्वासार्हता जपण्यासाठी अन्नसुरक्षा नियमांचे काटेकोर पालन करणे आवश्यक आहे. आवश्यक परवाना, बिलावर एफएसएसएआय क्रमांक, स्वच्छता, सुरक्षित अन्न हाताळणी आणि खाद्यपदार्थांमध्ये रंग व तेलाचा मर्यादित वापर याबाबत व्यापाऱ्यांनी कोणतीही हलगर्जी करू नये, असे आवाहन अन्न व औषध प्रशासनाच्या अधिकाऱ्यांनी केले.
वाई व्यापारी महासंघ आणि अन्न व औषध प्रशासन, सातारा विभाग यांच्या संयुक्त विद्यमाने मंगळवारी (दि. १३ ऑक्टोबर) लोकमान्य टिळक वाचनालय येथे अन्नसुरक्षा व व्यवसाय मार्गदर्शन कार्यशाळेचे आयोजन करण्यात आले होते. या कार्यशाळेत व्यापाऱ्यांना कायदेशीर तरतुदी, स्वच्छतेचे निकष आणि अन्न व्यवसायातील जबाबदाऱ्यांची सविस्तर माहिती देण्यात आली.
कार्यक्रमाची सुरुवात दीपप्रज्वलनाने झाली. महासंघातर्फे उपस्थित अधिकारी आणि पत्रकारांचे स्वागत करण्यात आले. महासंघाचे अध्यक्ष हेमंत येवले यांनी प्रास्ताविकात व्यापाऱ्यांना कायदेशीर नियमांची माहिती मिळावी, त्यांच्या व्यावसायिक अडचणी दूर व्हाव्यात आणि प्रशासनाशी समन्वय वाढावा, या उद्देशाने कार्यशाळेचे आयोजन केल्याचे सांगितले.
परवाना अद्ययावत ठेवा; नियमभंग केल्यास कारवाईचा इशारा!
अन्न व औषध प्रशासनाचे सहाय्यक आयुक्त संजय शिंदे यांनी अन्नसुरक्षा कायद्याचे महत्त्व स्पष्ट केले. प्रत्येक अन्न व्यावसायिकाने आपल्या व्यवसायाच्या स्वरूपानुसार आवश्यक नोंदणी किंवा परवाना घेणे बंधनकारक असल्याचे त्यांनी सांगितले. परवान्यावर नोंदवलेला मोबाईल क्रमांक आणि ई-मेल आयडी अद्ययावत असणे गरजेचे आहे. कारण प्रशासनाच्या सूचना, कायदेशीर पत्रव्यवहार आणि महत्त्वाची कागदपत्रे याच माध्यमातून पाठवली जातात.
खाद्यपदार्थांमध्ये परवानगीपेक्षा अधिक प्रमाणात रंगांचा वापर करणे टाळावे. नियमांचे उल्लंघन झाल्यास संबंधित व्यावसायिकांवर कायद्यानुसार कारवाई होऊ शकते, असा इशाराही त्यांनी दिला. दुधाच्या वाहतुकीसाठी स्टीलचे कॅन वापरण्याचे महत्त्व त्यांनी विशद केले.
तळण्यासाठी वापरले जाणारे तेल वारंवार आणि दीर्घकाळ तापवल्यामुळे त्याची गुणवत्ता घसरू शकते. त्यामुळे तेलाचा योग्य वापर, त्याची गुणवत्ता आणि वेळेवर बदल याकडे विशेष लक्ष देण्याची गरज त्यांनी अधोरेखित केली. किराणा दुकाने, हॉटेल्स, दुग्धव्यवसाय आणि अन्नवितरणाशी संबंधित सर्व घटकांनी अन्नसुरक्षेच्या नियमांतील बदलांची माहिती ठेवावी, असे आवाहनही शिंदे यांनी केले.
स्वच्छतेत कसूर नको; प्रत्येक नोंद ठेवा व्यवस्थित!
अन्न सुरक्षा अधिकारी अल्पना गायकवाड यांनी अन्न व्यवसायातील स्वच्छता, नोंदणी आणि परवाना प्रक्रियेबाबत मार्गदर्शन केले. ग्राहकांना दिल्या जाणाऱ्या बिलावर एफएसएसएआय क्रमांक नमूद करणे, दुकानातील रॅक, काउंटर आणि साठवणुकीची जागा स्वच्छ ठेवणे तसेच स्वच्छतेच्या नोंदी जतन करणे आवश्यक असल्याचे त्यांनी सांगितले.
दुकानात झाकण असलेल्या कचराकुंड्या ठेवणे, पिण्यायोग्य पाण्याचा वापर करणे, उपकरणांची नियमित स्वच्छता राखणे आणि कीड नियंत्रणासाठी योग्य उपाययोजना करणे महत्त्वाचे आहे. कीड नियंत्रणाच्या कामाच्या पावत्या जतन कराव्यात, पाण्याच्या गुणवत्तेची तपासणी करावी आणि अन्न हाताळणाऱ्या कर्मचाऱ्यांनी वैयक्तिक स्वच्छता पाळावी, अशा सूचनाही त्यांनी दिल्या.
अन्न हाताळताना आवश्यकतेनुसार टोपी, एप्रन आणि हातमोजे वापरणे, पॅकेज्ड खाद्यपदार्थांवरील उत्पादन तारीख व वापरण्याची अंतिम तारीख तपासणे आणि हॉटेलमध्ये कच्चे व शिजवलेले पदार्थ स्वतंत्र ठेवणे गरजेचे आहे. अन्नपदार्थांपासून रसायने आणि स्वच्छतेसाठी वापरली जाणारी सामग्री वेगळी ठेवण्याचेही त्यांनी स्पष्ट केले.
ग्राहकांना स्वच्छ पाणी द्या; बाटलीबंद पाण्याची सक्ती नको!
अन्न सुरक्षा अधिकारी प्रियांका वाईकर यांनी ग्राहकांच्या आरोग्याशी तडजोड न करता व्यवसाय करण्याचे आवाहन केले. हॉटेल चालकांनी अन्नसुरक्षा परवाना दर्शनी भागात लावावा आणि अन्न तयार करण्यासाठी केवळ पिण्यायोग्य पाण्याचा वापर करावा, असे त्यांनी सांगितले.
ग्राहकांना स्वच्छ पिण्याचे पाणी उपलब्ध करून देणे आवश्यक असून, बाटलीबंद पाणी खरेदी करण्याची सक्ती करता येत नसल्याचे त्यांनी स्पष्ट केले. शाकाहारी आणि मांसाहारी पदार्थांसाठी स्वतंत्र भांडी व चॉपिंग बोर्ड वापरणे, अन्न हाताळणाऱ्या कर्मचाऱ्यांच्या आरोग्य तपासण्यांकडे लक्ष देणे आणि त्यांना आवश्यक प्रशिक्षण देणे यावर त्यांनी भर दिला.
ग्राहकांच्या तक्रारींची नोंद घेऊन त्यांचे निराकरण करण्यासाठी स्वतंत्र नोंदवही ठेवावी. दुकान आणि गोदामासाठी लागू असलेल्या परवाना अटींचे पालन करावे. तसेच शेतमालाची थेट विक्री आणि त्यावर प्रक्रिया करून विक्री करणे यांतील परवाना नियमांचा फरक समजून घ्यावा, असेही वाईकर यांनी सांगितले.
व्यापाऱ्यांच्या प्रश्नांना अधिकाऱ्यांकडून उत्तरे
कार्यशाळेदरम्यान व्यापाऱ्यांनी आपल्या व्यावसायिक अडचणी आणि विविध नियमांबाबत प्रश्न उपस्थित केले. उपस्थित अधिकाऱ्यांनी त्यांच्या शंकांचे निरसन करून आवश्यक मार्गदर्शन केले. त्यामुळे व्यापारी आणि प्रशासन यांच्यातील संवादाला महत्त्वपूर्ण व्यासपीठ मिळाले.
अन्नसुरक्षा ही केवळ कायदेशीर जबाबदारी नसून ग्राहकांच्या आरोग्याच्या संरक्षणाशी निगडित महत्त्वाची बाब आहे. नियमांचे पालन, स्वच्छतेच्या सवयी आणि सुरक्षित अन्न हाताळणी यांमुळे ग्राहकांचा विश्वास दृढ होतो आणि व्यवसायाची प्रतिष्ठाही वाढते. या दृष्टीने व्यापाऱ्यांना नियमांची माहिती देणाऱ्या अशा कार्यशाळा उपयुक्त ठरत असल्याचे मत यावेळी व्यक्त करण्यात आले.
या कार्यक्रमाला वाई व्यापारी महासंघाचे अध्यक्ष हेमंत येवले, उपाध्यक्ष प्रताप खामकर, उमेश शहा, सचिव राहुल जायगुडे, सहसचिव सागर मुळे, खजिनदा प्रसाद चारेगावकर, महासंघाचे सभासद आणि शहरातील व्यापारी मोठ्या संख्येने उपस्थित होते. प्रताप खामकर यांनी आभार मानले.
